កីឡាករ​បា​រ៉ែ​ន​ជាប់ឃុំ​នៅ​ថៃ ទីបំផុត​បាន​ចាក​ចេញទៅ​អូស្ត្រាលី​វិញ បន្ទាប់ពី​រដ្ឋាភិបាល​បា​រ៉ែ​ន​សុំ​ដក​សំណើ​ធ្វើ​បត្យាប័ន​

351
ចែករម្លែក
  • 10
    Shares

​កីឡាករ​បាល់ទាត់​អន្តោប្រវេសន៍ ឈ្មោះ ហា​ឃីម អាល់​អា​រ៉ៃ​ប៊ី បាន​ចាក​ចេញពី​ប្រទេស​ថៃ​កាលពី​ថ្ងៃ​អង្គារ​ទី​១២​កុម្ភៈ​បន្ទាប់ពី​រដ្ឋាភិបាល​ក្រុង​បាងកក​បាន​ទម្លាក់ចោល​ករណី​ធ្វើ​បត្យាប័ន​ប្រឆាំងនឹង​រូបគេ​តាម​ការស្នើសុំ​របស់​បា​រ៉ែ​ន ដោយ​បញ្ចប់​ការឃុំ​ឃាំង​រយៈពេល​ពីរ​ខែ​ដែល​ធ្វើឱ្យមាន​ការខឹង​សម្បារ​ជាស​កល​។​

​អា​រ៉ៃ​ប៊ី​អាយុ ២៥ ឆ្នាំ អតីត​កីឡាករ​យុវជន​ជម្រើសជាតិ​បា​រ៉ែ​ន ត្រូវបាន​ផ្តល់​ឋានៈ​ជា​ជនភៀសខ្លួន​នៅ​អូស្ត្រាលី បន្ទាប់ពី​រត់គេច​ពី​ការចោទប្រកាន់​ក្នុងប្រទេស​សម្បូរ​ប្រេង​នេះ​ដោយ​ជាប់​ទៅ​ទង​នឹង​ការតវ៉ា​បដិវត្តន៍​អារ៉ាប់​។​

​ប៉ុន្តែ​គាត់​ត្រូវបាន​ឃាត់ខ្លួន​នៅ​អាកាសយានដ្ឋាន​ដ៏​សំខាន់​មួយ​របស់​ទីក្រុង​បាងកក​តាម​ការស្នើសុំរ​បស់​បា​រ៉ែ​ន​កាលពី​នៅ​ថ្ងៃទី ២៧ ខែវិច្ឆិកា នៅពេល​គាត់​បានមក​ដល់​ប្រទេស​ថៃ​សម្រាប់​ការ​ក្រេប​ទឹកឃ្មុំ​របស់គាត់​។​

​គាត់​ត្រូវបាន​ឃុំឃាំង​នៅក្នុង​ពន្ធនាគារ​នៅ​ទីក្រុង​បាងកក​រង់ចាំ​សាលក្រម​របស់​តុលាការ​លើ​សំណើសុំ​ធ្វើ​បត្យាប័ន​ពី​ប្រទេស​បា​រ៉ែ​ន ជា​ចំណាត់ការ​មួយ​ដែល​កីឡាករ​បាល់ទាត់​រូបនេះ​ជំទាស់​ប្រឆាំង ដោយ​និយាយថា គាត់​បារម្ភ​អំពី​ការធ្វើ​ទារុណកម្ម ប្រសិនបើ​ត្រឡប់​ទៅ​ស្រុក​វិញ​។​

​លោក​ចាត់​ជុម អាកា​ពី​ន អគ្គនាយក​នៃ​នាយកដ្ឋាន​កិច្ចការ​អន្តរជាតិ​នៃ​ការិយាល័យ​រដ្ឋអាជ្ញា​បាន​និយាយថា ថ្ងៃ​ចន្ទ​បាន​នាំ​ឱ្យមក​នូវ​ការភ្ញាក់ផ្អើល​យ៉ាងខ្លាំង​ពី​រដ្ឋាភិបាល​បា​រ៉ែ​ន ដែល​បាន​ទម្លាក់ចោល​សំណើសុំ​ធ្វើ​បត្យាប័ន​នេះ​។​

​លោក​អាកា​ពី​ន​បាន​ប្រាប់​ទីភ្នាក់ងារសារព័ត៌មាន AFP ថា “​យើង​ត្រូវបាន​ជូនដំណឹង​ថា​បា​រ៉ែ​ន​ចង់​ដក​សំណើ​ធ្វើ​បត្យាប័ន​…​ប្រសិនបើ​ពួកគេ​មិន​ចង់បាន​គាត់​ទេ យើង​គ្មាន​ហេតុផល​អ្វី​ដើម្បី​រក្សាទុក​គាត់​នៅទីនេះ​ទេ​”​។​

​បន្ទាប់ពី​ផុត​ពាក់កណ្តាល​អា​ធ្រា​ត្រ​ឆ្លង​ចូល​ថ្ងៃ​អង្គារ កីឡាករ​បាល់ទាត់​រូបនេះ​បាន​ឡើង​ជិះ​យន្តហោះ Thai Airways ឆ្ពោះទៅកាន់​ក្រុង​មែ​ល​ប៊​ន​៕ ដោយ៖ កញ្ញាដាលីស

ហា​ឃីម អាល់​អា​រ៉ៃ​ប៊ី បាន​ចាក​ចេញពី​ប្រទេស​ថៃ​ទៅ​អូស្ត្រាលី​វិញ​កាលពី​យប់​រំលង​អា​ធ្រា​ត្រ​ឆ្លង​ចូល​ថ្ងៃ​អង្គារ