កម្ពុជា​និង​វៀតណាម​ឯកភាពគ្នា​ផ្តល់​អត្រាពន្ធ​សូន្យ​ភាគរយ​ សម្រាប់​អនុវត្ត​រយៈពេល​ពីរ​ឆ្នាំ​

494
ចែករម្លែក
  • 6
    Shares

ដោយ:ពៅ និមល​/ភ្នំពេញ ៖ នៅ​ទីស្តីការក្រសួង​កាលពី​ថ្ងៃទី​១៣ ខែ​កុ​ម្ភៈ ឆ្នាំ​២០១៩​កន្លងទៅ​លោក ប៉ាន សូរ​ស័ក្តិ រដ្ឋមន្ត្រីក្រសួង​ពាណិជ្ជកម្ម បានអនុញ្ញាតឲ្យ​ប្រតិភូ​ក្រសួង​ឧស្សាហកម្ម​និង​ពាណិជ្ជកម្ម នៃ​សាធារណរដ្ឋ​សង្គមនិយម​វៀតណាម ដឹកនាំ​ដោយ​លោក ដូ វឹក​ហឹ​ង (Do Quoc Hung) ចូលជួប​សម្តែង​ការគួរសម និង​រាយ​ការណ៍​​អំពី​វឌ្ឍនភាព​នៃ​កិច្ចសហប្រតិបត្តិការ​ពា​ណិ​ជ្ជ​កម្ម​ទ្វេភាគី​កម្ពុជា​-​វៀតណាម​។​

ប្រភព​ទទួលបាន​ពី​ក្រសួងពាណិជ្ជកម្ម​បាន​ឲ្យ​ដឹងថា ក្នុងជំនួប​នោះ​លោក ដូ វឹក​ហឹ​ង បាន​ថ្លែងអំណរគុណ​ចំពោះ​ឯកឧត្តម​រដ្ឋមន្ត្រី សម្រាប់​ការផ្តល់​បដិសណ្ឋារកិច្ច និង​បាន​ជម្រាបជូន​អំពី​លទ្ធផល​នៃ​កិច្ចចរចា​ពាណិជ្ជកម្ម​រវាង​ប្រទេស​ទាំងពីរ ដែល​ក្នុងនោះ​ភាគី​វៀតណាម បាន​ឯកភាព​ផ្តល់​ភាពអនុគ្រោះ​ពន្ធ​អត្រា ០% (​សូន្យ​ភាគរយ​) សម្រាប់​​ទំនិញ​កម្ពុជា​ចំនួន​៣២​បន្ទាត់​ពន្ធគយ រួមជាមួយ​កូតា​នាំចូល​អង្ករ​ចំនួន​៣០​ម៉ឺន​តោន និង​សន្លឹក​ថ្នាំជក់​៣,០០០​តោន នៅក្នុង​ឆ្នាំ​២០១៩​និង​ឆ្នាំ​២០២០ រីឯ​ភាគី​កម្ពុជា​បានផ្តល់​ភាពអនុគ្រោះ​ពន្ធ​អត្រា០% (​សូន្យ​ភាគរយ​)​ដូចគ្នា ដល់​ទំនិញ​វៀតណាម​ចំនួន​២៦​បន្ទាត់​ពន្ធគយ​។​

ជាការ​ឆ្លើយតប លោក​រដ្ឋមន្ត្រី ប៉ាន សូរ​ស័ក្តិ បាន​ថ្លែងអំណរគុណ​ចំពោះ​រដ្ឋាភិបាល​វៀតណាម ដែល​បានផ្តល់​ជំនួយឥតសំណង​សម្រាប់​សាងសង់​ផ្សារ​ដា​នៅក្នុង​ខេត្ត​ត្បូងឃ្មុំ និង​បាន​ជម្រាបជូន​ភាគី​ជំនួប​បន្ថែម អំពី​កិច្ចសហប្រតិបត្តិការ​ប្រពៃណី​ក្នុងនាម​ជា​ប្រទេសជិតខាង​ល្អ​។ ទន្ទឹមនេះ​លោក​រដ្ឋមន្ត្រី ក៏បាន​វាយតម្លៃ​ខ្ពស់​ចំពោះ​កិច្ចប្រឹង​ប្រែង​ចរចា​របស់​គណៈប្រតិភូ​មន្ត្រីជាន់ខ្ពស់​នៃ​ប្រទេស​ទាំងពីរ​នាពេល​កន្លងមក ជាពិសេស​ការសម្រេចបាន​នូវ​ឯកសារ ស្តីពី​កិច្ចសម្របសម្រួល​ជំរុញ​ពាណិជ្ជកម្ម​នៅតាម​បន្ទាត់​ព្រំដែន សម្រាប់ធ្វើ​ការចុះហត្ថលេខា​ក្នុងពេល​ឆាប់ៗ​ខាងមុខ​។​

​កាលពី​ឆ្នាំ​២០១៧ ទំហំ​ពាណិជ្ជកម្ម​រវាង​កម្ពុជា​និង​វៀតណាម​សម្រេច​បានគិត​ជា​ទឹក​ប្រាក់​៣,៨​ប៊ី​លាន​ដុល្លារ កើនឡើង​២៩​ភាគរយ ធៀប​នឹង​ឆ្នាំ​២០១៦​។ តាមរយៈ​គម្រោង​វិនិយោគ​ចំនួន​២០៦​គម្រោង ដែលមាន​តម្លៃ​ជា​ទឹកប្រាក់​ប្រមាណ​៣,២​ប៊ី​លាន​ដុល្លារ បាន​​ធ្វើឲ្យ​វៀតណាម​ក្លាយជា​ដៃគូ​វិនិយោគ​ធំ​ទី​៥ របស់​កម្ពុជា ខណៈ​ក្រុមហ៊ុន​របស់​កម្ពុជា​បាន​វិនិយោគ​ត្រឹមតែ​១៨​គម្រោង នៅក្នុង​ប្រទេស​វៀតណាម ដែល​តម្លៃ​ជា​ទឹកប្រាក់ ៥៨,១​លាន​ដុល្លារ​ប៉ុណ្ណោះ​៕B/