កិច្ចប្រជុំ​ថ្នាក់​រដ្ឋមន្ត្រី​សេដ្ឋកិច្ច​អាស៊ាន​នៅ​សិង្ហ​បុរី បានបញ្ចប់​ដោយ​ភាពល្អប្រសើរ​ច្រើន​

983
ចែករម្លែក

ដោយ​: ពៅ និមល / ភ្នំពេញ​: កិច្ច​ពិគ្រោះ​យោបល់​រដ្ឋមន្ត្រី​សេដ្ឋកិច្ច​អាស៊ាន និង​ដៃគូ​ក្នុងអំឡុង​កិច្ចប្រជុំ​រដ្ឋមន្ត្រី​សេដ្ឋកិច្ច​អាស៊ាន​លើក​ទី​៥០ និង​កិច្ចប្រជុំ​ពាក់ព័ន្ធ​នៅ​រដ្ឋធានី​សិង្ហ​បុរី បានបញ្ចប់​ដោយ​ជោគជ័យ​។ មន្ត្រីជាន់ខ្ពស់​នៃ​រាជរដ្ឋាភិបាល​កម្ពុជា​បាន​ឲ្យ​ដឹងថា កិច្ចប្រជុំ​នោះ​បញ្ចប់​ទៅដោយ​លទ្ធផល​ល្អប្រសើរ​សម្រាប់​ប្រទេស​ក្នុង​តំបន់​អាស៊ាន ក្នុងនោះ​រួមទាំង​ប្រទេស​កម្ពុជា​ផងដែរ​។​

​ប្រភព​ទទួលបាន​ពី​ក្រសួងពាណិជ្ជកម្ម​កាលពី​រសៀល​ថ្ងៃទី​៣១ ខែសីហា ឆ្នាំ​២០១៨​បានបញ្ជាក់​ទៀតថា កិច្ចប្រជុំ​នេះ​មានការ​អ​ញ្ញើញ​ចួ​ល​រួម​ពី​សំណាក់​រដ្ឋមន្ត្រី​សេដ្ឋកិច្ច និង​គណៈប្រតិភូ​របស់​ប្រទេស​សមាជិក​អាស៊ាន រដ្ឋមន្ត្រី​និង​គណៈប្រតិភូ​នៃ​ប្រទេស​ជា​ដៃគូ អគ្គលេខាធិការ​អាស៊ាន និង​តំណាង​លេខាធិការដ្ឋាន​អាស៊ាន ដឹកនាំ​ដោយ​លោក ចាន់ ជូន​ស៊ី​ង (CHAN CHUN SING) រដ្ឋមន្ត្រី​ពាណិជ្ជកម្ម និង​ឧស្សាហកម្ម នៃ​សាធារណរដ្ឋ​សិង្ហ​បុរី ដោយ​ទទួលបាន​លទ្ធផល​សំខាន់ៗ​ដូចជា រដ្ឋមន្ត្រី​សេដ្ឋកិច្ច​មេគង្គ (​កម្ពុជា ឡាវ មី​យ៉ាន់​ម៉ា វៀតណាម ថៃ​) និង​ជប៉ុន បាន​វាយតម្លៃ​ខ្ពស់​ចំពោះ​កិច្ចសហប្រតិបត្តិការ​ក្រោម​ក្របខ័ណ្ឌ​មេគង្គ​-​ជប៉ុន​ជាពិសេស​លើ​ការអនុវត្ត​គម្រោង និង​ទស្សនវិស័យ​អភិវឌ្ឍន៍​ឧស្សាហកម្ម​មេគង្គ​-​ជប៉ុន និង​ការធ្វើ​ឲ្យ​កាន់តែ​ស៊ីជម្រៅ​ក្នុង​ក្រប ខ័​ណ្ឌ​អនុតំបន់​មេគង្គ​។​

