កូរ៉េខាងត្បូង​ធ្វើ​សមយុទ្ធ​ដើម្បី​ការពារ​ប្រឆាំង​ជប៉ុន​

113

​កូរ៉េខាងត្បូង​នៅ​ថ្ងៃ​ចន្ទ​ទី​១៨​ខែមិថុនា​នឹង​ចាប់​ផ្តើមធ្វើ​សមយុទ្ធ​រយៈពេល​២​ថ្ងៃ​ដើម្បី​អនុវត្ត​ការការពារ​ប្រជុំ​កោះ​Dokdo​ដែលមាន​ជម្លោះ នៅឯ​នាយ​ឆ្នេរសមុទ្រ​ភាគ​​ខាងកើត​របស់ខ្លួន​ប្រឆាំង​ការវាយប្រហារ​ដែល​មិន​ទំនង​កើតឡើង​ដោយ​ជប៉ុន​។​

​រដ្ឋាភិបាល​ក្រុង​សេ​អ៊ូ​ល​បាន​គ្រប់គ្រង​ប្រជុំ​កោះ​នេះ នៅ​សមុទ្រ​ជប៉ុន (​សមុទ្រ​ខាងកើត​) ចាប់តាំងពី​ការបញ្ចប់​ការគ្រប់គ្រង​អាណានិគម​របស់​ជប៉ុន​នៅលើ​ឧបទ្វីប​កូរ៉េ​។​

​រដ្ឋាភិបាល​ក្រុង​តូ​ក្យូ​ក៏បាន​អះអាង​សិទ្ធិ​កាន់កាប់​លើ​ប្រជុំ​កោះ​ឬ​ហៅ​ប្រជុំ​Takeshima​នេះ ផងដែរ​ដោយ​ចោទប្រកាន់​រដ្ឋាភិបាល​ក្រុង​សេ​អ៊ូ​ល​ថា​បាន​កាន់កាប់​ប្រជុំ​កោះ​​នេះ​ដោយ​ខុសច្បាប់​។​

​ការធ្វើ​សមយុទ្ធ​នេះ​ធ្វើឡើង​គឺ​តែ​ប៉ុន្មាន​ថ្ងៃ​ប៉ុណ្ណោះ​បន្ទាប់ពី​ប្រធានាធិបតី​អាមេរិក លោក ដូ​ណា​ល់ ត្រាំ​បានប្រកាស​ពី​ការផ្អាក​ធ្វើ​សមយុទ្ធ​រួមគ្នា​ដែល​ធ្វើជា​យូរយារ​មក​​ហើយ​ជាមួយ​កូរ៉េខាងត្បូង​គឺ​ដើម្បី​ការពារ​ប្រឆាំង​ការឈ្លានពាន​របស់​កូរ៉េខាងជើង ដោយ​ហៅ​ការធ្វើ​សមយុទ្ធ​ទាំងនេះ​ថា​ជា​”​ការចំណាយ​លុយ​ច្រើន​និង​បង្កហេតុ​”
​និង​សំរាប់​បង្កលក្ខណៈ​ដល់​ការចរចា​លុបបំបាត់​នុយក្លេអ៊ែរ​កូរ៉េខាងជើង​។​

​ខណៈពេលដែល​ការវាយប្រហារ​ពី​ប្រទេស​ជប៉ុន ត្រូវបាន​ចាត់ទុកថា​មិន​ទំនងជា​កើតឡើង​នោះ​កូរ៉េខាងត្បូង​បានធ្វើ​សមយុទ្ធ​លើកទីមួយ​នៅ​ឆ្នាំ​១៩៨៦ និង​បានធ្វើ​២​ដង​ក្នុង​មួយឆ្នាំ​ចាប់តាំងពី​ឆ្នាំ​២០០៣​មក​។​

​អ្នកស្រី Choi Hyun Soo​អ្នកនាំពាក្យ​ក្រសួងការពារជាតិ​កូរ៉េខាងត្បូង​បាន​និយាយថា​សមយុទ្ធ​ការពារ​ប្រជុំ​កោះ​Dokdo គឺជា​ការហ្វឹកហ្វឺន​ជាប្រចាំ​ដែល​បាន​ធ្វើឡើង ដើម្បី​ការពារ​ការឈ្លានពាន​ពី​កងកម្លាំង​ខាងក្រៅ​។​

​ការធ្វើ​សមយុទ្ធ​រយៈពេល​២​ថ្ងៃនេះ នឹងចូលរួម​ដោយ​នាវាចម្បាំង​៦​គ្រឿង​និង​យន្តហោះ​ចម្បាំង​៧​គ្រឿង និង​កង​ម៉ា​រី​ន មួយអង្គ​ភាព ។​

​កូរ៉េខាងត្បូង​និង​ជប៉ុន ទាំង​២​គឺជា​ប្រទេស​សេដ្ឋកិច្ច​ទីផ្សារ ប្រកាប់​លទ្ធិប្រជាធិបតេយ្យ​និង​ជា​សម្ពន្ធមិត្ត​អាមេរិក ហើយ​ប្រទេស​ទាំង​២​នេះ​ត្រូវបាន​គំរាមកំហែង​​ដោយ​កូរ៉េខាងជើង​ដែល​ដែលមាន​អាវុធ​នុយក្លេអ៊ែរ ប៉ុន្តែ​ទំនាក់ទំនង​របស់​ពួកគេ ត្រូវបាន​ធ្វើឱ្យ​រាំងស្ទះ​យ៉ាងខ្លាំង​ដោយ​បញ្ហា​ប្រវត្តិសាស្ត្រ​និង​បញ្ហា​ដែនដី​៕ដោយ៖សុខា/sn

​រូបភាព​បង្ហាញ​ប៉ូលិស​កូរ៉េខាងត្បូង​ប្រដាប់​ដោយ​អាវុធ ឈរ​យាម​នៅលើ​ប្រជុំ​កោះ​Dokdo