ការចាក់​បញ្ចាំង​ខ្សែភាពយន្ត​រឿង មុនដំបូង​ខ្មែរក្រហម​សម្លាប់​ប៉ា​របស់ខ្ញុំ នៅ​រោងភាពយន្ត​ក្នុងប្រទេស​កម្ពុជា​

468

(​ភ្នំពេញ​)៖ ខ្សែភាពយន្ត​រឿង មុនដំបូង​ខ្មែរក្រហម​សម្លាប់​ប៉ា​របស់ខ្ញុំ (First They Killed My Father) ជា​ភាសា​ខ្មែរ​ដែល​បាន​​ផលិតឡើង​ដោយ​ក្រុមហ៊ុន Netflix នឹង​ចាក់​បញ្ចាំង​នៅតាម​រោងភាពយន្ត​ក្នុងប្រទេស​កម្ពុជា នៅ​ថ្ងៃទី​៨ ខែកញ្ញា ឆ្នាំ​២០១៧​ដែល​​ត្រូវបាន​នាំចូល​ផ្តាច់មុខ​ដោយ​ក្រុមហ៊ុន Westec Media Limited​មុននឹង​ចាក់​បញ្ចាំង​ខ្សែភាពយន្ត​នេះ​ទូទាំង​ពិភពលោក​​ដោយ​ក្រុមហ៊ុន Netflix នៅ​ថ្ងៃទី ១៥ ខែកញ្ញា​ខាងមុខនេះ​។

​ក្រោម​ការដឹកនាំ​ដោយ លោកស្រី Angelina Jolie ខ្សែភាពយន្ត​រឿង «​មុនដំបូង ខ្មែរក្រហម​សម្លាប់​ប៉ា​របស់ខ្ញុំ​» គឺជា​ខ្សែភាពយន្ត​ប្រែ​សម្រួល​ចេញពី​ការចងចាំ​ដ៏​ឈឺចាប់​របស់​អ្នកស្រី អ៊ឹង លួង ដែលជា​អ្នកនិពន្ធ​សៀវភៅ និង​សកម្មជន​ការពារ​សិទ្ធិមនុស្ស ដែល​បាន​រួចផុតជីវិត​ពីរ​បប​ខ្មែរក្រហម​ដ៏​សាហាវយង់ឃ្នង​ពី​ឆ្នាំ ១៩៧៥ ដល់ ឆ្នាំ​១៩៧៩​។ ​សាច់រឿង​ត្រូវបាន​រៀបរាប់​តាម​ការមើលឃើញ​របស់​អ្នកស្រី​តាំងពី អាយុ​៥​ឆ្នាំ នៅពេលដែល​ខ្មែរក្រហម​ឡើងកាន់​អំណាច រហូតដល់​គាត់​អាយុ​៩​ឆ្នាំ​។ ខ្សែភាពយន្ត​នេះ​ឆ្លុះបញ្ចាំង​អំពី​ស្មារតី​យ៉ាង​មោះមុត និង ការតស៊ូ​យ៉ាង​ប្តូរផ្តាច់​របស់​គ្រួសារ​អ្នកស្រី ដើម្បី​បានរស់នៅ​ជាមួយគ្នា​យ៉ាង​វេទនា​អំឡុង​សម័យ​ខ្មែរក្រហម​។​

​ខ្សែភាពយន្ត​រឿងនេះ​ឧទ្ទិស​ដល់​អ្នក​ដែល​បាន​ស្លាប់ និង​អ្នក​ដែល​បាន​រួច​ផុតពី​ការស្លាប់​ក្រោម​របប​ខ្មែរក្រហម​។ វា​ផ្តោត​សំខាន់​លើ​សេចក្ដីស្រឡាញ់​និង​ការលះបង់​របស់​ក្រុមគ្រួសារ​ខ្មែរ និង​ឆ្លុះបញ្ចាំង​ពី​ភាពស្រស់ស្អាត ដួងវិញ្ញាណ និង​ស្មារតី​រឹងមាំ​របស់​ប្រជាជន​ខ្មែរ និង​វប្បធម៌​ខ្មែរ​។​

