ក្រសួងសុខាភិបាល ហាម​ចែកចាយ និង ប្រើប្រាស់ ផលិតផល​ឈ្មោះ Spirulina Pacifica

788
ចែករម្លែក

ដោយៈ មេសា​/ភ្នំពេញៈ ក្រសួងសុខាភិបាល សូម​ជម្រាប​ជូនដំណឹង​ដល់​សាធារណជន​ទាំងអស់​ជ្រាបថា គណនី​ហ្វេ​ស​ប៊ុ​កចំនួន ២ គឺ​៖ ១. សា​រ៉ា​យ​សមុទ្រ , ២. សា​រ៉ា​យ​សមុទ្រ កោះ​ហា​វៃ​- Hawaiin Spirulina កំពុងផ្សព្វផ្សាយ​លក់​ផលិតផល​ឈ្មោះ Spirulina Pacifica ដែលមាន​គុណភាព​បង្ការ ឬព្យាបាល​ជំងឺ ដោយគ្មាន​ចុះ​បញ្ជិកា គ្មាន​ការត្រួតពិនិត្យ​គុណភាព និង គ្មាន​ការអនុញ្ញាត​ផ្សព្វផ្សាយ​ពី​ក្រសួងសុខាភិបាល ព្រមទាំង​បាន​ផ្សព្វផ្សាយ​ភូតកុហក​បោកប្រាស់ និង បំផ្លើស​ហួស​ពី​ការពិត គ្មាន​មូលដ្ឋាន​វិទ្យាសាស្ត្រ​ត្រឹមត្រូវ ដូចជា ៖ ជួយ​ព្យាបាល​ជំងឺ​ក្រពះ ពោះវៀន បេះដូង ទឹកនោមផ្អែម លើសឈាម អាល្លែកហ្ស៊ី​ច្រមុះ ឈឺក្បាល​ជាប្រចាំ ស្ត្រេ​ស​ច្រើន លើស​ជាតិ​អាស៊ីត ឈឺសន្លាក់​ដៃជើង ជំនួយ​សុខភាព​ភ្នែក ខួរក្បាល ប្រព័ន្ធ​ការពារ​រាងកាយ​រឹងមាំ ការពារ​អុកស៊ីតកម្ម ជាពិសេស​អ្នកជំងឺ​ទឹកនោមផ្អែម លើសឈាម ឈឺសន្លាក់​ដៃជើង រោគ​ស្ត្រី​ធ្លាក់ស រដូវ​មក​មិន​ទៀង ចុកពោះ​ពេល​មក​រដូវ រោគ​បុរស ជំនួយ​ឱ្យ​សាច់ស រលោង​ស្អាត​ក្មេង​ជាង​វ័យ​ពិតៗ ។ នេះ​បើតាម​សេចក្តីប្រកាស​របស់​ក្រសួងសុខាភិបាល ដែល​បានចេញ​ផ្សាយ​លើ​ទំព័រ​ហ្វេ​ស​ប៊ុ​ក​របស់ខ្លួន ។


​សេចក្តីប្រកាស​នេះ បាន​បន្ថែមថា ក្រសួងសុខាភិបាល សូម​ជូនដំណឹង​ដល់​សាធារណជន កុំ​ជឿ​ការផ្សព្វផ្សាយ ឃោសនា​ភូតកុហក​បោកប្រាស់​តាម​បណ្តាញ​សង្គម​​ហ្វេ​ស​ប៊ុ​ក​របស់​គណនី​ទាំង ២ ខាងលើ និង បញ្ឈប់​ការប្រើប្រាស់​ផលិតផល​ឈ្មោះ Spirulina Pacifica នេះឱ្យ​បញ្ឈប់​ជាបន្ទាន់ ។


​ជាមួយគ្នានេះ ក្រសួងសុខាភិបាល​បានប្រកាស​បញ្ជា​ឱ្យ​ម្ចាស់​គណនី​ហ្វេ​ស​ប៊ុ​ក​ទាំង ២ ខាងលើ ដែល​នាំចូល ផ្សព្វផ្សាយ លក់ និង ចែកចាយ​ផលិតផល​ឈ្មោះ Spirulina Pacifica ជាបន្ទាន់ ព្រមទាំង​ប្រមូល​មក​កម្ទេចចោល ។ ក្រសួងសុខាភិបាលនឹងមាន​វិធានការ​តឹងរ៉ឹង​ចំពោះ​ម្ចាស់​គណនី​ទាំង ២ ខាងលើ​ដែល​ផ្សព្វផ្សាយ​លក់​ផលិតផល Spirulina Pacifica នេះ​តាមច្បាប់​ជា​ធរមាន ។​


​សេចក្តីប្រកាស​ដដែល​នេះ បាន​បន្ថែមថា ករណី​បានឃើញ​អ្នកប្រើប្រាស់ លក់ ឬ ចែកចាយ​ផលិតផល​ខាងលើនេះ សូម​ផ្តល់ព័ត៌មាន ឬ ត្រូវការ​ព័ត៌មាន​បន្ថែម​ពី​នាយកដ្ឋាន​ឱសថ ចំណីអាហារ បរិក្ខារ​ពេទ្យ និង គ្រឿងសម្អាង តាមរយៈ​ទូរស័ព្ទ​លេខ ០៩៥ ៣៥៩ ៣៩៩ ឬ ០១២ ៩៨៣ ៣៣៤ ៕ Kh/Ha

ផលិតផល ឈ្មោះ Spirulina Pacifica ដែល​ក្រសួងសុខាភិបាល​ប្រកាស​ឱ្យ​ឈប់​ប្រើប្រាស់ និង ចែកចាយ ( រូបៈ ក្រសួងសុខាភិបាល )