ក្រុមហ៊ុន​ផលិត​រថយន្ត​ធន់​ធ្ងន់​ចិន មាន​គម្រោង​បង្កើន​ការ​នាំចូល​កម្ពុជា​ឱ្យបាន​ច្រើន​នាពេល​អនាគត​

344
គណៈប្រតិភូ​អ្នកកាសែត​អាស៊ាន​-​ចិន​ទស្សនកិច្ច​ទីក្រុង​ហយ​ណាន​,​ខេត្ត អាន​ហួយ ប្រទេស​ចិន​(​រូប សុផល​)

ដោយ​: សុផល / ទីក្រុង​ហយ​ណាន​, ខេត្ត អាន​ហួយ​: ក្រុមហ៊ុន Shanxi Automobile Group ដែល​ស្ថិត នៅក្នុង​ទីក្រុង​ហយ​ណាន ខេត្ត អាន​ហួយ ប្រទេស​ចិន គ្រោង​នឹង​បន្ថែម​ការនាំ​ចូល​រថយន្ត​ដឹកទំនិញ​ធន់​ធ្ងន់​ទៅ​កម្ពុជា ឱ្យបាន​ច្រើន​នាពេល​អនាគត​។ នេះ​ជាការ​លើកឡើង​របស់លោក ស៊ា​វ ម៉ា (Xiao Ma) អនុប្រធាន​ក្រុមហ៊ុន Shanxi Automobile Group​។​

​នៅក្នុង​ដំណើរ​ទស្សនកិច្ច​របស់​គណៈប្រតិភូ​អ្នកកាសែត​អាស៊ាន​-​ចិន​នៅ​រោងចក្រ​ដំឡើងរថយន្ត កាលពី​រសៀល​ថ្ងៃទី​២៩ ខែ ឧសភា ឆ្នាំ​២០១៨ លោក ម៉ា បាន​មានប្រសាសន៍ថា​បច្ចុប្បន្ន ការនាំចេញ​រថយន្ត​ទៅ​កម្ពុ​ជាមាន​ចំណួន​តិចតួច​នៅឡើយ​។​នៅពេល​អនាគត គ្រោង​នឹង​នាំចេញ​ឱ្យបាន​ច្រើន ព្រោះ​សេដ្ឋកិច្ចកម្ពុជា​កំពុង​រីកលូតលាស់​ល្អ​។​

​លោក​បានឱ្យដឹងថា Shanxi Automobile Group និង​ក្រុមហ៊ុន​អភិវឌ្ឍ​ឧស្សាហកម្ម​ហយ​ណាន បាន​វិនិយោគ​១.៥៩ ប៊ី​លាន​យ័ន ជាមួយ​សមត្ថភាព​ផលិតកម្ម​ប្រចាំឆ្នាំ​៥០​ម៉ឺន​គ្រឿង​។ ក្រុមហ៊ុន​មាន​ផ្ទៃដី​គ្របដណ្តប់​ជិត​៦៧​ហិកតា​។ បច្ចុប្បន្ន ការផលិត​បម្រើឱ្យ​ទីផ្សា​ក្នុងស្រុក និង​ទីផ្សារ​អាស៊ាន​។​

​គួរ​ជម្រាប​ថា នៅក្នុង​ថ្ងៃ​ដដែល​នោះ គណៈប្រតិភូ​អ្នកកាសែត​អាស៊ាន​-​ចិន ក៏បាន ទៅ ទស្សនា​តំបន់​អភិវឌ្ឍ​បច្ចេកវិទ្យា និង​សេដ្ឋកិច្ច​ទីក្រុង​ហយ​ណាន មជ្ឈមណ្ឌល​ទិន្នន័យ​ហយ​ណាន ក្រុមហ៊ុន​ឧស្សាហកម្ម​ធុន​ធ្ងន់ Triumph Heavy Industry Company រោងចក្រ​ផលិត​ឱសថ Guorui Pharmaceutical Co.,Ltd និង​តំបន់​សេដ្ឋកិច្ច​ឧស្សាហកម្ម និង​ទេសចរណ៍​មួយចំនួនទៀត​។​

​មជ្ឈមណ្ឌល​ទិន្នន័យ​ហយ​ណាន​(Huainan Big Data Exhibition Centre)​គឺជា​បណ្តុំ​បច្ចេកវិទ្យា​ទំនើប បង្ហាញ​ពី​ប្រព័ន្ធ​ទំនាក់ទំនង​ទូរស័ព្ទ អ៊ី​ន​ធើ​ណិ​ត ទីសាធារណៈ សេវាកម្ម និង​ពាណិជ្ជកម្ម​៕