​ខ្សែភាពយន្ត​រឿង មុនដំបូង​ខ្មែរក្រហម​សម្លាប់​ប៉ា​របស់ខ្ញុំ បាន​ចាក់​បញ្ចាំង​ជា​ផ្លូវការ​នៅ​ថ្ងៃទី ១៨ ខែ​កម្ភៈ​កន្លងមក នៅ​លានជល់ដំរី​នៅ​បរិវេណ​ប្រាសាទអង្គរវត្ត​នៅក្នុង​ខេត្តសៀមរាប ប្រទេស​កម្ពុជា​ក្រោម​វត្តមាន​ព្រះរាជធិបតីភាព​ដ៏​ខ្ពង់ខ្ពស់​បំផុត​នៃ​ព្រះករុណា ព្រះបាទ​សម្តេចព្រះ​នរោត្តម សីហមុនី ព្រះមហាក្សត្រ នៃ​ព្រះរាជាណាចក្រ​កម្ពុជា និង​សម្តេចព្រះ​មហាក្សត្រី ព្រះវររាជ​មាតា​ជាតិខ្មែរ នរោត្តម មុនីនាថ សីហនុ ហើយ​និង​មានការ​អញ្ជើញ​ចូលរួម​ពី​មន្ត្រី និង​ឥស្សរជន​សំខាន់ អ្នកតំណាង​មកពី​សង្គម​កម្ពុជា ដោយ​ផ្តល់​អាទិភាព​ដល់​អ្នក​រស់រាន​មានជីវិត​ពីរ​បប​ខ្មែរក្រហម​ក៏ដូចជា​អ្នកជំនាញ​ផ្នែក​ប្រវត្តិសាស្ត្រ​និង​អង្គ​ការអប់រំ​ប្រវត្តិសាស្ត្រ​នៅក្នុង​តំបន់​។​

​ខ្សែភាពយន្ត​នេះ​ត្រូវបាន​ថត​ក្នុង​ទីតាំង​ប្រទេស​កម្ពុជា​ចាប់ពី​ខែវិច្ឆិកា ឆ្នាំ ២០១៥ រហូតដល់​ខែកុម្ភៈ ឆ្នាំ ២០១៦​។ ខ្សែភាពយន្ត​នេះ​បាន​ថត​ជា​ភាសា​ខ្មែរ​ទាំងស្រុង ហើយ​ជា​ខ្សែភាពយន្ត​ខ្នាត​ធំជាងគេ​ដែល​មិន​ធ្លាប់បាន​ផលិតឡើង​ក្នុងប្រទេស​នេះ​។ អ្នកបច្ចេកទេស សិប្បករ និង​អ្នកជំនាញ​ផ្នែក​សិល្បៈ​ជា​ជនជាតិខ្មែរ​បាន​ចូលរួម​យ៉ាងច្រើន​បំផុត​ក្នុង​ក្រុមការងារ​ថត​ខ្សែភាពយន្ត​នេះ រួមជាមួយ​តួអង្គ​សម្តែង​តូចតាច​ចំនួន​ជាង 3500 នាក់​។

