កីឡាករ​បាល់ទាត់​ថៃ​មួយក្រុម​បាត់​ខ្លួន​ក្នុង​រូងភ្នំ ៤ ថ្ងៃ​ហើយ​រក​មិនទាន់​ឃើញ ចំពេល​អាកាសធាតុ​អាក្រក់​មាន​ភ្លៀង​ធ្លាក់​ខ្លាំង​លិច​រូងភ្នំ​

1629
ចែករម្លែក

​ទាហាន​ថៃ ពួ​ល​អ្នកស្ម័គ្រចិត្ត​និង​សមាជិក​កងទ័ពជើងទឹក​រួមទាំង​ក្រុម​អ្នក​មុជទឹក​បានធ្វើការ​ទាំងយប់​ដើម្បី​ព្យាយាម​ស្វែងរក​កីឡាករ​បាល់ទាត់​វ័យក្មេង​មួយក្រុម​ដែល​ជាប់​នៅក្នុង​រូងភ្នំ​មួយ ខណៈដែល​ការស្វែងរក​បាន​ឈានចូល​ថ្ងៃទី​៤ គិត​ត្រឹម​ថ្ងៃ​ពុធ ទី​២៧ មិថុនា​នេះ​។

​ក្រុម​អ្នក​ជួយសង្គ្រោះ​បាន​ប្តូរ​វេន​គ្នា​បូមទឹក​ចេញពី​ក្នុង​រូងភ្នំ ចំពេល​កំពុងមាន​អាកាសធាតុ​អាក្រក់ រួមទាំង​ភ្លៀង​ធ្លាក់​ខ្លាំង​អំឡុងពេល​រាត្រី ដែល​បណ្តាលឱ្យ​កម្ពស់​ទឹក​កើនឡើង​នៅក្នុង​រូងភ្នំ​ថាំ​ហ្លួង (Tham Luang) នៅ​ខេត្ត​ឈៀង​រ៉ៃ ភាគ​ខាងជើង​ប្រទេស​នេះ​។​

​លោក​វរសេនីយ៍ត្រី ប៊ុន​ឆា ទូ​រី​យ៉ា​ផន មេបញ្ជាការ​យោធា​ភូមិភាគ ៣៧ នៅ​ខេត្ត​ឈៀង​រ៉ៃបាន​ប្រាប់​ទីភ្នាក់ងារសារព័ត៌មាន​រ៉​យ​ទ័​រថា “​កាលពី​យប់មិញ យើង​បានធ្វើ​ការមិន​ឈប់​នោះឡើយ​ដើម្បី​បង្ហូរទឹក​ចេញពី​រូងភ្នំ​តាម​ដែល​អាចធ្វើ​ទៅបាន​” ។​

​ក្មេងប្រុស​អាយុ​ពី ១១ ទៅ ១៦ ឆ្នាំ​និង​ជំនួយការ​គ្រូបង្វឹក​វ័យ ២៥ ឆ្នាំ​របស់​ពួកគេ​បាន​បាត់​ខ្លួន​កាលពី​ថ្ងៃ​សៅរ៍​សប្តាហ៍​មុន បន្ទាប់ពី​ការហ្វឹកហាត់​បាល់ទាត់​។​

​សារ​ផ្តោះផ្តង​គ្នា​រវាង​សមាជិក​ក្រុម​បាន​បង្ហាញថា ពួកគេ​មាន​គម្រោង​រុករក​ក្នុង​រូងភ្នំ​នេះ ហើយ​បាន​យក​ពិល​និង​អាហារ​មួយចំនួន​ទៅជា​មួយ​។​

​លោក​ណុប​ផា​រ៉ាត់ កាន់​តាវ​ង់ គ្រូ​បង្គោល​របស់​ក្រុម ដែល​មិនបាន​ចូលរួម​ការហ្វឹកហាត់​កាលពី​ថ្ងៃ​សៅរ៍ បាន​និយាយថា គាត់​ជឿថា កីឡាករ​ទាំងនោះ​នៅមាន​ជីវិត​នៅឡើយ​ទេ ដោយ​បន្ថែមថា សារ​ផ្តោះផ្តង​ក្នុង​គ្រុប​ឆាត បាន​បង្ហាញថា ក្មេងប្រុស​ទាំងនោះ​បាន​យក​ពិល និង​អាហារ​មួយចំនួន​ជាមួយ​ពួកគេ​ចូលទៅក្នុង​រូងភ្នំ​។

​ឧបនាយករដ្ឋមន្ត្រី វង់​សុ​វ៉ាន់ ប្រាប់​អ្នកកាសែត​ក្នុង​ក្រុង​បាងកក​នៅ​ថ្ងៃ​ពុធ​នេះ​ថា មេទ័ព​របស់​ប្រទេស​នេះ​នឹងធ្វើ​ដំណើរ​ទៅកាន់​តំបន់​នេះ​៕ ដោយ៖ កញ្ញាដាលីស

កីឡាករ​អាយុ​ពី ១១ ទៅ ១៦ ឆ្នាំ​និង​ជំនួយការ​គ្រូបង្វឹក​វ័យ ២៥ ឆ្នាំ​របស់​ពួកគេ​បាន​បាត់​ខ្លួន​កាលពី​ថ្ងៃ​សៅរ៍​សប្តាហ៍​មុន បន្ទាប់ពី​ការហ្វឹកហាត់​បាល់ទាត់