គណបក្ស​ប្រជាជន​កម្ពុជា​ថ្កោលទោស​ជន​ក្បត់ជាតិ​សម រង្ស៊ី ប្រមាថ​ព្រះមហាក្សត្រ

661
ចែករម្លែក

ដោយ​: មុនី​រ័ត្ន​/​ភ្នំពេញៈ គណបក្ស​ប្រជាជន​កម្ពុជា បាន​ថ្កោលទោស​យ៉ាង​ដាច់អហង្ការ​ចំពោះ​ជន​ក្បត់ជាតិ សម រង្ស៊ី ដែល​បាន​ប្រមាថ​យ៉ាង​គ​ឃ្លី​ន​បំផុត ចំពោះ​អង្គ​ព្រះមហាក្សត្រ ជាទីគោរព​សក្ការៈ​ដ៏​ខ្ពង់ខ្ពស់​បំផុត នៃ​ព្រះរាជាណាចក្រ​កម្ពុជា តាមរយៈ​ការផ្តល់​កិច្ចសម្ភាសន៍​ជាមួយ​វិទ្យុ​អាស៊ីសេរី នា​យប់​ថ្ងៃទី​១២ ខែកញ្ញា ឆ្នាំ​២០១៩ ដែលមាន​ខ្លឹមសារ​ថា “​ព្រះមហាក្សត្រ​របស់​យើង គឺជា​ចំណាប់ខ្មាំង​របស់ ហ៊ុន សែន ។​ដូច្នេះ​លោក​អត់​ហ៊ាន​ធ្វើ​អី​ទេ​លោក​ខ្លាច ហ៊ុន សែន លោក​ចង់តែ​រក្សា​រាជបល្ល័ង្គ​លោក ដូច្នេះ​យើង​ទុក​ព្រះអង្គ​មួយអន្លើ​ទៅ យើង​មិនអាច​រំពឹង​ព្រះមហាក្សត្រ​ដែលជា​អាយ៉ង​របស់លោក ហ៊ុន សែន ដូច​សព្វថ្ងៃ​ទេ​បាទ​”​។ នេះ​បើ​យោងតាម​សេចក្តីថ្លែងការណ៍​របស់​គណបក្ស​ប្រជាជន​កម្ពុជា​កាលពី​ថ្ងៃទី​១៣ ខែកញ្ញា ឆ្នាំ​២០១៩​។​


​សេចក្តីថ្លែងការណ៍​បាន​បន្តថា គណបក្ស​ប្រជាជន​កម្ពុជា ក៏ដូចជា​សម្តេច​អគ្គមហាសេនាបតី​តេ​ជោ ហ៊ុន សែន បាន​គោរព​យ៉ាង​ម៉ឺងម៉ាត់​នូវ​រដ្ឋធម្មនុញ្ញ នៃ​ព្រះរាជាណាចក្រ​កម្ពុជា និង​បន្ត​ការពារ​យ៉ាង​ប្តូរផ្តាច់​បំផុត ព្រះករុណា​ព្រះបាទ​សម្តេច​ព្រះបរមនាថ នរោត្តម សីហមុនី ព្រះមហាក្សត្រ នៃ​ព្រះរាជាណាចក្រ​កម្ពុជា ដែល​ជាទីគោរព​ស្រឡាញ់​ស្មើ​ជីវិត​របស់​ប្រជារាស្ត្រ​ខ្មែរ​ទូទៅ ដោយ​មិន​ឲ្យ​នរណា​រំលោភបំពាន​បានជា​ដាច់ខាត​។​
​ជាមួយគ្នានេះ គណបក្ស​ប្រជាជន​កម្ពុជា សូម​អាជ្ញា​ធរមាន​សមត្ថកិច្ច​ដែល​ពាក់ព័ន្ធ​ចាត់វិធានការ​តាមផ្លូវ​ច្បាប់​ជាបន្ទាន់ និង​តឹងរ៉ឹង​បំផុត​ចំពោះ​ទង្វើ​រំលោភបំពាន​ដ៏​ធ្ងន់ធ្ងរ​លើ​អង្គ​ព្រះមហាក្សត្រ និង​លើ​រដ្ឋធម្មនុញ្ញ​នៃ​ព្រះរាជាណាចក្រ​កម្ពុជា ខាងលើនេះ​៕