កកស្ទះ​ចរាចរណ៍​ខ្លាំង​ដោយសារ​បើក​ច្រក​ឆ្លងកាត់​ទទឹងផ្លូវ​សហព័ន្ធរុស្ស៊ី​ច្រើនពេក​

2555

(​ភ្នំពេញ​)៖ ប្រជាពលរដ្ឋ​និយាយថា កំណាត់​ផ្លូវ​សហព័ន្ធរុស្ស៊ី​ពិសេស​ចាប់ពី​គល់ស្ពាន​អាកាស​ផ្សារ ដី​ហុយ ដល់​ពេទ្យ​រ៉ូយ៉ាល់ភ្នំពេញ បាន​កកស្ទះ​ចរាចរណ៍​រាល់ថ្ងៃ បើទោះបី​ស្ពាន​អាកាស​ផ្សារ​ដី​ហុយ ឬ​ស្ពាន​អាកាស​មិត្តភាព​កម្ពុជា​_​ចិន​សែន សុខ បាន​បើកដាក់​ឲ្យ​ប្រើប្រាស់​ហើយ​ក្តី ។​

​ពាក់ព័ន្ធ​នឹង​ការកកស្ទះ​ចរាចរណ៍​នេះ ប្រជាពលរដ្ឋ​ដែលជា​អ្នកដំណើរ​បាន​សូម​ឲ្យ​មន្ត្រី​ជំនាញ ពិសេស​ក្រសួង មន្ទីរ​សាធារណការ​សិក្សា​ឡើងវិញ ដើម្បី​ធ្វើយ៉ាងណា​ដោះស្រាយ​បញ្ហា​ការកកស្ទះ ចរាចរ​នៅ​តំបន់​នេះ​ឲ្យ​បាន​ប្រសើរ​ឡើងវិញ ។​

​ប្រជាពលរដ្ឋ​បាន​ឲ្យ​ដឹង​ទៀតថា ពួកគាត់​មិនមែនជា​អ្នកជំនាញ​ទេ តែបើ​តាម​ពួកគាត់​ពិនិត្យ មើល​នឹង ភ្នែក​ជាក់ស្តែង និង​ជា​អ្នក​បានធ្វើ​ដំណើរ​ឆ្លងកាត់​តា់ម​បណ្តោយ​ផ្លូវ​នេះ​ជាក់ស្តែង គឺ​ការកកស្ទះ​ចរាចរ​នេះ​បណ្តាលមកពី​មូលហេតុ​មួយចំនួន​ក្នុងនោះ​រួមមាន​យានយន្ត​ចេញ ពី​ម្តុំ​ក្រោយ​ផ្សារ​ទឹកថ្លា​មក​ផ្លូវ​សហព័ន្ធរុស្ស៊ី​ច្រើន ។​អ្វីដែល​បង្ក​ឲ្យ​មានការ​កកស្ទះ​ចរាចរ​ខ្លាំង​នោះ គឺ​ការបង្កើត​ឲ្យ​មាន​ផ្លូវ​ឆ្លងកាត់​របាំង​ពុះ​ចែក​ទ្រូងផ្លូវ​ចំនួន​៣​កន្លែង​នោះ​គឺ​ការបើក​ឲ្យ​មាន​ច្រកចេញ និង​ចូល​មុខ​វត្ត​ទឹកថ្លា ផ្លូវ​ឆ្លងកាត់​ខាងកើត​វត្ត​ទឹកថ្លា​និង​ការបង្កើត​ឲ្យ​មាន​ផ្លូវកា​ត់របាំង​ពុះ​ចែក ទ្រូងផ្លូវ ជាប់​ឈៀង​ខាងលិច​មន្ទីរ ពេទ្យ​រ៉ូយ៉ាល់ភ្នំពេញ ។ បើតាម​ពួកគាត់​យល់​ខ្លួនឯង ដើម្បី​ដោះស្រាយ​ចរាចរ​នៅ​តំបន់​នេះ​ឲ្យ​បាន​ធូ​ស្រាល​មួយកម្រិត គឺមាន​តែ​បិទ​ច្រក​ផ្លូវ​ឆ្លងកាត់​ទាំង ៣ កន្លែង​នេះ​ចោល ពោលគឺ បើ​អ្នកធ្វើដំណើរ​ពី​ភ្នំពេញ (​ពី​កើ​តទៅ​លិច​) ចង់​បត់​ឆ្វេង​ទៅក្រោយ ផ្សារ​ទឹកថ្លា ឬ​ទៅក្រោយ​មន្ទីរពេទ្យ​រ៉ូយ៉ាល់ភ្នំពេញ គួរ​ត្រូវ​បត់​ក្រោម ស្ពាន​អាកាស​ផ្សារ​ដី​ហុយ ចំណុច​មុខ​ផ្សារ​ផ្លា​ហ្សា​រ​ទឹកថ្លា រួច​ទើប​ត្រឡប់ក្រោយ​វិញ​(​ទៅ​ទិសខាងកើត​) ដោយឡែក​អ្នក ដំណើរ​នៅ​ម្តុំ​វត្ត​ទឹកថ្លា​បើ​ចង់​ចូលមក​ភ្នំពេញ​គួរ​ត្រូវ​បត់​ក្រោម​ស្ពាន​អាកាស​ផ្សារ​ដី​ហុយ​ចំណុច មុខ​ផ្សារ​ផ្លា​ហ្សា​រ​ទឹកថ្លា​នេះដែរ ។ ដោយហេតុថា ចំណុច​បត់​នេះ​មិនមាន​ចរាចរ​មមាញឹក​នោះទេ ។​

