ការពង្រឹង​ភាពជា​ម្ចាស់​និង​ភាពជា​ដៃគូ (strengthening ownership and partnership)

3411
ចែករម្លែក

(​ភ្នំពេញ​)៖ ខ្ញុំ​សូម​លើកយក ឧទាហរណ៍​ជាក់ស្តែង​មួយ​នៃ​ការ ពង្រឹង​ភាពជា​ម្ចាស់ និង​ភាពជា​ដៃគូ​នៃ គម្រោង​សុនខ​ហិត​មីន​នៃ​អង្គភាព ស៊ីម៉ាក់​។ គម្រោង​សុនខ​ហិត​មីន​នេះ គាំទ្រ ដោយ​រដ្ឋាភិបាល​ស៊ុយ​អ៊ែត តាម រយៈ​ភ្នាក់ងារ​អភិវឌ្ឍន៍​អន្តរជាតិ ស៊ុយ​អ៊ែត (SIDA) និង​ក្រសួង​ការពារ ជាតិ​ស៊ុយ​អ៊ែត​ជា​អ្នក​អនុវត្តន៍​គម្រោង ចាប់ផ្តើម​នៅ​ឆ្នាំ​១៩៩៧​។
​ ​
​នៅ​ឆ្នាំ​២០០២ ខ្ញុំ​ត្រូវ​ទៅ​ក្រុង ស្តុក​ហូ​ម នៃ​ប្រទេស​ស៊ុយ​អ៊ែត ដើម្បី​ទទួល​ការបញ្ចប់​គម្រោង ជំនួយ​ពី កងទ័ព​ស៊ុយ​អ៊ែត ដែល​ពេលនោះ មាន​សុនខ​ចំនួន​២៤​ក្បាល យើង​ពិតជា​ព្រួយបារម្ភ បំផុត​អំពី​អនាគត​នៃ គម្រោង ព្រោះ​គម្រោង​សុនខ​នេះ​យើង​ពឹង​ផ្អែកលើ​ភាគី​ស៊ុយ​អ៊ែត ទាំងស្រុង ទាំង​ជំនួយ​ថវិកា ទាំង​ជំនួយ​បច្ចេកទេស និង​ទាំង​ការគ្រប់គ្រង​គម្រោង​សុនខ​។ គម្រោង​ដោះមីន​មនុស្សធម៌​ដោយ​សុនខ អាចជា​លើក​ទី​១​លើ​ពិភពលោក​នេះ​! ។ ពេលនោះ​ខ្ញុំ​សុំ​ខាង​ភាគី​ស៊ុយ​អ៊ែត និង ន័​រ​វែ​ស​ជួយ​មួយ​រយៈពេល​ខ្លី​តាម ទម្រង់​ថ្មី ដើម្បី​កសាង​សមត្ថភាព​ធនធាន មនុស្ស និង​បច្ចេកទេស​ដោយ​ម្ចាស់ការ ខ្លួនឯង​។ ជាមួយ​ទស្សនវិស័យ​វែង ឆ្ងាយ​ច្បាស់លាស់ និង​ពង្រឹង​ភាពជា ម្ចាស់​ទាំង​លើ​ស្ថានភាព​ថវិកា បច្ចេកទេស និង​ការគ្រប់គ្រង​! ។ ឥឡូវនេះ គម្រោង​សុនខ​រឹងមាំ លែង​ដកដង្ហើម តាម​ច្រមុះ​អ្នកដទៃ​ហើយ​។ យើង​មាន សមត្ថភាព​បង្កាត់​សុនខ ហ្វឹកហ្វឺន និង ប្រតិបត្តិការ​ដោយ​កូន​ខ្មែរ​១០០​ភាគ រយ​។ កូន​ខ្មែរ​អាចធ្វើ​បាន​។ សរុប​ខ្លី បើ​គ្មាន​ស្មារតី​ពង្រឹង​ភាពជា​ម្ចាស់​ទេ ហើយ​ពឹង​តែ​លើ​បរទេស​ទាំងស្រុង​នោះ ប្រហែលជា​គម្រោង​សុនខ​ហិត​មីន រលាយ​រលត់​បាត់ស្រមោល​ពី​កម្ពុជា​ទៅ ហើយ​។​
