កម្ពុជា​ចុះ​កិច្ចព្រមព្រៀង​ជា​ដៃគូ​លក់​គម្រោង​ខ្នាត​ធំ​មួយ​របស់​ប្រទេស​ម៉ាឡេស៊ី​

255
ចែករម្លែក
  • 5
    Shares

ដោយ​: ពៅ និមល / ភ្នំពេញ​: តាម​ការគ្រោងទុក​នៅ​ថ្ងៃទី​២៧ ខែកុម្ភៈ ឆ្នាំ​២០១៩ នឹងមាន​រៀបចំ​ពិធី​ចុះ​កិច្ចព្រមព្រៀង​សហការ​ជា​ដៃគូ​មួយ រវាង​ក្រុមហ៊ុន​អចលនវត្ថុ ស៊ី​ភី​អ៊ិ​ល ខេ​ម​បូ​ឌា (CPL Cambodia) និង​គម្រោង​អភិវឌ្ឍ​ខ្នាត​ធំ ឌឹ​ហ្វ​រ​រ៉េ​ស ស៊ី​ធី​(Forest City City) នៅ​ប្រទេស​ម៉ាឡេស៊ី ក្នុងការ​ទទួលបាន​សិទ្ធិ​ចូលរួម​លក់​គម្រោង​នេះ ដែលមាន​ទំហំ​វិនិយោគ​សរុប​របស់​ក្រុមហ៊ុន​ឯកជន​ចិន ចំនួន​១០០​ពាន់​លាន​ដុល្លារ​អាម៉េរិក​ឯណោះ​។​

​លោក ចេង ខេង អគ្គនាយក​ក្រុមហ៊ុន​អចលនទ្រព្យ​កម្ពុជា ស៊ី​ភី​អ៊ិ​ល បាន​មានប្រសាសន៍ប្រាប់​ដល់​ក្រុម​អ្នក​សារ​ព័ត​មាន​នៅមុន​ដំណើរ​ចាកចេញ​កាលពី​រសៀល​ថ្ងៃទី​២៥ ខែកុម្ភៈ​កន្លងទៅ នៅ​ព្រលានយន្តហោះ​អន្តរជាតិ​ភ្នំពេញ​ថា ថ្ងៃនេះ​ក្រុមការងារ​សរុប​ចំនួន​៥០​នាក់ ឆ្ពោះទៅកាន់​ប្រទេស​ម៉ាឡេស៊ី​ក្នុង​គោលបំណង​ចុះ​សិក្សា​ដោយផ្ទាល់ និង​ស្វែងយល់​បន្ថែម​អំពី​ដំណើរការ​នៃ​ការសាងសង់​គម្រោង ជាពិសេស​ប្លង់​មេ ម៉ាស​ស្ទ័​រ ផ្លេ​ន “Master Plan” ភាព​ស៊ីវីល័យ និង​រចនាបទ​នៃ​ស្ថា​ប្យក​ម្ម​របស់​គម្រោង​ទាំងមូល​។ លោក​បន្តទៀតថា ដោយសារ​គម្រោង​នេះ​ធំ និង​ជា​គម្រោង​មួយ​ដែល​ល្អ​ដាច់​គេ​នៅ​តំបន់​អាស៊ី ដែលជា​គម្រោង​សាងសង់​នៅលើ​កោះ​ចំនួន​០៣ អមដោយ​បរិស្ថាន​បែប​ធម្មជាតិ​។

