កម្មករ​រោងចក្រ​កាត់ដេរ​បង់​ក្លា​ដែ​ស​ប៉ះទង្គិច​ជាមួយ​ប៉ូលិស ខណៈ​កូដកម្ម​ផ្ទុះឡើង

492
ចែករម្លែក
  • 17
    Shares

​កម្មករ​កាត់ដេរ​បង់​ក្លា​ដែ​ស​រាប់ពាន់នាក់ ដែល​ដេរ​សម្លៀកបំពាក់​សម្រាប់​ក្រុមហ៊ុន​ម៉ាក​ល្បីៗ​នៅ​ទូទាំង​ពិភពលោក បាន​ដើរ​ចេញពី​ការងារ​កាលពី​ថ្ងៃអាទិត្យ​ទី​១៣​មករា​ហើយ​បាន​ប៉ះទង្គិច​ជាមួយ​ប៉ូលិស ខណៈដែល​ការតវ៉ា​ប្រឆាំងនឹង​ប្រាក់​ឈ្នួល​ទាប​ឈានចូល​សប្តាហ៍​ទី​ពីរ​។​

​ប៉ូលិស​បាន​និយាយថា ការបាញ់​ទឹក​និង​ឧស្ម័ន​បង្ហូរទឹកភ្នែក​ត្រូវបាន​ប្រើ​ដើម្បី​បំបែកហ្វូង​កម្មករ​រោងចក្រ​ដ៏​ច្រើន​កុះករ​នៅ​ទីក្រុង​សាវ៉ា (Savar) ដែលជា​មជ្ឈមណ្ឌល​សម្លៀក​បំពាក់​មួយ​នៅ​ខាងក្រៅ​រដ្ឋធានី​ដា​ក្កា​។​

​លោក សា​ណា សាមី​នួ រ៉ា​ម៉ាន់ នាយប៉ូលិស​ឧស្សាហកម្ម​បាន​ប្រាប់​ទីភ្នាក់ងារសារព័ត៌មាន AFP អំពី​សកម្មភាព​ធ្វើ​កូដកម្ម​កាលពី​ថ្ងៃអាទិត្យ​ថា “​កម្មករ​បាន​បិទផ្លូវ​ហាយវ៉េ យើង​ត្រូវ​បណ្តេញ​ពួកគេ​ចេញ​ដើម្បី​សម្រួល​ស្ថានភាព​ចរាចរណ៍​។ រហូតមកទល់​ពេលនេះ រោងចក្រ​ចំនួន ៥២ រួមទាំង​រោងចក្រ​ធំៗ​មួយចំនួន បាន​បិទ​ប្រតិបត្តិការ​ដោយសារតែ​ការតវ៉ា​នេះ​”​។​

​កម្មករ​ម្នាក់​ត្រូវបាន​សម្លាប់​កាលពី​ថ្ងៃ​អង្គារ​សប្តាហ៍​មុន បន្ទាប់ពី​ប៉ូលិស​បាន​បាញ់​គ្រាប់កាំភ្លើង​ជ័រ​និង​ឧស្ម័ន​បង្ហូរទឹកភ្នែក​ទៅលើ​កម្មករ​តវ៉ា​ប្រមាណ ៥.០០០ នាក់​។​

​ប្រទេស​បង់​ក្លា​ដែ​ស​ពឹង​ផ្អែកលើ​សម្លៀកបំពាក់​ដែល​កាត់ដេរ​ដោយ​កម្មករ​ដែល​ទទួល​បាន​ប្រាក់​ឈ្នួល​ទាប​រាប់លាន​នាក់​នៅតាម​រោងចក្រ​នានា​នៅ​ទូទាំងប្រទេស​អាស៊ី​ខាងត្បូង​ដែលមាន​ចំនួន ១៦៥ លាន​នាក់​នេះ​។​

​ប្រហែល ៨០ ភាគរយ​នៃ​ប្រាក់ចំណូល​ពី​ការនាំចេញរ​បស់បង់​ក្លា​ដែ​សគឺ​បានមកពី​ការលក់​សម្លៀកបំពាក់​នៅ​ក្រៅប្រទេស ជាមួយ​ក្រុមហ៊ុន​លក់រាយ​សកល​ដូចជា H&M, Primark, Walmart, Tesco និង Aldi គឺ​ស្ថិត​ក្នុងចំណោម​អ្នកទិញ​សំខាន់ៗ​។​

​មេដឹកនាំ​សហជីព​លោក អា​មី​នុ​ល អ៊ីស្លាម (Aminul Islam) បាន​ស្តីបន្ទោស​ម្ចាស់​រោងចក្រ​ថា​បាន​ប្រើ​អំពើហិង្សា​ដើម្បី​ត្រួតត្រា​កម្មករ​ណា​ដែល​ធ្វើ​កូដកម្ម​។​

​លោក​បាន​ប្រាប់ AFP ថា “​ប៉ុន្តែ​ពួកកម្មករ​មាន​សាមគ្គីភាព​ច្រើនជាង​មុន​។ វា​ហាក់ដូចជា​ពួកគេ​នឹងមិន​ចាក​ចេញពី​ដងផ្លូវ​ទេ​រហូតដល់​ការទាមទារ​របស់​ពួកគេ​ត្រូវបាន​ឆ្លើយតប​”៕ ដោយ៖ កញ្ញាដាលីស

កម្មករ​រោងចក្រ​កាត់ដេរ​បិទផ្លូវ​នៅ​ទីក្រុង​ដា​ក្កា​ដើម្បី​ទាមទារ​ដំឡើង​ប្រាក់ខែ