កម្ពុជា​សង្ឃឹមថា​ប្រព័ន្ធ​ឌីជីថល​នឹង​ជួយ​ឲ្យ SME កាន់តែ​ងាយស្រួល​ក្នុង​ការជួប​ជាមួយ​អតិថិជន​

1617
ចែករម្លែក

ដោយ​: ពៅ និមល / ភ្នំពេញ​: ស្រប​ពេលដែល​ព្រឹត្តិការណ៍​សប្ដាហ៍​ស្ដីពី​ពាណិជ្ជកម្ម​តាម​អេ​ឡិច​ត្រូ​និ​ច (E-Commerce Week) បានរៀបចំ​ឡើង នៅ​ទីក្រុង​ហ្សឺ​ណែវ ប្រទេស​ស្វី​ស​។

​រដ្ឋមន្ត្រី​ពាណិជ្ជកម្ម​កម្ពុជា​បាន​សង្ឃឹមទុក​ថា ប្រព័ន្ធ​បច្ចេកវិទ្យា​ឌីជីថល នឹង​អាច​បង្ខិត​និង​បង្កើត​ភាពងាយស្រួល​ដល់​សហគ្រាស​ធុន​តូច​និង​មធ្យម (SME) ក្នុង​ការជួប​ជាមួយ​អតិថិជន និង​ធ្វើការ​ផ្សព្វផ្សាយ​លក់ទំនិញ​។​

​នៅក្នុង​ព្រឹត្តិការណ៍​ខាងលើ​ដែល​រៀបចំ​ដោយ​សន្និសីទ​សហប្រជាជាតិ​ស្ដីពី​ពាណិជ្ជកម្ម និង​អភិវឌ្ឍន៍ (UNCTAD) កាលពី​ថ្ងៃទី​១៧ ខែមេសា ឆ្នាំ​២០១៨​កន្លងទៅនេះ​។ វគ្គ​ពិភាក្សា​ដំបូង​គឺ​កិច្ចប្រជុំ តុមូល​ថ្នាក់​រដ្ឋមន្ត្រី ស្ដីពី​ផលប៉ះពាល់​របស់​ប្រព័ន្ធ​ឌីជីថល​ទៅលើ​ការអភិវឌ្ឍ​ដោយ​ចេរភាព (Ministerial Roundtable: Digital Impacts on Sustainable Development) ដោយមាន​ការចូលរួម​ពី​រដ្ឋមន្ត្រី​ពាណិជ្ជកម្ម​មកពី​ប្រទេស​លី​បេ​រី​យ៉ា អូ​ហ្គ​ង់​ដា និង​សេ​ណេ​ហ្គា​ល់​។

​នៅក្នុង​បទ​អន្តរាគមន៍ លោក ប៉ាន សូរ​ស័ក្តិ រដ្ឋមន្ត្រី ក្រសួងពាណិជ្ជកម្ម បាន​សង្កត់ធ្ងន់​លើ​ការប្រើប្រាស់​ប្រព័ន្ធ​ឌីជីថល​ដើម្បី​កាត់បន្ថយ​របាំង​សម្រាប់​ការនាំចេញ ដើម្បី​ឲ្យ​សហគ្រាស​ធុន​តូច និង​មធ្យម អាចមាន​ឱកាស​ចូលរួម​ធ្វើ​ពាណិជ្ជកម្ម​នៅក្នុង​ទីផ្សារ​សកលលោក​បាន​។​លើសពីនេះ​ទៀត ការប្រើប្រាស់​ប្រព័ន្ធ​ឌីជីថល​ដែលមាន​ភាពទូលំទូលាយ នឹង​ជំរុញ​ឲ្យ​មានគំនិត​ច្នៃប្រឌិត និង​ន​វា​នុ​វត្ត​ថ្មីៗ​សម្រាប់ធ្វើ​ពាណិជ្ជកម្ម បង្កើន​សហគ្រិនភាព និង​បង្កើត​ការងារ​សម្រាប់​ស្ត្រី យុវជន និង​អ្នកជំនួញ​ដទៃទៀត​ដូចជា​ប្រជាពលរដ្ឋ​នៅតាម​ជនបទ​ជាដើម​។

​លោក​រដ្ឋមន្ត្រី​បានបញ្ចប់​បទ​អន្តរាគមន៍​ដោយ​គូសបញ្ជាក់ថា ទោះបីជា​ប្រព័ន្ធ​ឌីជីថល​មាន​ផលប្រយោជន៍​ច្រើន​ក៏ពិតមែន បញ្ហា​ប្រឈម​ទាំងឡាយ ដូចជា​កង្វះខាត​ចំណេះដឹង​លើ​ប្រព័ន្ធ​ព័ត៌មានវិទ្យា ហេដ្ឋារចនាសម្ព័ន្ធ​ទាំង​ផ្នែក​រឹង និង​ទន់​លិខិតបទដ្ឋាន​គតិយុត្តិ​ត្រូវតែ​ដោះស្រាយ​ឲ្យ​បាន​រួចរាល់ មុននឹង​អាច​ទាញយក​ផលប្រយោជន៍​នេះ​បាន ហើយ​លោក​ក៏បាន​អំពាវនាវ​បន្ថែមទៀត​ទៅកាន់​សហគម​ន៍​ដៃគូ​អភិវឌ្ឍ ដើម្បី​ជួយ​កម្ពុជា​ក្នុង​ការងារ​នេះ​ផងដែរ​៕ ល​