ក្រុមហ៊ុន វី​ភី តវ៉ា​រឿង​ការដេញថ្លៃ ផ្លូវ​បេតុង​មួយ​ខ្សែ ក្នុង​ក្រុង​សៀមរាប មាន​ភាពមិនប្រក្រតី​

1567
ចែករម្លែក

ដោយៈ​អង្គរតូច​ /
​សៀមរាបៈ ប្រធាន​ក្រុមហ៊ុន វី​ភី (VP) បានដាក់​ពាក្យសុំ​តវ៉ា ស្តីពី​ភាពមិនប្រក្រតី ក្នុងការ​ដេញថ្លៃ​គម្រោង​មូលនិធិ​ឃុំ សង្កាត់ ដែលមាន​ការដេញថ្លៃ កាលពី​ថ្ងៃទី​៦ ខែមិថុនា ឆ្នាំ​២០១៨ នៅ​សង្កាត់​ស្វាយដង្គំ ក្រុង​សៀមរាប ដោយបាន​ចោទប្រកាន់ ចំពោះ​អនុប្រធាន​មន្ទីរធនធានទឹក ខេត្តសៀមរាប មួយរូប ពាក់ព័ន្ធ​នឹង​ការ​ឃាំង​មិនឱ្យ​ក្រុមហ៊ុន​ផ្សេងៗ ចូល​ដាក់ពាក្យ​ដេញថ្លៃ ក្នុង​ការធ្វើ​ផ្លូវ ព្រោះតែ​កាង​ឱ្យ​ក្រុមហ៊ុន លី សួរ ដែល​គេ​សន្យា​ផ្តល់​ទឹកតែ​។

​នៅក្នុង​ពាក្យសុំ​តវ៉ា ចុះ​ថ្ងៃទី​៨ ខែមិថុនា ឆ្នាំ​២០១៨ របស់លោក​សេន ហេង ប្រធាន​ក្រុមហ៊ុន វី​ភី (VP) ដែល​បាន​ដាក់ជូន លោក​អភិបាល នៃ​គណៈ​អភិបាល ខេត្តសៀមរាប បានលើកឡើងថា ការដេញថ្លៃ​គម្រោង​ផ្លូវ​បេតុង​អា​មេ នៅ​សង្កាត់​ស្វាយដង្គំ កាលពី​ថ្ងៃទី​៦ ខែមិថុនា ឆ្នាំ​២០១៨ មាន​ភាពមិនប្រក្រតី គ្មាន​ការប្រកួតប្រជែង ដោយ​លោក​ទីវ ណា​វុ​ត ជា​អនុប្រធាន​មន្ទីរ​ធនធានទឹក​ខេត្តសៀមរាប បានមក​ឃាំង​អ្នកទទួលការ​ក្រុមហ៊ុន​នានា មិនឱ្យ​ចូល​ដាក់ ពាក្យ​ដេញថ្លៃ ដើម្បី​កាង​ឱ្យ​ក្រុមហ៊ុន លី សួរ តាមរយៈ​ការសន្យា​ផ្តល់​ទឹកតែ​។ ក្រោយពី​ការដេញថ្លៃ​ចប់ លោក​ទីវ ណា​វុ​ត បាន​យកប្រាក់ ទៅ​ចែក​ឱ្យ​អ្នកទទួលការ​ក្រុមហ៊ុន នៅ​ផ្លូវ ៦០ ម្តុំ​ដី​ឡូ​តិ៍ ដែល​បង្កឱ្យមាន​ការឈ្លោះប្រកែក​គ្នា យ៉ាង​អនាធិបតេយ្យ​។​

​នៅក្នុង​ពាក្យសុំ​តវ៉ា​នោះដែរ លោក​សេន ហេង ប្រធាន​ក្រុមហ៊ុន វី​ភី (VP) បានស្នើ​សុំ​លោក​អភិបាល នៃ​គណៈ​អភិបាល ខេត្តសៀមរាប មេត្តា​ដាក់ឱ្យ​ដេញថ្លៃ​ឡើងវិញ នូវ​គម្រោង​មូលនិធិ​ឃុំ សង្កាត់ នៅ​សង្កាត់​ស្វាយដង្គំ ដែល​បានដាក់​ដេញថ្លៃ នៅ​ថ្ងៃទី​៦ ខែមិថុនា ឆ្នាំ​២០១៨ កន្លងមកនេះ​។​

​ករណី​ដេញថ្លៃ​ធ្វើ​ផ្លូវ ដែលមាន​លក្ខណៈ​ផ្តល់​ទឹកតែ​បែបនេះ បើតាម​ព័ត៌មាន ពី​ប្រភព​ដែល​អាច​ទុកចិត្តបាន ទម្លាយ​មក​ថា ផ្លូវ​បេតុង​ដែលជា​គម្រោង​មូលនិធិ​ឃុំ សង្កាត់ នៅ​សង្កាត់​ស្វាយដង្គំ ក្រុង​សៀមរាប ត្រូវបាន​ក្រុមហ៊ុន​របស់លោក អនុប្រធាន​មន្ទីរ​ធនធានទឹក​ខេត្តសៀមរាប រូបនេះ ជា​អ្នកដេញថ្លៃ​បាន ក្នុងតម្លៃ​ជិត ១៥ ម៉ឺន​ដុល្លារ ។ ការដេញថ្លៃ​នោះ គឺ​មានតែ​ក្រុមហ៊ុន លី សួរ មួយគត់ ឯ​អ្នកផ្សេង ចាំ​ទទួល​តែ​ទទួល​ទឹកតែ ពី​លោក ទីវ ណា​វុ​ត គឺ​ចប់ ។

​ប្រភព​បាន​បន្តថា ទង្វើ​មិន​ប្រក្រតី​របស់លោក ទីវ ណា​វុ​ត មិនមែនជា​ករណី​លើក​ទី​១ នោះទេ។ នៅក្នុង​ករណីនេះ លោក ទីវ ណា​វុ​ត អនុប្រធាន​មន្ទីរ​ធនធានទឹក ខេត្តសៀមរាប មិនអាច​សុំ​បំភ្លឺ​បានទេ ដោយ​ទូរស័ព្ទ​របស់លោក បាន​បិទ ។​

​លោក លី សំ​រិ​ទ្ធិ អភិបាលរង និង​ជា​អ្នកនាំពាក្យ សាលាខេត្ត​សៀមរាប បាន​ថ្លែង​តាម​ទូរស័ព្ទ​ថា ករណីនេះ លោក​នៅ​មិនទាន់​ទទួលបាន​ព័ត៌មាន​ទេ ដោយ​ទើប​មក​ព​ប្រជុំ ឯ​ភ្នំពេញ​។ ប៉ុន្តែ​បើ​មាន​អីចឹង​មែន ត្រូវ​ពិនិត្យឡើងវិញ ហើយ​បើ​រកឃើញ មាន​ភាពមិនប្រក្រតី គឺ​ត្រូវ​ដាក់ឱ្យ​ដេញថ្លៃ សាជាថ្មី ៕​v