កុំ​ចេះតែ​ហ៊ាន​! សកម្មជន​ប្រឆាំង​យោធា​ថៃ ត្រូវ​គេ​វ៉ៃ​២​ដង​ក្នុង​រយៈពេល​តែ​១​ខែតែម្តងនេះ​សន្លប់​ធំ​

672
ចែករម្លែក

​សកម្មជន​ថៃ​ម្នាក់​ដែល​ប្រឆាំង​នឹង​តួនាទី​របស់​យោធា​នៅ​ក្នុង​នយោបាយ ត្រូវបាន​គេ​វាយ​កាលពី​ថ្ងៃ​សុក្រ​ទី​២៨​មិថុនា និង​បាន​សន្លប់​នៅក្នុង​ការវាយប្រហារ​លើ​ក​ទី​២​ក្នុង​រយៈ​​ពេល​តែ​១​ខែ ។​

​ស៊ីរ៉ា​វីត សេរិទី​វ៉ាត ត្រូវ​បុរស​៤​នាក់​យក​ដំបង​វាយ​ចំ​ក្បាល​នៅ​មុន​ថ្ងៃត្រង់​បណ្តាលអោយ​គាត់ដួល​សន្លប់​ក្នុង​ថ្លុកឈាម​នៅ​ចិញ្ចើមផ្លូវ​ជិត​ផ្ទះ​របស់​គាត់​នៅ​ក្រុង​បាងកក​។​ជន​វាយ​ប្រ​​ហារ​ដែលបាន​ជិះ​ម៉ូតូ​គ្មាន​ស្លាក​លេខ​និង​ពាក់មួក​សុវត្ថិភាព​នៅពេល​ពួក​គេ​វាយ​លោក​ស៊ីរ៉ា​វីត​ បានគេចខ្លួនដោយសុវត្ថិភាព។

​សូមបញ្ជាក់​ថា យោធា​ថៃ​បាន​ដណ្តើម​អំណាច​នៅក្នុង​រដ្ឋប្រហារ​ឆ្នាំ​២០១៤ និង​បាន​បង្ក្រាប​លើ​ជន​ប្រឆាំង ខណៈ​ខកខាន​មិន​បាន​ស៊ើបអង្កេត​អំពើហិង្សា​លើ​អ្នក​រិះគន់​ខ្លួន​។​ក្រុម​​យោធា​បានធ្វើ​ច្បាប់​បោះឆ្នោត​ថ្មី​ដែល​អំណោយផល​ដល់​ឧត្តមសេនីយ៍ ប្រា​យុទ្ធ ចាន​អូ​ចា រក្សា​តំណែង​នាយករដ្ឋមន្ត្រី​នៅក្នុង​ការបោះឆ្នោត​កាលពី​ខែ​មីនា​។​

​បើតាម​ម្តាយ​របស់​ជនរងគ្រោះ ការវាយប្រហារ​នេះ​បណ្តាល​អោយ​លោក​ស៊ីរ៉ា​វីត​បែក​ភ្នែក​និង​ក្បាល​។​

​ស៊ីរ៉ា​វីត បាន​រង​ការវាយប្រហារ​ផង​ដែរ​កាលពី​ថ្ងៃ​៣​មិថុនា ដោយ​មនុស្ស​៥​នាក់​នៅ​ពេល​លោក​បាន​ធ្វើការ​សំរាប់​យុទ្ធនាការ​មួយ​ដើម្បី​សុំ​អោយ​សមាជិក​ព្រឹទ្ធសភា​ដែល​តែងតាំងឡើង​​ដោយ​យោធា កុំ​បោះឆ្នោត​គាំទ្រ​លោក​ប្រា​យុទ្ធ ជា​នាយករដ្ឋមន្ត្រី​។​

​បើ​តាម​សារព័ត៌មាន សកម្មជន​គាំទ្រ​លទ្ធិប្រជាធិបតេយ្យ​នៅ​ថៃ​ផ្សេង​ទៀត​ក៏​រង​ការវាយប្រហារ​ តែ​ហាក់​មិន​មាន​ការស៊ើបអង្កេត​និង​គ្មាន​ការចាប់ខ្លួន​ជនដៃដល់​ទេ​៕​ដោយ​៖​វាសនា​

សកម្មជន​ប្រឆាំង​យោធា​លោក ស៊ីរ៉ា​វីត សេរិទី​វ៉ាត ក្នុង​ពិធី​ប្រារព្វ​ខួប​ទី​៤​នៃ​ការចូល​កាន់កាប់​យោធា ក្នុង​ប្រទេស​ថៃ​កាលពី​ថ្ងៃ​២២ ឧសភា ឆ្នាំ​២០១៨​។​លោក​រង​ការវាយប្រហារ​២​លើ​​ក្នុង​ខែ​នេះ តែ​ចុងក្រោយ​ធ្ងន់​មិនដឹង​ស្លាប់​ឬ​រស់​​