ខេត្តសៀមរាប បង្ហាញ​ពី​សក្តានុពល​វិស័យ​ទេសចរណ៍​នៅក្នុង​ខេត្ត ដោយ​ទទួលបាន​ការចាប់អារម្មណ៍​ខ្ពស់​នៅក្នុង​តំបន់ និង​អន្ដរជាតិ​

493
ចែករម្លែក

ដោយ​: បាយ័ន​
​សៀមរាប​:
កាលពី​ព្រឹក​ថ្ងៃទី​១០ ខែកក្កដា ឆ្នាំ​២០១៩​នេះ នៅ​សណ្ឋាគារ​បុរី​អង្គរ ខេត្តសៀមរាប មាន​រៀបចំ​ពិធី​បើក​កិច្ចប្រជុំ​កម្រិត​អគ្គនាយក​ទេសចរណ៍​អាស៊ាន​លើក​ទី​៥០ (ASEAN NTOs) ជា​ផ្លូវការ ក្រោម​អធិបតីភាព​លោក ថោង ខុន រដ្ឋមន្ត្រី​ក្រសួងទេសចរណ៍​កម្ពុជា ,​លោក ទៀ សីហា អភិបាលខេត្ត​សៀមរាប និង លោក PG Kamalrudzaman Haji Mohd Ishak អគ្គលេខា​នៃ​ក្រសួង​ធនធាន​ឧស្សាហកម្ម និង​ទេសចរណ៍ នៃ​ប្រទេស​ប្រ៊ុយណេ ដែលជា​ប្រធាន​អង្គប្រជុំ ASEAN NTOs លើក​ទី​៥០ និង​កិច្ចប្រជុំ​ពាក់ព័ន្ធ ដែល​កិច្ចប្រជុំ​នេះ​ផងដែរ​មាន​រយៈពេល​៣​ថ្ងៃ​ចាប់​ពីថ្ងៃ​១០ ដល់​ថ្ងៃទី​១២ ខែកក្កដា​។

​ក្រៅពី​កិច្ចប្រជុំ ASEAN NTOs អាស៊ាន​នេះ ក៏មាន​កិច្ចប្រជុំ ASEAN NTOs បូក​៣ ដែលមាន​ប្រទេស​ចិន ជប៉ុន និង​កូរ៉េខាងត្បូង និង​មាន​កិច្ចប្រជុំ​ក្នុង​ក្របខណ្ឌ​មជ្ឈមណ្ឌល​អាស៊ាន​-​ចិន , មជ្ឈមណ្ឌល​អាស៊ាន​-​ជប៉ុន និង​មជ្ឈមណ្ឌល​អាស៊ាន​-​កូរ៉េខាងត្បូង ព្រមទាំង​មាន​កិច្ចប្រជុំ​ជាមួយ​ដៃគូ​សន្ទនា​ផ្សេងទៀត​ផងដែរ​។​

​លោក ទៀ សីហា អភិបាលខេត្ត​សៀមរាប បាន​ថ្លែង​ក្នុងឱកាស​បើក​កិច្ចប្រជុំ ASEAN NTOs និង​កិច្ចប្រជុំ​ដែល​ពាក់ព័ន្ធ​ផ្សេងៗ​ថា ខេត្ត សៀមរាប គឺជា​មជ្ឈមណ្ឌល​សេដ្ឋកិច្ច​ដ៏​សំខាន់​របស់​ព្រះរាជាណាចក្រ​កម្ពុជា ដោយ​ផ្អែកលើ​សក្តានុពល​ទេសចរណ៍ រួមទាំង​សម្បត្តិ​បេតិកភណ្ឌ​វប្បធម៌​ដ៏​សម្បូរបែប តំបន់​ប្រវត្តិសាស្ត្រ​ធម្មជាតិ​ដែលមាន​ប្រាសាទបុរាណ​រាប់រយ​គ្របដណ្តប់​លើ​ផ្ទៃដី​ទំហំ ៤០១ គីឡូម៉ែត្រ​ការ៉េ ជាពិសេស​ប្រាសាទអង្គរវត្ត​ដែលជា​តំបន់​បេតិកភណ្ឌ​ពិភពលោក​។​

​លោក​អភិបាលខេត្ត​បាន​បន្តថា លើសពីនេះ​ទៀត ខេត្តសៀមរាប ត្រូវបាន​គេ​ស្គាល់​ថា​ជា​តំបន់​បេតិកភណ្ឌ​ពិភពលោក ដែល​បាន​ក្លាយទៅជា​តំបន់​ទេសចរណ៍​ដ៏​ល្បីល្បាញ​បំផុត​មួយ​។​

