កម្ពុជា​គ្រោង​អនុម័ត​ច្បាប់​ប្រកួតប្រជែង​នៅ​ដើមឆ្នាំ​២០២០

150
ចែករម្លែក

ដោយ​:ពៅ និមល​/​ភ្នំពេញ​ ៖ ស្រប​ពេលដែល​បណ្តា​ប្រទេស​ជា​សមាជិក​អាស៊ាន បានអនុម័ត​និង​កំពុង​អនុវត្ត​ច្បាប់​ប្រកួតប្រជែង​យ៉ាង​មាន​ប្រសិទ្ធភាព​។ មន្ត្រីជាន់ខ្ពស់​ក្រសួងពាណិជ្ជកម្ម​បាន​ឲ្យ​ដឹងថា សេចក្តីព្រាងច្បាប់​ស្តីពី​កិច្ចការ​ប្រកួតប្រជែង​នឹងត្រូវ​បានអនុម័ត​ជា​ស្ថាពរ​នា​ដើមឆ្នាំ​២០២០​ខាងមុខ ដើម្បី​ឲ្យ​ការប្រកួតប្រជែង​ស្មើភាព​គ្នា​ក្នុង​តំបន់​។​

លោក ប៉ាន សូរ​ស័ក្តិ រដ្ឋមន្ត្រីក្រសួង​ពាណិជ្ជកម្ម នៅ​ពិធី​បើក​សន្និសីទ​អាស៊ាន ស្តីពី​ការប្រកួតប្រជែង​លើក​ទី​៨ ការឈានទៅរក​គោលដៅ​និង​ការដោះស្រាយ​បញ្ហា​ប្រឈម នា​ព្រឹក​ថ្ងៃទី​១៤ ខែវិច្ឆិកា ឆ្នាំ​២០១៩​កន្លងទៅ បាន​មានប្រសាសន៍ថា ច្បាប់​ស្ដីពី​ការប្រកួតប្រជែង នឹង​ដើរតួនាទី​យ៉ាងសំខាន់​ក្នុងការ​គាំទ្រ​ការធ្វើ​ពាណិជ្ជកម្ម ការលើកកម្ពស់​ទី​លាន​​ប្រកួតប្រជែង​ដោយ​ស្មើភាព ការបង្កើត​ធុរកិច្ច​ថ្មីៗ និង​ការការពារ​ផលប្រយោជន៍​អ្នកប្រើប្រាស់ ស្របតាម​ការវិវត្តន៍​បច្ចេកវិទ្យា ការធ្វើ​ពាណិជ្ជកម្ម​តាម​ប្រព័ន្ធ​អេឡិច​ត្រូនិក និង​បម្រែបម្រួល​បរិយាកាស​ធុរកិច្ច​។ លោក​បាន​បន្តថា នៅក្នុង​ផែនការ​សកម្មភាព​រប​ស់​សហគមន៍​សេដ្ឋកិច្ច​អាស៊ាន​ឆ្នាំ​២០០៧ (AEC Blueprint 2007) ប្រទេស​សមាជិក​អាស៊ាន​ទាំងអស់​បាន​ប្ដេជ្ញាចិត្ត ក្នុងការ​រៀបចំ​ឱ្យមាន​ច្បាប់​ប្រកួតប្រជែង​របស់ខ្លួន ហើយ​មកទល់ពេលនេះ​មានតែ​កម្ពុជា​ប៉ុណ្ណោះ​ដែល​មិនទាន់​មានច្បាប់​ប្រកួតប្រជែង​នៅឡើយ​។

ប៉ុន្តែ​ទោះជា​យ៉ាងណាក្ដី ក្រសួងពាណិជ្ជកម្ម​សង្ឃឹម​យ៉ាង​មុតមាំ​ថា សេចក្តីព្រាងច្បាប់​ស្តីពី​កិច្ចការ​ប្រកួតប្រជែង​នេះ នឹងត្រូវ​បានអនុម័ត​ជា​ស្ថាពរ​នា​ដើមឆ្នាំ​២០២០ ឱ្យស្រប​ជាមួយនឹង​បណ្តា​ប្រទេស​ជា​សមាជិក​អាស៊ាន​ដ៏ទៃទៀត​។​