​លោក ចេង ខេង លើកឡើង​បន្តថា ពាក់ព័ន្ធ​នឹង​កិច្ចសហការ​រវាង​កម្ពុ​ជា​និង​ម៉ាឡេស៊ី​លើ​គម្រោង​នេះ​មិនមែន​មានតែ​ប្រទេស​កម្ពុជា​ទេ គឺមាន​ប្រទេស​ជាច្រើន​ផ្សេងទៀត​ចូលរួម​លក់​គម្រោង​នេះ​។ លោក​បន្ថែមថា ក្នុងនាម​ជា​អ្នក​ខាង​អភិវឌ្ឍ​វិស័យ​អចលនវត្ថុ លោក​ពិតជា​ចង់ដឹង​និង​ឃើញ​ពី​គម្រោង​ទាំងនោះ​ថា​ល្អ​កម្រិតណា​ហើយ​មាន​ភាព​ស៊ីវីល័យ​ទាក់ទាញ​របៀប​ម៉េច ដោយ​យើង​ចង់​ធ្វើការ​ស្វែងយល់​បន្ថែម​(​ក្រោយ​ទទួល​ឯកសារ​រួច​ហើយពី​ភាគ​ម៉ាឡេស៊ី​កន្លងមក​) ទើប​យើង​សម្រេច​ចុះ​ពិនិត្យ​ផ្ទាល់​តែម្តង និង​ដឹកនាំ​អ្នកបច្ចេកទេស​មួយចំនួន​ពី​កម្ពុជា ដើម្បី​អាច​ឲ្យ​គាត់​ស្វែងយល់​ដល់ទី​កន្លែង​ទើប​អាច​យកមក​វិភាគ​និង​គិតថា តើ​ត្រូវធ្វើ​យ៉ាងម៉េច​ដើម្បី​ឲ្យ​មាន​លក្ខណៈ​ប្រសើរ​នៅក្នុង​ប្រទេស​។​

​ជាមួយគ្នានេះ លោក សុ​ត វីរៈ អនុប្រធាន​សមាគម​អ្នកវាយតម្លៃ​និង​ភ្នាក់ងារ​អចលនវត្ថុ​កម្ពុជា បាន​ឲ្យ​ដឹងថា គម្រោង​ឌឹ​ហ្វ​រ​រ៉េ​ស ស៊ី​ធី ត្រូវបាន​សាងសង់ឡើង​នៅ​ឆ្នាំ​២០១៤ គ្រោង​បញ្ចា​ប់​នៅ​ឆ្នាំ​២០៤០​។ គម្រោង ឌឹ​ហ្វ​រ​រ៉េ​ស ស៊ី​ធី ជា​គម្រោង​មាន​ទីតាំង​ស្ថិតនៅ​តំបន់ Johor bahru និង​គៀក​ប្រទេស​សឹង្ហ​បុរី ដោយ​អាច​ឲ្យ​ប្រជាជន​រស់នៅ​និង​ធ្វើ​អាជីវកម្ម​ចំនួន​៧០​ម៉ឺន​នាក់ ក្នុងនោះ​មានផ្ទះ​ទំនើប​ស៊ី​វិ​ល័យ​ចំនួន​២៥​ម៉ឺន​យូ​ណី​ត មាន​ហេដ្ឋារចនាសម្ព័ន្ធ​ដ៏​ល្អ​ប្រណិត ហើយ​អ្វីដែល​អស្ចារ្យ​បំផុត​ជាទី​ក្រុង​ដែល​មើលមិនឃើញ​យានយន្ត ព្រោះថា​ផ្លូវ​សំរាប់​យានយន្ត​គ្រប់​ប្រភេទ គឺ​នៅក្រោម​ដី​ទាំងអស់​។ លោក​បញ្ជាក់ថា លើសពីនេះ​ទៀតសោត​រដ្ឋាភិបាល​ម៉ាឡេស៊ី​ផ្តល់​សិទ្ធ​រស់នៅ​សម្រាប់​អ្នក (​ជនជាតិ​បរទេស​)​ទិញ​លំនៅឋាន​ទីនោះ​ដែល​អាចមាន​សិទ្ធិ​រស់នៅ​បាន​ដោយ​ស្របច្បាប់​រហូតដល់​រយៈ​ពេល​១០​ឆ្នាំ​៕ ល​