ខ្យល់​កន្ត្រាក់​បំផ្លាញ​ផ្ទះ​៨​ខ្នង និង​ដើម​មៀន​ប៉ៃលិន ជិត​៣០០​ដើម​

1109
ចែករម្លែក

ដោយៈ​អ៊ុង​សា​រុំ​/
​ប៉ៃលិនៈ​ភ្លៀង​ធ្លាក់​លាយឡំ​ខ្យល់​កន្ត្រាក់ បាន​បោកបក់​ទៅលើ​ខេត្ត​ប៉ៃលិន បណ្ដាលឱ្យ​ផ្ទះ​ប្រជាពលរដ្ឋ នៅក្នុង​ស្រុក​សាលា​ក្រៅ និង​ក្រុងប៉ៃលិន ចំនួន​៨​ខ្នង (​ដូ​ល​រលំ​៥​ខ្នង​) បើក​ដំបូល (​ខូចខាត​មធ្យម​ចំនួន​៣​ខ្នង​) និង​ដើម​មៀន​ប៉ៃលិន ជិត​៣០០​ដើម​ទៀត ដូ​ល​រលំ​។ ករណីនេះ ពុំមាន​បង្ករ​គ្រោះថ្នាក់ ដល់​មនុស្ស សត្វ​នោះទេ​។ បន្ទាប់ពី​ឧបទ្ទវ​ហេតុនេះ បាន​កើតឡើង​កាលពី​ល្ងាច​ថ្ងៃទី​២០​ខែមីនា​ឆ្នាំ​២០១៨ នៅក្នុង​ក្រុងប៉ៃលិន និង​ស្រុក​សាលា​ក្រៅ​ខេត្ត​ប៉ៃលិន អាជ្ញាធរ និង​សាខា​កាកបាទក្រហម បាន​ចុះជួយ​អន្តរាគមន៍ និង​ផ្ដល់ជំនួយ​សង្គ្រោះបន្ទាន់ ភ្លាមៗ​ផងដែរ​។​

​បើតាម​ប្រភពពី​អាជ្ញាធរ​មូលដ្ឋាន បានឱ្យដឹងថាៈ មាន​ភ្លៀង​មួយ​មេ​លាយឡំ ​ដោយ​ខ្យល់ព្យុះ​កន្ត្រាក់ បោកបក់​មក​ចំ ​ខេត្ត​ប៉ៃលិន មានស្រុក​សាលា​ក្រៅ និង​ក្រុងប៉ៃលិន បណ្ដាលឱ្យ​ផ្ទះ​ប្រជាពលរដ្ឋ នៅក្នុង​ស្រុក​សាលា​ក្រៅ រួមមាន ភូមិ​ភ្នំ​ព្រាល របើក​ដំបូលផ្ទះ​ចំនួន​៤​ខ្នង (​ខូចខាត​ធ្ងន់​ចំនួន ៣ ខ្នង ដួលរលំ​)​។ ភូមិ​ភ្នំ​ក្រិ​ញ ខូចខាត​ផ្ទះមួយ​ខ្នង (​ខូចខាត​មធ្យម របើក​ដំបូល​) និង​រោង​បាយ​វត្តភ្នំ​ក្រិ​ញ​មួយ​ខ្នង (​ខូចខាត​ធ្ងន់ ដូ​ល​រលំ​)​។ ភូមិ​អន្លង់​រក្សា ខូចខាត​ផ្ទះមួយ​ខ្នង (​ខូចខាត​ធ្ងន់ ដួលរលំ​)​។ ភូមិ​អូរ​កន្ធៀ​ង​វ៉ា ខូចខាត​ផ្ទះមួយ​ខ្នង (​ខូចខាត​ស្រាល របើក​ដំបូល​) និង​បាក់​ដើម​មៀន​ប៉ៃលិន អស់​ចំនួន​២៦៦​ដើម​។

​ចំណែក​នៅក្នុង​ក្រុងប៉ៃលិន ក្នុងភូមិ​ប៉ាង​រលឹម​ខូចខាត​ផ្ទះមួយ​ខ្នង​(​ខូចខាត​ធ្ងន់​ដួលរលំ​) និង​សាយ​ឡូ (​ទីតាំង​ឃ្លាំង​) ទិញ​ពោត ដំឡូង ចំនួន​មួយ​ខ្នង (​ខូចខាត មធ្យម​របើក​ដំបូល​ជញ្ជាំង​)​។​

​ប្រភព​បាន​បញ្ជាក់ថា អាជ្ញាធរ​មូលដ្ឋាន និង​សាខា​អនុសាខា​កាកបាទក្រហម​ខេត្ត កំពុង​ចុះ​ពិនិត្យ​ជាក់ស្ដែង ដើម្បី​ផ្តល់ជំនួយ​សង្គ្រោះបន្ទាន់ ដល់​ប្រជាពលរដ្ឋ ជួប​គ្រោះធម្មជាតិ ឱ្យបាន​ទាន់ពេលវេលា​ផងដែរ​។

​សូមបញ្ជាក់ថា ការខូចខាត​ទ្រព្យសម្បត្តិ​ផ្ទះសម្បែង គិត​ជា​ទឹកប្រាក់ នៅ​មិនទាន់​ដឹង​នៅឡើយ ព្រោះ​អាជ្ញាធរ សមត្ថកិច្ច កំពុង​ចុះ​ពិនិត្យ​ជាក់ស្ដែង​នៅឡើយ​៕V