​លោក ប៉ាន សូរ​ស័ក្ដិ រដ្ឋមន្ត្រីក្រសួង​ពាណិជ្ជកម្ម​បានលើកឡើង​ក្នុង​សេចក្តីប្រកាស​ព័ត​មាន​ថា ក្នុង​កិច្ចប្រជុំ​នោះ ក៏បាន​អនុម័ត​លើ​ផែនការ​សកម្មភាព​កិច្ចសហប្រតិបត្តិការ​សេដ្ឋកិច្ច​អាស៊ាន​បូក​បី ២០១៩-២០២០ ដែល​រួមបញ្ចូល​នូវ​សកម្មភាព​សំខាន់​ជាច្រើន ដូចជា​សកម្មភាព​ស្រាវជ្រាវ​រួម ការអភិវឌ្ឍ​សហគ្រាស​ធុន​តូច​និង​មធ្យម កិច្ច​សម្រួល​ពាណិជ្ជកម្ម កិច្ចសន្ទនា​រវាង​រដ្ឋ និង​វិស័យ​ឯកជន និង​ការអភិវឌ្ឍ​សេដ្ឋកិច្ច​ឌីជីថល​។ ដោយឡែក កិច្ចប្រជុំ​រដ្ឋមន្ត្រី នៃ​កិច្ចព្រមព្រៀង​ភាពជា​ដៃគូ​សេដ្ឋកិច្ច​ទូលំទូលាយ​តំបន់​លើក​ទី​៦ ក៏បាន​ពិភាក្សា​លើ​បញ្ហា​នៅ​សេសសល់​មួយចំនួន​ដែល​ត្រូវការ​ការសម្រេច និង​ការណែនាំ​ពី​ថ្នាក់​រដ្ឋមន្ត្រី​ដែល​ផ្តោត​សំខាន់​លើ​វិស័យ​ធំៗ​ទាំង​បួន រួមមាន​ពាណិជ្ជកម្ម​ទំនិញ ពាណិជ្ជកម្ម​សេវាកម្ម ការវិនិយោគ និង​កម្មសិទ្ធិបញ្ញា​ផងដែរ​។​

​បន្ថែម​ពីនេះ​ទៀត កិច្ច​ពិគ្រោះ​យោបល់​ក៏បាន​ពិភាក្សា​លើ​វឌ្ឍនភាព នៃ​ការអនុវត្ត​កិច្ចព្រមព្រៀង​ភាពជា​ដៃគូ​សេដ្ឋកិច្ច​ទូលំទូលាយ​អាស៊ាន​-​ជប៉ុន ដោយបាន​ជំរុញ​ភាគី​ពាក់ព័ន្ធ​ទាំងអស់ ព​ន្លឿ​ន​លើ​ការបញ្ចប់​ពិធីសារ​ទី​១ ស្តីពី​ការធ្វើ​វិសោធនកម្ម​កិច្ចព្រមព្រៀង​អាស៊ាន​-​ជប៉ុន ដើម្បី​អាច​ចុះហត្ថលេខា​ក្នុង​កិច្ចប្រជុំ​កំពូល​អាស៊ាន​-​ជប៉ុន​លើក​ទី​២១​នៅក្នុង​អំឡុង​ខែវិច្ឆិកា ឆ្នាំ​២០១៨​ខាងមុខ​។

​ជាមួយនឹង​កិច្ចប្រជុំ​នេះដែរ រដ្ឋមន្ត្រី​ប្រទេស​ទាំង​១៦ បានបង្ហាញ​ពី​ជំហរ​ទន់ភ្លន់ និង​ការប្តេជ្ញាចិត្ត​ខ្ពស់​ក្នុង​ការបញ្ចប់​ចរចា​កិច្ចព្រមព្រៀង​នេះ​ក្នុង​ឆ្នាំ​២០១៨ តាម​អាណត្តិ​ផ្តល់​ដោយ​ប្រមុខ​រដ្ឋាភិបាល​នៃ​ប្រទេស​ទាំង​១៦ ដោយ​ជំរុញ​ឲ្យ​ភាគី​ចរចា​ទាំងអស់​ខិតខំ​ប្រឹងប្រែង​បន្ថែមទៀត និង​ឆ្លើយតប​ជា​វិជ្ជមាន​ទាំង​លក្ខណៈ​ទ្វេភាគី និង​ពហុភាគី​។

​ក្នុងនោះ​អង្គប្រជុំ​ក៏បាន​បញ្ជាក់​ជាថ្មី ពី​ការផ្តល់​ភាពទន់ភ្លន់​ពិសេស​ដល់​ប្រទេស​អភិវឌ្ឍន៍​តិចតួច​ទាំងអស់ ដើម្បី​ទទួលបាន​អត្ថប្រយោជន៍​អតិបរមា ក្រោយពេល​កិច្ចព្រមព្រៀង​នេះ​ចូល​ជា​ធរមាន​៕ ល​