​តួ​សម្ដែង​ក្នុង​ខ្សែភាពយន្ត​នេះ​សុទ្ធសឹងតែ​ជាតា​រា​តួ​សម្តែង​ខ្មែរ​ភាគច្រើន​ដែល​បាន​លេចមុខ​ក្នុង​ខ្សែភាពយន្ត​នេះ​ជា​លើកដំបូង​។ ស្រី​ម៉ុ​ច សារឿ​ម ដែល​បាន​ដើរតួ​អង្គ​សំខាន់​របស់​អ្នកស្រី អ៊ឹង លួង ដែលមាន​អាយុ​ពី​ប្រាំ​ទៅ​ប្រាំបួន​ឆ្នាំ ហើយ​និង​លាតត្រដាង​ពី​ទិដ្ឋភាព​នៃ​រឿងនេះ​ដែល​ស្ថិតនៅក្នុង​សាលារៀន​អង្គការ​មនុស្សធម៌​មួយ​ក្នុង​តំបន់​។ តួអង្គ​ឪពុកម្តាយ​របស់​អ្នកស្រី អ៊ឹង លួង ត្រូវបាន​សម្តែង​ដោយ​លោក​ភឿង កុម្ភៈ និង​អ្នកនាង ស្វែង សុជាតា​។ បងប្អូន​របស់​អ្នកស្រី អ៊ឹង លួង ត្រូវបាន​សម្តែង​ដោយ​នី​តា និង​នី​កា​សារុន (​ហៅ​ហ្គិ​ច​) រុន ចិន្តា (​ជូ​) មុន គឹម​ហាក់ (​គឹម​) អូន ស្រី​នាង (​គាវ​) ឃួន​សុធា (​គួ​យ​) និង​ហេង តារា (​ម៉េង​) ។​

​ខ្សែភាពយន្ត​រឿង «​មុនដំបូង ខ្មែរក្រហម​សម្លាប់​ប៉ា​របស់ខ្ញុំ​» គឺជា​ខ្សែភាពយន្ត​ដើម​របស់​ក្រុមហ៊ុន Netflix Inc ដែល​ផលិត​ដោយ​អ្នកស្រី អែន​ជឺ​លី​ណា ជោ​លី លោក ប៉ាន់​រិទ្ធី ជា​អ្នកដឹកនាំ​រឿង និង​ផលិតករ​ខ្សែភាពយន្ត​ខ្មែរ​ដ៏​ល្បីល្បាញ ដែល​បាន​ដឹកនាំ​រឿង «​ការបាត់បង់​រូបភាព​» ដែល​ភាសា​អង់គ្លេស​ហៅថា «the missing picture» បាន​ជាប់​ឈ្មោះ​ជា​បេក្ខជន​ក្នុងការ​ប្រកួតប្រជែង​វគ្គ​ផ្តាច់ព្រ័ត្រ​ដណ្តើមពាន​រង្វាន់​អូ​ស្កា និង​លោក Michael Vieira ផលិតករ​ខ្សែភាពយន្ត​ល្បីល្បាញ​នៃ​រឿង (By the Sea) ។ លោក Xavier Box (​រឿង​Umrika) និង​អ្នកស្រី Patricia Rommel (​រឿង The Lives of Others) គឺជា​អ្នក​កាត់​តនៃ​ខ្សែភាពយន្ត​នេះ​។

​អ្នកស្រី អ៊ឹង លួង , Maddox Jolie-Pitt , Adam Somner (​រឿង Bridge of Spies) និង Charles Schissel (​រឿង The Prestige) គឺជា​ផលិតករ​ប្រតិបត្តិ​នៃ​ខ្សែភាពយន្ត​នេះ​។ លោក Anthony Dod Mantle ជា​អ្នកដឹកនាំ​រឿង​ដែល​បានឈ្នះ​ពានរង្វាន់ Academy Award (​រឿង Slumdog Millionaire) គឺជា​អ្នកដឹកនាំ​ផ្នែក​ថតរូប​។

​លោកអ្នក​អាច​កក់​សំបុត្រ​ដោយផ្ទាល់ ឬ​តាម​អន​ឡាញ តាម​ម៉ោង​បញ្ចាំងភាពយន្ត​នេះ ដែល​អ្នក​អាច​ជ្រើសរើស​នៅលើ​គេហទំព័រ​ដូចខាងក្រោម​៖

http://cinema.org.kh
http://legend.com.kh
http://www.majorcineplex.com.kh/cinema/
http://primecineplex.com
https://barayandetcinema.com/