ការកកស្ទះចរាចរនៅចំណុចស្ពានអាកាសផ្សារដីហុយ (រូបថត: អង្គារ៍ហេង)

​គួរ​បញ្ជាក់ថា ស្ពាន​អាកាស​មិត្តភាព​កម្ពុជា​_​ចិន​សែន សុខ ហៅ​ស្ពាន​អាកាស​ស្តុ​ប​ផ្សារ​ដី​ហុយ ដែលមាន​ទីតាំង​នៅក្នុង​សង្កាត់​ទឹកថ្លា ខណ្ឌ​សែន សុខ​នឹង​បើកសម្ពោធ​ដាក់​ឲ្យ​ប្រើប្រាស់ ជា​ផ្លូវការ​នៅ​ព្រឹក​ថ្ងៃទី​០២​កក្កដា នេះ​ក្រោម​អធិបតីភាព ដ៏​ខ្ពង់ខ្ពស់ សម្តេច​អគ្គមហាសេនាបតី តេ​ជោ​ហ៊ុនសែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា និង​សម្តេច​កិត្តិ ព្រឹទ្ធ​បណ្ឌិត ប៊ុនរ៉ានី ហ៊ុនសែន ដែល​ស្ពាន​អាកាស​ថ្មី​នេះ​មាន​បណ្តោយ​៩០៥​ម៉ែត្រ ទទឹង​១៦.៥​ម៉ែត្រ​ស្ថិតនៅ​ប្រសព្វ រវាង​មហាវិថី​សហព័ន្ធ រុស្ស៊ី និង​ផ្លូវ​ហាណូយ (១០១៩) ដែលជា​គម្រោង ហិរញ្ញ​ប្ប ទាន របស់​សាធារណរដ្ឋ​ប្រជាមានិត​ចិន​និង​ទទួលបាន​សិទ្ធិ​សាងសង់ ដោយ ក្រុមហ៊ុន សៀង​ហៃ រួម​និង​ការត្រួតពិនិត្យ​បច្ចេកទេស​ដោយ​ក្រសួង​សាធារណការ និង​ដឹកជញ្ជូន ។ ប៉ុន្តែ​ក្រោយ​បើក​ឲ្យ ដំណើរការ​ប្រើប្រាស់ អាកាស​ស្តុ​ប​ផ្សារ​ដី​ហុយ​នេះហើយ កំណាត់​ផ្លូវ​នេះ​ពិសេស​នៅ​តំបន់ ផ្សារ​ទឹកថ្លា​នៅតែ​ដោះស្រាយ​ការកកស្ទះ​មិនបាន​ដដែល ៕ ដោយៈ អង្គារ៍ហេង