ក្រសួងសុខាភិបាល​ណែនាំ​គោលការណ៍៩ចំណុច​សំរាប់បង្ការ​ការពុល​អាហារនិង ស្រា​

367

(ភ្នំពេញ)៖ ដើម្បី​ចូលរួម​បង្ការ​សុខភាព​ដែល​បណ្តាលមកពី​ការពុល​ចំណីអាហារ និង​ពុល​ស្រា នាឱកាស​ដែល​ប្រជាពលរដ្ឋអញ្ជើញ​ចូលរួម​ក្នុង​ពិធី​កាន់បិណ្ឌ និង​ភ្ជុំបិណ្ឌ​ដែល​ប្រព្រឹត្តទៅ​ចាប់ពី​ថ្ងៃទី​០៦ ខែកញ្ញា ដល់​ថ្ងៃទី​២០ ខែកញ្ញា ឆ្នាំ​២០១៧​នេះ ក្រសួងសុខាភិបាល បាន​អំពាវនាវ​ដល់​សាធារណជន​ទាំងអស់ ឱ្យ​ចូលរួម​អនុវត្ត​វិធានការ​បង្ការ​ដើម្បី​សុខភាព​ល្អ ចៀស​ផុតពី​បញ្ហា​សុខភាព​បណ្តាលមកពី​ការពុល​អាហារ ពុល​ស្រា និង​ជំងឺឆ្លង​ផ្សេងៗ​។​

​ទំព័រ​ហ្វេ​ស​ប៊ុ​ករ​បស់​ក្រសួងសុខាភិបាល បាន​ណែនាំ​ឱ្យ​អនុវត្ត​គោលការណ៍​សំខាន់ៗ​ចំនួន៩ចំណុច គឺ​៖

១. ប្រើប្រាស់​ទឹកស្អាត និង​ម្ហូបអាហារ​ដែល​ស្អាត និង​ឆ្អិន​ជានិច្ច​។​

២. ត្រូវ​លាងដៃ​នឹង​សាប៊ូ មុនពេល និង​អំឡុងពេល​រៀបចំ​ម្ហូបអាហារ មុន​បរិភោគ និង​ក្រោយ​បន្ទោ​របង់​។​

៣. លាង​សម្អាត​បន្លែ​ផ្លែឈើ​ឲ្យ​បាន​ស្អាត​មុន​បរិភោគ​។​

៤. សម្អាត​សម្ភារ​ប្រើ​សម្រាប់​ចម្អិន​ម្ហូបអាហារ​ឲ្យ​បាន​ត្រឹមត្រូវ​។​

៥. ចម្អិន​អាហារ​ឲ្យ​បាន​ឆ្អិន​ល្អ ជាពិសេស​សាច់ សត្វ​ស្លាប ស៊ុត និង​អាហារ​សមុទ្រ​។​

៦. ទុកដាក់​ចំណីអាហារ​ឆៅ និង​ឆ្អិន​ដាច់ដោយឡែក​ពីគ្នា​។​

៧. កុំ​រក្សាទុក​អាហារ​ក្នុង​កម្ដៅ​ធម្មតា​លើសពី​២​ម៉ោង​។

៨. មិនត្រូវ​រក្សាទុក​អាហារ​ជាច្រើន​ថ្ងៃ​ទេ ទោះជា​ស្ថិតក្នុង​កម្រិត​សីតុណ្ហភាព​សុវត្ថិភាព​ក៏ដោយ​៖ ក​. បើ​រក្សាទុក​អាហារ​ក្នុង​ប្រព័ន្ធ​ត្រជាក់ គឺ​ត្រូវ​ឲ្យ​នៅក្រោម​សីតុណ្ហភាព​៥​អង្សា​សេ​, ខ​. បើ​រក្សាទុក​អាហារ​ក្នុង​ប្រព័ន្ធ​កម្ដៅ គឺ​ត្រូវ​ឲ្យ​លើសពី​សីតុណ្ហភាព​៦០​អង្សា​សេ​។​

៩. កុំ​ប្រើប្រាស់​ចំណីអាហារ​ហួស​កាលកំណត់​។​

​សេច​ក្ត​ណែនាំ​ដដែល​បាន​បាន​បន្ថែមថា ការពុល​ចំណីអាហារ​ភាគច្រើន​បណ្តាលមកពី​ការរៀបចំ​អាហារ​មិនមាន​អនាម័យ​ល្អ ទាំង​ក្នុង​ចំណីអាហារ ទាំង​អ្នករៀបចំ​ទុកដាក់ និង ការចែក​ចាយ​ចំណីអាហារ និង ការ​ព​សា​ស្រា ដែល​បាន​ផលិត ឬ បិត ដែល​មិនមាន​លក្ខណៈ​បច្ចេកទេស ត្រឹមត្រូវ ។ រោគសញ្ញា​ដែល​បណ្តាលឱ្យ​ពុល​អាហារ​មានដូចជា ក្អួត ចង្អោរ រាក រាក​មួល ដែល​អាច​គ្រោះថ្នាក់​ដល់​អាយុជីវិត​បាន ។

ការពុល​ស្រា​បណ្តាលឱ្យមាន​រោគសញ្ញា ដូចជា ឈឺក្បាល ក្អួត ឈឺពោះ វិលមុខ ងងឹតភ្នែក ស្ល​នប់ ប្រកាច់ ពិបាក​ដកដង្ហើម និង អាច​វិវត្ត​ទៅ​ស្លាប់​បាន ។ លទ្ធផល​វិភាគ​សំណាក​ស្រាស ដែល​ទទួលបាន​ពី​ទីកន្លែង​កើតហេតុ របស់​មន្ទីរពិសោធន៍​ក្រសួងសុខាភិបាល បាន​រកឃើញថា ស្រា ស ឬ ស្រាថ្នាំ ដែល​បងប្អូន​ប្រជាពលរដ្ឋ​បាន​ពិសា​ក្នុង​តំបន់​កើតហេតុ មាន​ជាតិ​មេ​តា​ណុល​កម្រិត​ខ្ពស់ ។ ដូច្នេះ​សូម​បងប្អូន​បញ្ឈប់​ជាបន្ទាន់​នូវ​ការបរិភោគ​ស្រា ស ឬ ស្រាថ្នាំ ដែល​ទិញ​ពី​ប្រភព​មិន​ច្បាស់លាស់ និង ផលិត​ដោយ​គ្មាន​ការត្រួតពិនិត្យ​ត្រឹមត្រូវ ៕ដោយៈ មេសា​/sn


ករណី​ពុល​អាហារ និង ពុល​ស្រា កន្លងមក