លោក ម៉ៃ​ឃើ​ល ថេ​នេ (Michael Tene) អគ្គលេខាធិការរង​អាស៊ាន បាន​លើកឡើងថា តាមរយៈ​សន្និសីទ​អាស៊ាន​នេះ គឺជា​វេទិកា​មួយ​ដើម្បី​ពិភាក្សា​ដោះស្រាយ​បញ្ហា​ប្រឈម​នានា បើទោះបីជា​ស្ថាប័ន​ប្រកួតប្រជែង​មួយ​មានបទពិសោធន៍​និង​មាន​ភាពចាស់ទុំ​ក៏ដោយ ក៏​នៅមាន​ការវិវត្តន៍​សំខាន់ៗ​មួយចំនួន​ដែល​អាចជា​សញ្ញា​សំគាល់​សម្រាប់​ស្ថាប័ន​ប្រកួតប្រជែង​។ លោក​បន្ថែមថា ការអនុវត្ត​គោលនយោបាយ​ប្រកួតប្រជែង​នឹង​លើកកម្ពស់​នវានុវត្តន៍ និង​ការចូលរួម​នៃ​ផលិតកម្ម​ក្នុង​តំបន់​ទៅក្នុង​ខ្សែចង្វាក់​ផ្គត់ផ្គង់​សកល ហើយ​ដើម្បី​សម្រេចបាន​គោលដៅ​ទាំងនោះ ក្រុមការងារ​មួយ​ហៅថា ក្រុម​ជំនាញការ​កិច្ចការ​ប្រកួតប្រជែង​អាស៊ាន (ASEAN Experts Group on Competition – AEGC) ត្រូវបាន​បង្កើតឡើង​។

សូមបញ្ជាក់ថា សន្និសីទ​អាស៊ាន​ស្តីពី​ការប្រកួតប្រជែង​លើក​ទី​៨ មាន​រយៈពេល​០២​ថ្ងៃ គឺ​ថ្ងៃទី​១៤ និង​១៥ ខែវិច្ឆិកា ឆ្នាំ​២០១៩ ក្នុង​គោលបំណង​ប្រើប្រាស់​វេទិកា​នេះ ដើម្បី​បង្ហាញ​និង​ពិភាក្សា​អំពី​វ​ឌ្ឍ​ភាព​នៃ​ដំណើរការ​តាក់តែង និង​អនុវត្ត​ច្បាប់​ប្រកួតប្រជែង​នៅក្នុង​តំបន់​អាស៊ាន​។ វេទិកា​នេះ មានការ​អ​ញ្ញើញ​ចូលរួម​ពី​តំណាង​ប្រទេស​ចំនួន​១០ ក្នុង​អាស៊ាន នឹង​ជំរុញឱ្យមាន​ការយល់ដឹង​កាន់តែ​ទូលំទូលាយ​អំពី​សារៈសំខាន់​នៃ​ច្បាប់ និង​គោលនយោបាយ​ប្រកួតប្រជែង ដើម្បី​រួមចំណែក​ក្នុងការ​ឆ្ពោះទៅរក​សមាហរណកម្ម​សេដ្ឋកិច្ច​អាស៊ាន​។ វេទិកា​នេះ​បាន​សហការ​រៀបចំ​ដោយ​អគ្គនាយកដ្ឋាន​កាំកុងត្រូល​នៃ​ក្រសួងពាណិជ្ជកម្ម លេខាធិការដ្ឋាន​អាស៊ាន និង​អង្គការ​សហប្រតិបត្តិកា​រ​អន្តរជាតិ​អាល្លឺម៉ង (GIZ)៕B/