គណបក្ស​ប្រជាជន​កម្ពុជា​ស្រុក​ព្រៃឈរ ប្តេជ្ញា​ផ្តល់​សេវា​គាំពារ​សុខមាលភាព​កាន់តែ​ប្រសើរ និង​ឥត​បង់ថ្លៃ​ក្នុង​អា​ណិ​ត្ត​ទី​៦​ខាងមុខ​

845
ចែករម្លែក

​ដោយ​: ពៅ និមល / ភ្នំពេញ​: លោក ប៉ាន សូរ​ស័ក្តិ ប្រធាន​ក្រុមការងារ​ថ្នាក់កណ្តាល​ចុះជួយ​ស្រុក​ព្រៃឈរ និង​ជា​បេក្ខជន​តំណាងរាស្ត្រ​គណបក្ស​ប្រជាជន​កម្ពុជា សម្រាប់​មណ្ឌល​ខេត្តកំពង់ចាម បាន​គូសបញ្ជាក់ថា រាជរដ្ឋាភិបាល​ដឹកនាំ​ដោយ​គណបក្ស​ប្រជាជន​កម្ពុជា នឹង​បន្ត​លើកកម្ពស់​សេវា​គាំពារ​សុខមាលភាព​ទូទាំងប្រទេស ឲ្យ​កាន់តែ​ប្រសើរ​ថែមទៀត ទន្ទឹមគ្នា​នឹង​ការផ្តល់ជូន​សេវា​ពិនិត្យ​សុខភាព​ឥតគិតថ្លៃ (​មិន​បង់ប្រាក់​) ដល់​ប្រជាពលរដ្ឋ​ក្រីក្រ និង​ខ្វះ​លទ្ធភាព​ទូទៅ​។​

​នៅក្នុង​ឱកាស​ចុះ​យុទ្ធនាការ​ឃោសនាបោះឆ្នោត​ជ្រើសរើស​តំណាងរាស្ត្រ​នីតិកាល​ទី​៦ ដើម្បី​ស្វែងរក​សម្លេងឆ្នោត​ពី​ប្រជាពលរដ្ឋ នៅក្នុង​ឃុំ​សូរ​សែន្យ ស្រុក​ព្រៃឈរ ខេត្តកំពង់ចាម កាលពី​រសៀល​ថ្ងៃទី​១២ ខែកក្កដា ឆ្នាំ​២០១៨​កន្លងទៅនេះ លោក​ប្រធាន​បាន​ជម្រាប​បងប្អូន​ប្រជាពលរដ្ឋ​បន្តថា គណបក្ស​ប្រជាជន​កម្ពុជា នឹង​បន្ត​ពង្រឹង​សេវា​គាំពារ​សុខមាលភាព​ជូន​ប្រជាពលរដ្ឋ​តាមរយៈ​របប​បេឡា​សន្តិសុខ​សង្គម ដែល​ហៅ​កាត់ (​ប​.​ស​.​ស​) និង​ផ្តល់ជូន​ការពិនិត្យ​សុខភាព​ដោយ​ឥតគិតថ្លៃ​នៅតាម​មណ្ឌល​សុខភាព និង​មន្ទីរពេទ្យ​រដ្ឋ ដូច​នៅតាម​ប្រទេស​ជឿនលឿន​នានា​។

​ជាមួយគ្នានេះ លោក​ប្រធាន​បាន​រម្លឹក​ជូន​អង្គពិធី​ទៀតថា គ្រាន់តែ​នៅក្នុង​ស្រុក​ព្រៃឈរ លោក​បានផ្តល់​អំណោយ​រថយន្ត​សង្គ្រោះបន្ទាន់​ចំនួន​០២​គ្រឿង ដើម្បី​ទុក​ដឹកជញ្ជូន​បងប្អូន​ពេល​មាន​ជម្ងឺ​ធ្ងន់ធ្ងរ ឬ​គ្រោះអាសន្ន​ផ្សេងៗ​ដោយ​ឥតគិតថ្លៃ​។ រថយន្ត​នេះ​អាចជួយ​សង្គ្រោះ​អាយុជីវិត​បងប្អូន​ទាន់ពេលវេលា និង​អាច​កាត់បន្ថយ​ការចំណាយ​លើ​សេវា​ដឹកជញ្ជូន គឺ​បងប្អូន​គ្រាន់តែ​ហៅ​លេខ​ទូរស័ព្ទ ដែល​បិទ​នៅលើ​រថយន្ត​ទាំងពីរ​តែប៉ុណ្ណោះ​។​

​ឆ្លៀត​ក្នុងឱកាស​នោះ លោក ប៉ាន សូរ​ស័ក្តិ បានលើកឡើង​នូវ​សារ​នយោបាយ​របស់​ប្រធាន​គណបក្ស​ប្រជាជន​កម្ពុជា សម្តេច​តេ​ជោ ហ៊ុន សែន ដែលមាន​ខ្លឹមសារ​ផ្តោត​សំខាន់​ទៅលើ​សមិទ្ធផល​ចម្បងៗ និង​ស្នាដៃ​ដឹកនាំ​រយៈពេល​៣៩​ឆ្នាំ​របស់​គណបក្ស ក្នុងការ​ស្តារ​និង​អភិវឌ្ឍ​ប្រទេស​ចេញពី​គំនរ​ផេះផង់​នៃ​ភ្លើងសង្គ្រាម​រហូត​ទទួលបាន​សុខសន្តិភាព​និង​វឌ្ឍនភាព ព្រមទាំង​កិត្តិនាម​ល្បី​រន្ទឺ​នៅលើ​ឆាក​អន្តរជាតិ​។​

គួរ​រម្លឹក​ទៀតថា យុទ្ធនាការ​ឃោសនាបោះឆ្នោត​ជ្រើសតាំង​តំណាងរាស្ត្រ​នីតិកាល​ទី​៦ នឹង​ប្រព្រឹត្តិ​ទៅ​រយៈពេល​២១​ថ្ងៃ ចាប់ពី​ថ្ងៃទី​០៧ ដល់​ថ្ងៃទី​២៧ ខែកក្កដា ឆ្នាំ​២០១៨ ហើយ​ការបោះឆ្នោត​នឹង​ប្រព្រឹត្តទៅ​នៅ​ថ្ងៃទី​២៩ ខែកក្កដា ដោយមាន​គណបក្ស​ចំនួន​២០ ចូលរួម​ប្រកួតប្រជែង​៕ ល​