កង់​ចំនួន៨៨៨​គ្រឿង បានប្រគល់​ជូន​ដល់​ចុងភៅ​ចំអិន​អាហារ និង​សិស្ស​ក្រីក្រតាម​សាលាបឋមសិក្សា​ទូទាំង​ខេត្តសៀមរាប​

405
ចែករម្លែក

ដោយ:​គូលែន​/​សៀមរាប ៖ កង់​ចំនួន​៨៨៨​គ្រឿង ត្រូវបាន​លោក ពិន ប្រាកដ អភិបាលរង​ខេត្ត តំណាង​ដ៏​ខ្ពង់ខ្ពស់ លោក ទៀ សីហា អភិបាល​នៃ​គណៈ​អភិបាលខេត្ត​សៀមរាប ចូលរួម​ជា​អធិបតី​ក្នុង​ពិធី​ចែក​កង់​ជូន​ដល់​ចុងភៅ​ចំអិន​អាហារ និង​សិស្ស​ក្រីក្រ​តាម​សាលាបឋមសិក្សា​ទូទាំង​ខេត្តសៀមរាប​ចំនួន ៨៨៨ នាក់​។​ពិធី​ចែក​កង់​ដល់​ចុងភៅ​ចំអិន​អាហារ និង​សិស្ស​ក្រីក្រ​តាម​សាលាបឋមសិក្សា​នេះ បានធ្វើ​ឡើង​កាលពី​ថ្ងៃទី​១២ ខែមករា ឆ្នាំ​២០១៩ ។​

លោក ពិន ប្រាកដ បាន​បញ្ជាក់ថា កង់​ទាំង​៨៨៨​គ្រឿង​នេះ​គឺ​បានការ​ឧបត្ថម្ភ​ពី អង្គការ​ឡូត​ធឺ​រី​ក្លិប ប្រទេស​សាំ​ហ្កា​ពួ តាមរយៈ​មន្ទីរអប់រំ យុវជន និង​កីឡា​ខេត្តសៀមរាប​។​

លោក​បាន​បន្តថា ក្នុងនោះ​សិស្ស​ក្រីក្រ​តាម​សាលាបឋមសិក្សា​ទូទាំង​ខេត្តសៀមរាប​មាន​ចំនួន ៧៥៦ នាក់ និង​ចុងភៅ​ចំអិន​អាហារ​តាម​សាលារៀន​បឋមសិក្សា​មាន​ចំនួន ១៣២ នាក់​។

លោក​អភិបាលរង បាន​បន្តទៀតថា ការផ្តល់​កង់​នេះ​ដល់​ប្អូនៗ​នាពេលនេះ​គឺជា​ការសម្រួល​ដល់​ការលំបាក​មួយចំនួន​ក្នុង​ធ្វើដំណើរ​ទៅ​សាលារៀន​ផងដែរ​។ ជាមួយ​គ្នានេះដែរ​លោក​ក៏បាន​សំណូមពរ​ដល់​ប្អូន​ត្រូវគោរព​ច្បាប់​ចរាចរណ៍​អោយបាន​ខ្ជាប់ខ្ជួន​ក្នុងពេល​បញ្ជា​យានជំនិះ​គ្រប់​ប្រភេទ​៕B/