​ ​
​បញ្ហា EBA៖ ការពង្រឹង​ភាព ជា​ម្ចាស់​លើ​សមត្ថភាព​ប្រកួតប្រជែង លើ​ទីផ្សារ​អន្តរជាតិ ជាពិសេស​ទីផ្សារ នៅ​តំបន់​អាស៊ាន ឥណ្ឌា ចិន រុស្ស៊ី បស្ចិម​បូព៌ា អាម៉េរិក​ឡាទីន អាម៉េរិក និង អឺរ៉ុប​។ យើង​អាច​បាត់បង់ EBA តែ​អាច មិន​បាត់បង់​ទីផ្សារ​ទាំងស្រុង​នោះទេ​!​។ ពេល​ជួប​ឧបសគ្គ​នេះ ក្រុមហ៊ុន​អាច ពង្រឹងសមត្ថភាព​ប្រកួតប្រជែង​ដោយ គ្មាន EBA​។ អាច​ផ្លាស់ប្តូរ​ជំនាញ ផលិតកម្ម រាជរដ្ឋាភិបាល​អាច​ផ្តល់​លទ្ធភាព​ជូន​ក្រុមហ៊ុន​ជាមួយ លក្ខខណ្ឌ អនុគ្រោះ​មួយចំនួន ដើម្បី​ទ្រទ្រង់​សភាពការណ៍​នេះ​! បញ្ហា​បាត់បង់​EBA​នេះ​មិន អាច​គេច​រួច​ទេ គ្រាន់តែ​ជា​បញ្ហា​យូរ និង ឆាប់​ប៉ុណ្ណោះ វា​នឹង​មកដល់​។ EBA មិន​មែនមាន​ផលប្រយោជន៍​តែ​ប្រទេស ទទួល EBA ប៉ុណ្ណោះ​ទេ ប្រជាជន​អឺរ៉ុប ខ្លួនឯង​ក៏​ទទួលបាន​ពី EBA ខ្លះ​ផងដែរ ។ គ្រាន់តែ​តិច និង​ច្រើន​ប៉ុណ្ណោះ ព្រោះថា មូលដ្ឋាន​ពាណិជ្ជកម្ម​ទិញ​ថោក អាច​លក់ ថោក បើ​ទិញ​ថ្លៃ វា​ត្រូវតែ​លក់​ថ្លៃ​ដែរ ហើយ​។​
​ ​
​តែ​អ្វី​គួរឱ្យ​សោកស្តាយ​បំផុត សម្រាប់​ប្រជាជន​កម្ពុជា គឺថា ជនជាតិ​ដទៃ​គេ​ធ្វើសង្គ្រាម ពាណិជ្ជកម្ម​ដើម្បី ការពារ​ផលប្រយោជន៍​សេដ្ឋកិច្ច ប្រទេស និង​ប្រជាជន​របស់គេ​។ រីឯ​ពួក ខ្មែរ​ខ្លះ​ខិតខំ​សួនតួ​អង្វរ​បរទេស​ធ្វើ សង្គ្រាម​ពាណិជ្ជកម្ម​ប្រឆាំង​ផល ប្រយោជន៍​សេដ្ឋកិច្ចជាតិ និង​ប្រជាជន ឯង​។ យក​ផលប្រយោជន៍​ប្រជាជន ក្រីក្រ​ដើម្បី​បម្រើ​មហិច្ឆតា​ដណ្តើម អំណាច​ផ្ទាល់ខ្លួន​។ គោលដៅ​ចុង ក្រោយ​របស់​ពួកក្បត់​នេះ គឺ​ចង់ឃើញ​ប្រទេសជាតិ​មាន វិបត្តិ​សេដ្ឋកិច្ច ប្រជាជន គ្មាន​ការងារ​ធ្វើ​មាន​ចលាចល​សង្គម និង​ឈានដល់​កើត​វិបត្តិ សង្គ្រាមស៊ីវិល​ជាថ្មី ។ ខុស​ហើយ​ខុស​ទៀត ក្បត់ជាតិ​មួយ ករណី​ហើយ​មួយ​ករណី​ទៀត ៕ ដោយ​: លោក ហេង រតនា អគ្គនាយក​ស៊ីម៉ាក់​