កសិករ​មាន​កម្លាំងចិត្ត​ដាំ​ដំណាំ​ល្ពៅ​ដោយមាន​តម្លៃ​ខ្ពស់​នៅលើ​ទីផ្សារ​

545
ចែករម្លែក

​ដោយៈ​សៅ​វ៉ាន់ឌី​/​ព្រះ​វិហារៈ​នៅ​ខេត្តព្រះវិហារ​ប្រជាកសិករ​មួយចំនួន​មាន​កម្លាំងចិត្ត​ក្នុង​ការដាំ​ដំណាំ​ល្ពៅ​ដោយ​ផ្លែ​ល្ពៅ​មានតម្លៃ​ខ្ពស់​នៅលើ​ទីផ្សារ​ក្នុងស្រុក​ក៏​ដូច​នាំ​ចេញទៅ​ក្រៅប្រទេស​ជិតខាង​។​

​លោក​ពឹង​ទ្រី​ដា​ប្រធាន​មន្ទីរ​កសិកម្ម​រុក្ខាប្រមាញ់​និង​នេសាទ​ខេត្តព្រះវិហារ​បានឱ្យដឹង​នៅ​ព្រឹក​ថ្ងៃទី​១៩ ខែមិថុនា​ឆ្នាំ​២០១៩​នេះ​ថា​ដោយសារតែ​មានការ​ប្រកួត​ប្រជែង​ទីផ្សារ​ក្នុងស្រុក​និង​ក្រៅ​ស្រុក​ទៅលើ​ដំណាំ​ល្ពៅ​ទើប​ធ្វើឱ្យ​ដំណាំ​ល្ពៅ​របស់​កសិករ​ក្នុង​ខេត្តព្រះវិហារ​នៅតែមាន​តម្លៃ​ខ្ពស់​គឺ​មួយ​គីឡូក្រាម​មានតម្លៃ​២.៥០០​រៀល​។​

លោក ពឹង ទ្រី​ដា​បាន​បន្តថា ដំណាំ​ផ្លែ​ល្ពៅ​របស់​ប្រជាកសិករ នៅ​ខេត្តព្រះវិហារ​ត្រូវបាន​ឈ្មួញកណ្តាល ចុះ​ប្រមូល​ទិញ​ដល់​ចម្ការ​តែម្តង​មានតម្លៃ​២.៥០០​រៀល​ក្នុង​មួយ​គីឡូក្រាម​បើ​ប្រៀបធៀប​ទៅ​បណ្តា​ឆ្នាំ​កន្លងទៅ គឺមាន​តម្លៃ​ខ្ពស់​ហើយ​ទិន្នផល​ក៏បាន​ច្រើន​ដែរ​។​គឺ​១​ហិកតា​ទទួលបាន​ទិន្នផល​២០.០០០​តោន ទៅ​២៥.០០០​តោន​។​

លោក​ពឹង​ទ្រី​ដា​បាន​បន្តថា​ផ្លែ​ល្ពៅ​របស់​កសិករ​ខេត្តព្រះវិហារ​ត្រូវបាន​ឈ្មួញ​នាំទៅ​លក់​នៅឯ​ក្រុងភ្នំពេញ​និង​មួយផ្នែក​ទៀត​នាំយកទៅ​លក់​នៅ​ប្រទេស​ថៃ​។​ដោយសារ​ប្រទេស​ថៃ​គេ​យក​ផ្លែ​ល្ពៅ​ទៅ​ចូលក្នុង​រោងចក្រ​ឧស្សាហកម្ម​កែច្នៃ​ទៅជា​ផលិតផល​ផ្សេងៗ​។​កត្តា​ដែល​ធ្វើឱ្យ​តម្លៃ​ផ្លែ​ល្ពៅ​របស់​ប្រជាកសិករ នៅ​ខេត្តព្រះវិហារ​មានតម្លៃ​ខ្ពស់​។​

​ដោយសារ​មាន​ឈ្មួញកណ្តាល ចុះ​ប្រមូល​ទិញ​ច្រើន ទើប​ធ្វើឱ្យមាន​ការប្រកួតប្រជែង​តម្លៃ​ទីផ្សារ​ក្នុង និង​ក្រៅ​ស្រុក ធ្វើឱ្យ​ដំណាំ​ល្ពៅ​មានតម្លៃ​ខ្ពស់​។ ឯ​កសិករ​អ្នក​ដាំ​ដុះ​ក៏​ទទួលផល​ចំណេញ​ច្រើន​ដែរ​។​

លោក​បញ្ជាក់ទៀតថា ផ្ទៃដី​ដាំ​ដំណាំ​ល្ពៅ​ក្នុង​ខេត្តព្រះវិហារ មាន​ប្រមាណ​២.០០០​ហិកតា ហើយ​កសិករ​ដាំ​ដំណាំ​ល្ពៅ​នៅ​ក្រុង​ព្រះវិហារ មាននៅ​ស្រុក​សង្គម​ថ្មី និង​ស្រុក​គូលែន​៕S/​