កងកម្លាំង​ដឹកនាំ​ដោយ​តួ​ក​គី​វាយ​បណ្តេញ​ពួក​ឧទ្ទាម​ឃឺ​ដ​ចេញពី​តំបន់​អា​ហ្វ្រី​ន​

954
ចែករម្លែក

​ទង់ជាតិ​តួ​ក​គី​បាន​បង្ហូត​នៅ​តំបន់​អា​ហ្វ្រី​ន​កាលពី​ថ្ងៃអាទិត្យ​ទី ១៨ មីនា បន្ទាប់ពី​កងទ័ព​របស់ខ្លួន​និង​ក្រុម​ឧទ្ទាម​ដែល​គាំទ្រ​ដោយ​រដ្ឋាភិបាល​ក្រុង​អង់កា​រ៉ា​បាន​បណ្តេញ​កងជីវពល​ឃឺ​ដ​ដើម្បី​ដណ្ដើម​កាន់កាប់​ទីក្រុង​ស៊ី​រី​មួយ​នេះ​។​

​ក្នុង​ជ័យជម្នះ​ដ៏​ធំ​សម្រាប់​ប្រតិបត្តិការ​ពីរ​ខែ​របស់​រដ្ឋាភិបាល​ក្រុង​អង់កា​រ៉ា​ប្រឆាំងនឹង​អង្គភាព​ការពារ​ប្រជាជន​ឃឺ​ដ (YPG) នៅ​ភាគ​ខាងជើង​ប្រទេស​ស៊ី​រី កងកម្លាំង​ដឹកនាំ​ដោយ​តួ​ក​គី​បាន​សម្រុក​ចូលទៅក្នុង​តំបន់​អា​ហ្វ្រី​ន ដោយ​មិន​មានការ​តតាំង ពេល​ចូល​កាន់កាប់​ទីតាំង​នានា​នៅ​ទូទាំង​ទីក្រុង​នេះ​។​

​ការ​សម្រុកចូល​នេះ​កើតឡើង នៅពេលដែល​សង្គ្រាមស៊ីវិល​ស៊ី​រី​បាន​ឈាន​ចូលដល់​ឆ្នាំ​ទី ៨ នៅ​សប្តាហ៍​នេះ ជាមួយ​ការប្រយុទ្ធ​គ្នា​ដ៏​ខ្លាំងក្លា​កំពុង​កើតឡើង​នៅ​សមរភូមិ​មុខ​ចំនួន ២ គឺ​នៅ​ជុំវិញ​តំបន់​អា​ហ្វ្រី​ន និង​នៅក្នុង​តំបន់​បះបោរ ហ្គោ​តា​ភាគ​ខាងកើត ក្បែរ​ទីក្រុង​ដា​ម៉ាស​។​

​មនុស្ស​រាប់រយ​នាក់​ត្រូវបាន​សម្លាប់​និង​មនុស្ស​រាប់ពាន់នាក់​ត្រូវបាន​បង្ខំ​ឱ្យ​ចាក​ចេញពីផ្ទះ​របស់​ពួកគេ​ដោយសារតែ​ការវាយប្រហារ​ដ៏​សាហាវឃោរឃៅ​នៅ​ហ្គោ​តា កន្លែង​ដែល​ប្រធានាធិបតី​បា​សា អាល់​អាសាដ កាលពី​ថ្ងៃអាទិត្យ​បាន​ទៅសួរសុខទុក្ខ​កងទ័ព ដែល​ប្រយុទ្ធ​ដើម្បី​ដណ្ដើម​កាន់កាប់​ទីតាំង​រឹងមាំ​ចុងក្រោយរ​បស់ទ័ព​ឧទ្ទាម​នៅ​ជិត​រដ្ឋធានី​នេះ​។​

​នៅ​អា​ហ្វ្រី​ន ក្រុម​អ្នកឆ្លើយឆ្លង​ព័ត៌មាន​របស់​ទីភ្នាក់ងារសារព័ត៌មាន​បារាំង (AFP) បានឃើញ​កងកម្លាំង​តួ​ក​គី​និង​សម្ព័ន្ធមិត្ត​ស៊ី​រី​របស់​ពួកគេ​មាន​វត្ត​មាននៅ​គ្រប់​សង្កាត់​ទាំង​អស់នៃ​ទីក្រុង បន្ទាប់ពី​ពួកគេ​បានធ្វើការ​សម្រុកចូល​លឿន​ដូច​ផ្លេកបន្ទោរ​កាលពី​ថ្ងៃអាទិត្យ​។​

​ពួក​ឧទ្ទាម​ស៊ី​រី (​សម្ព័ន្ធមិត្ត​តួ​ក​គី​) នាំគ្នា​ដើរ​ពេញទី​ក្រុង ដោយ​ផ្តល់​សញ្ញាណ​នៃ​ជ័យជម្នះ និង​បាន​ថតរូប​ជាមួយ​រថក្រោះ​តួ​ក​គី ដែល​ចត​នៅ​ខាងក្រៅ​អគារ​ផ្លូវការ​នានា​។​

​ក៏ប៉ុន្តែ​ការអបអរ​មិនយូរប៉ុន្មាន​ហាក់ដូចជា​ប្រែក្លាយ​ទៅជា​ការ​លួច​ឆក់​ប្លន់​ទៅវិញ ខណៈ​ពួក​ឧទ្ទាម​គាំទ្រ​តួ​ក​គី បានចាប់ផ្ដើម​លួច​ទំនិញ និង​វាយបំផ្លាញ​រូបសំណាក​វីរបុរស​ជ​ន​ជាតិ​ឃឺ​ដ​។​

​ក្រុម​អ្នក​ប្រយុទ្ធ​ទាំងនោះ​ត្រូវគេ​មើលឃើញ​កំពុង​ទម្លុះ​ចូលទៅក្នុង​ហាង ភោជនីយដ្ឋាន និង​ផ្ទះ​ជាច្រើន មុនពេល​ដឹកជញ្ជូន​ម្ហូបអាហារ ឧបករណ៍​អេ​ឡិច​ត្រូ​និ​ច ភួយ និង​ទំនិញ​ដទៃទៀត​ដាក់​តាម​ឡាន​ដឹកទំនិញ​៕ ដោយ៖ កញ្ញាដាលីស

ពួក​ឧទ្ទាម​ស៊ី​រី​គាំទ្រ​តួ​ក​គី​កំពុង​ដើរ​ជុំវិញ​ទីក្រុង​អា​ហ្វ្រី​ន​ដែល​វាយ​ដណ្តើមបាន​កាលពី​ថ្ងៃអាទិត្យ