ក្រុម​អ្នកវិទ្យាសាស្ត្រ​ចិន​កំពុង​បង្កើត​យានអវកាស​តាម​គំរូ​សត្វ​ឃ្មុំ អាច​ប្តូរ​រូបរាង​បាន​

522

​បណ្ឌិត្យសភា​បច្ចេកវិជ្ជា​យានអវកាស​ចិន (CALT) បានប្រកាស​ពី​ការអភិវឌ្ឍ​យានអវកាស​មួយ ដែលមាន​សមត្ថភាព​ប្តូរ​រូបរាង​របស់​វា​អំឡុងពេល​ហោះហើរ​។​

​យោងតាម​សេចក្តីប្រកាស​ដែល​បង្ហោះ​នៅលើ​វេ​ប​សាយ​ផ្លូវការ​របស់​បណ្ឌិត្យសភា​នេះ​បានឱ្យដឹងថា រូបរាងកាយ​សត្វ​ឃ្មុំ​គឺជា​គំរូ​ដើម​សម្រាប់​ការបង្កើត​យានអវកាស​នេះ​។​

CALT បាន​និយាយថា យានអវកាស​នេះ​ត្រូវគេ​រំពឹងថា​នឹង​កាត់បន្ថយ​ភាព​ធន់​អំឡុងពេល​ហោះហើរ​និង​សន្សំសំចៃ​ប្រេងឥន្ធនៈ​បន្ថែមទៀត​។​

​អ្នក​រចនា​ម៉ូត​យានអវកាស លោក ហ៊ូ គូ​តុង និយាយថា “​យើង​បាន​ផុសគំនិត​ចេញពី​រចនាសម្ព័ន្ធ​ពោះ​របស់​សត្វ​ឃ្មុំ ដែល​អនុញ្ញាតឱ្យ​សត្វ​ឃ្មុំ​បត់បែន​ដោយ​សេរី និង​គ្រប់គ្រង​ទិសដៅ​នៃ​ការហោះហើរ​របស់​វា​”​។​

​យោងតាម​លោក​ហ៊ូ អំឡុងពេល​ហោះហើរ​របស់​យានអវកាស​មួយ យាន​នេះ​ត្រូវ​ហោះ​ឆ្លងកាត់​តាម​បរិយាកាស​ផែនដី​២​ដង​។ អ្នកវិទ្យាសាស្ត្រ​រូបនេះ​បាន​កត់សម្គាល់ថា “​អំឡុង​ការផ្លាស់ប្តូរ​លើក​ទី​២ យានអវកាស​នេះ​ត្រូវ​ប្តូរ​រូបរាង​មួយសន្ទុះ ដោយសារ​និចលភាព​”​។ អ្នកវិទ្យាសាស្ត្រ​បាន​បន្តថា “​ការប្តូរ​រូបរាង​និង​ការកាត់បន្ថយ​ភាព​ធន់​តាម​វិធី​នេះ​គឺមាន​សារៈសំខាន់​ខ្លាំងណាស់​ដើម្បី​សន្សំសំចៃ​ប្រេង​”​។​

​របាយការណ៍​នេះ​ក៏បាន​និយាយ​ដែរ​ថា ផ្អែកលើ​មូលដ្ឋាន​នៃ​គំនិត​នេះ អ្នកជំនាញ​បាន​បង្កើត​យាន​គំរូ​លេងៗ​រួចទៅហើយ ដោយ​អនុញ្ញាតឱ្យ​ពួកគេ​រកឃើញថា ក្បាល​អាច​ប្តូរ​រូបរាង​របស់​យាន​នេះ​អាច​កាត់បន្ថយ​ការ​អូស​ទាក់​បរិយាកាស​ច្រើនជាង ២០ ភាគរយ​។​

​លោក​ហ៊ូបាន​កត់សម្គាល់ថា លទ្ធផល​វិជ្ជមាន​បែបនេះ “​មាន​សារៈសំខាន់​ណាស់ មិន​ត្រឹមតែ​សម្រាប់​ការអភិវឌ្ឍ​ឧស្សាហកម្ម​អវកាស​ទេ ប៉ុន្តែ​ក៏​សម្រាប់​ការអភិវឌ្ឍ​ពេលអនាគត​នៅក្នុង​ទីផ្សារ​ពាណិជ្ជកម្ម​នៃ​យានអវកាស​ផងដែរ​”៕ ដោយ៖ កញ្ញាដាលីស

យានអវកាស​យកតាម​គំរូ​សត្វ​ឃ្មុំ​នឹង​សន្សំសំចៃ​ប្រេង​បាន​យ៉ាងច្រើន