ក្រុមប្រឹក្សាសន្តិសុខ​​អំពាវនាវ​ឱ្យ​មាន​ការចរចា​ដើម្បី​បញ្ចប់​ភាព​តានតឹង​អាម៉េរិក​-​អ៊ីរ៉ង់

407
ចែករម្លែក

​ក្រុមប្រឹក្សាសន្តិសុខ​អង្គការសហប្រជាជាតិ​កាលពី​ថ្ងៃ​ចន្ទ​ទី​២៤​មិថុនា ​បាន​អំពាវនាវ​ឱ្យ​មាន​ការចរចា​និង​វិធានការ​ដើម្បី​បញ្ចប់​ភាព​តានតឹង​នៅក្នុង​ឈូង​សមុទ្រ​ពែ​ក្ស ប៉ុន្តែ អ៊ីរ៉ង់​​បាន​បដិសេធ​ការចរចា​ជាមួយ​សហរដ្ឋអាម៉េរិក បន្ទាប់​ពី​ប្រធានាធិបតី​អាម៉េរិក លោក ដូ​ណា​ល់​ត្រាំ បាន​ដាក់​ទណ្ឌកម្ម​ថ្មី​។​

​នៅក្នុង​សេចក្តីថ្លែងការណ៍​ជា​ឯកច្ឆន្ទ​ដែល​តាក់តែងឡើង​ដោយ​ប្រទេស​កូ​វ៉ែតនោះ ក្រុមប្រឹក្សា​នេះ​បាន​ថ្កោលទោស​ចំពោះ​ការវាយប្រហារ​ថ្មីៗ​ទៅ​លើ​នាវា​ដឹក​ប្រេង​ជាច្រើន​​ ដោយ​ហៅ​ការវាយប្រហារ​ទាំងនោះ​ថា​ជា​ការគំរាមកំហែង​ដល់​ការផ្គត់ផ្គង់​ថាមពល​ពិភពលោក​និង​សន្តិភាព​និង​សន្តិសុខ​អន្តរជាតិ​។​

​បន្ទាប់ពី​កិច្ចប្រជុំ​រយៈពេល​២​ម៉ោង ក្រុមប្រឹក្សា​នេះ​បាន​ព្រមព្រៀង​លើ​សេចក្តីថ្លែងការណ៍​មួយ​ដែល​មិន​បាន​លើកឡើង​ចំ​អំពី​អ៊ីរ៉ង់​ទេ ប៉ុន្តែ​បាន​បញ្ជាក់​យ៉ាងច្បាស់​ថា​ គ្រប់​ភាគី​ទាំង​​អស់​គួរតែ​ដកខ្លួន​ចេញពី​ការប្រឈមមុខ​ដាក់​គ្នា​ផ្នែក​យោធា​ដ៏​ភ័យព្រួយ​បំផុត​។​

​ជំហរ​រួម​របស់​ក្រុម​ប្រទេស​មហាអំណាច​ពិភពលោក បាន​កើត​ឡើង​តែ​ប៉ុន្មាន​ម៉ោង​ក្រោយពី​លោក ដូ​ណា​ល់ ត្រាំ បាន​ដាក់​ទណ្ឌកម្ម​ថ្មី​លើ​អ៊ីរ៉ង់ ដោយ​ផ្ដោត​លើ​មេដឹកនាំ​កំពូល​ លោក​Ayatollah Ali Khamenei​និង​មេបញ្ជាការ​អ៊ីរ៉ង់​៨​នាក់​។​

​នៅពេល​ដែល​ក្រុមប្រឹក្សា​នេះ​បាន​ប្រជុំ​តាម​សំណើ​របស់​រដ្ឋាភិបាល​ក្រុង​វ៉ាស៊ីនតោន​មក​នោះ ឯកអគ្គរដ្ឋទូត​អ៊ីរ៉ង់​ប្រចាំ​នៅ​អង្គការ​សហប្រជាជាតិ​បាន​ប្រាប់​អ្នកយកព័ត៌មាន​ថា​​ ពេល​នេះ​លក្ខខណ្ឌ​មិន​សមស្រប​សម្រាប់​កិច្ចចរចា​ជាមួយ​សហរដ្ឋអាម៉េរិក​នោះ​ទ​។​

​លោក Majid Takht Ravanchi ឯកអគ្គរដ្ឋទូត​អ៊ីរ៉ង់​នេះ បាន​និយាយថា ” បរិយាកាស​នៃ​កិច្ចចរចា​បែបនេះ​មិនទាន់​ត្រៀម​ខ្លួន​រួចរាល់​នៅឡើយ​ទេ ” ។ “​អ្នក​មិន​អាច​ចាប់ផ្តើម​​ការចរចា​ជាមួយ​នរណា​ម្នាក់​ដែល​កំពុង​គំរាមកំហែង​និង​កំពុង​បំភិតបំភ័យ​អ្នកនោះ​ទេ​” ។​

​ក្រុមប្រឹក្សា​នេះ បាន​និយាយថា គ្រប់​ភាគី​ពាក់ព័ន្ធ​និង​ប្រទេស​ទាំងអស់​ក្នុង​តំបន់​ត្រូវ​មាន​ការអត់ធ្មត់​អតិបរមា ហើយ​ចាត់វិធានការ​និង​សកម្មភាព​ដើម្បី​កាត់បន្ថយ​ភាព​តាន​​តឹង​” ។​

​សេចក្តីថ្លែងការណ៍​ដែល​គាំទ្រ​ដោយ រុស្ស៊ី​ដែល​មិត្តភក្តិ​របស់​អ៊ីរ៉ង់ និង​សហរដ្ឋអាម៉េរិក បាន​និយាយថា “​សមាជិក​ក្រុមប្រឹក្សា​នេះ ជំរុញ​ឱ្យ​ដោះស្រាយ​ការខ្វែងគំនិត​គ្នា​ដោយ​សន្តិ​​វិធី និង​តាមរយៈ​ការចរចា​” ។​

​ដោយឡែក​អង់គ្លេស បារាំង និង អាល្លឺម៉ង់ បាន​អំពាវនាវ​ឱ្យ​កាន់​បន្ថយ​ភាព​តានតឹង​​និង​ធ្វើការ​ចរចា​ជាមួយនឹង​ការគោរព​ពេញលេញ​តាម​ច្បាប់​អន្តរជាតិ​៕​ដោយ​៖​សុខា​/sn/Ha

ក្រុមប្រឹក្សាសន្តិសុខ​សហប្រជាជាតិ អំពាវនាវ​ឱ្យ​មាន​ការចរចា​និង​វិធានការ​ដើម្បី​បញ្ចប់​ភាព​តានតឹង​នៅក្នុង​ឈូង​សមុទ្រ​ពែ​ក្ស​