​លោក ទៀ សីហា បាន​មានប្រសាសន៍​ទៀតថា ខេត្តសៀមរាប បាន​ក្លាយជា​មជ្ឈមណ្ឌល​ទេសចរណ៍​អន្តរជាតិ ដែល​ទទួលបាន​ភ្ញៀវទេសចរ​អន្តរជាតិ ចំនួន​ពាក់កណ្តាល នៃ​ចំនួន​ភ្ញៀវទេសចរ​សរុប​ប្រទេស​កម្ពុជា ខណៈដែល​កាល​នៅក្នុង​ខែមិថុនា ឆ្នាំ ២០១៦ ក្រសួងទេសចរណ៍ នៃ​ព្រះរាជាណាចក្រ​កម្ពុជា បានទទួល​ពានរង្វាន់ «​ប្រទេស​កម្ពុជា គឺជា​គោលដៅ​ទេសចរណ៍​ដ៏​ល្អ​បំផុត​នៅលើ​ពិភពលោក​» ផ្តល់ជូន​ដោយ​ក្រុមប្រឹក្សា​ទេសចរណ៍ និង​ពាណិជ្ជកម្ម​អ៊ឺរ៉ុប ដោយបាន​ប្រកាស​ជា​ផ្លូវការ​ថា «​ប្រទេស​កម្ពុជា គឺជា​គោលដៅ​ទេសចរណ៍វប្បធម៌​ដ៏​ពេញនិយម​បំផុត​ក្នុង​ឆ្នាំ​២០១៦»​។​

​នេះ​គឺជា​មោទនភាព​ផងដែរ​សម្រាប់​ខេត្តសៀមរាប ដែល​ប្រាសាទអង្គរវត្ត​ត្រូវបាន​គេ​ចាត់ទុកថា​ជា​គោលដៅ​ទេសចរណ៍​ដ៏​អស្ចារ្យ​នៅ អាស៊ី​សម្រាប់​ឆ្នាំ​២០១៦ និង​ក្នុង​ឆ្នាំ​២០១៧ ឆ្នាំ​២០១៨ ប្រាសាទអង្គរវត្ត​ត្រូវបាន​បោះឆ្នោត​ជ្រើសរើស​ទីតាំង​ទេសចរណ៍​ល្អ​បំផុត​លើ​ពិភពលោក​ដោយ​គេហទំព័រ​ទេសចរណ៍ Trip Advisor

​លោក ទៀ សីហា ក៏បាន​បន្ថែមថា នៅក្នុង​ឆ្នាំ​២០១៨ ខេត្តសៀមរាប​ទទួលបាន​ភ្ញៀវទេសចរ​ជាតិ​សរុប​ចំនួន ៣.២៤៩.៧៤៧ នាក់ កើនឡើង ៥,៣​ភាគរយ និង​ភ្ញៀវទេសចរ​អន្តរជាតិ​ចំនួន ២.៥៩០.៨១៥ នាក់ នៅក្នុង​ឆ្នាំ កើនឡើង ៥,៤៣​ភាគរយ បើ​ប្រៀបធៀប​ទៅនឹង​រយៈពេល​ដូចគ្នា​ក្នុង​ឆ្នាំ ២០១៧ ហើយ​ដើម្បី​ឆ្លើយតប​ទៅនឹង​តម្រូវការ​របស់​ភ្ញៀវទេសចរ ដែល​បាន​កើនឡើង​ពីមួយថ្ងៃ​ទៅមួយថ្ងៃ យើង​បាន​អភិរក្ស និង​អភិវឌ្ឍ​ផលិតផល​ទេសចរណ៍ ក៏ដូចជា​តំបន់​វប្បធម៌ ប្រវត្តិសាស្ត្រ និង​ធម្មជាតិ ជាពិសេស​ជីវចម្រុះ នៅ​បឹង​ទន្លេសាប និង​តំបន់​ជុំវិញ​បឹង​ទន្លេសាប រួមទាំង​ការពង្រឹង​អនាម័យ​បរិស្ថាន និង​លើកកម្ពស់ គុណភាព​សេវាកម្ម​ដើម្បី​ធានា​ដល់​ការអភិវឌ្ឍ​វិ​ស័​ទេសចរណ៍​របស់​ខេត្តសៀមរាប​ប្រកបដោយ​និរន្តរភាព និង ទំនួល​ខុសត្រូវ​ផងដែរ​ដើម្បី​ទទួលបាន​នូវ «​ទីក្រុង​ស្អាត រមណីយដ្ឋាន​ស្អាត សេវា​ល្អ​» និង «​ប្រទេស​កម្ពុជា ជា​ព្រះរាជាណាចក្រ​អច្ឆរិយៈ​»៕ ល​