គម្រោង​អភិវឌ្ឍន៍​ប្រទេស​បី​ឆ្នាំ ជាង ១៤​ពាន់​លាន​ដុល្លារ នឹង​សម្រេច​ជោគជ័យ​!

570
ចែករម្លែក

សេចក្តីព្រាង “​កម្មវិធី​វិនិយោគសាធារណៈ​បី​ឆ្នាំ​រំកិល ២០២០-២០២២” ត្រូវបាន​អនុម័ត ដោយ​កិច្ចប្រជុំពេញអង្គ​គណៈរដ្ឋមន្ត្រី កាលពី​ព្រឹក​ថ្ងៃទី​៣០ ខែសីហា ឆ្នាំ​២០១៩​។ រយៈពេល​បី​ឆ្នាំនេះ​រាជរដ្ឋាភិបាល គ្រោង​នឹង​ចំណាយ​សរុប ១៤.៤៨៧​លាន​ដុល្លារ អាម៉េរិក​សម្រាប់​កម្មវិធី​វិនិយោគសាធារណៈ សរុប​ចំនួន​ជាង ៦០០ គម្រោង​។​

​សេចក្តីព្រាង​”​កម្មវិធី​វិនិយោគសាធារណៈ​បី​ឆ្នាំ​រំកិល​២០២០-២០២២” ធ្វើឡើង​ក្នុង គោលបំណង​ធ្វើការ​បង្ហាញ​ពី​ទិន្នន័យ​គម្រោង​វិនិយោគ​ដែលមាន​អាទិភាព​ខ្ពស់​របស់ ក្រសួង​ស្ថាប័ន​នៃ​រាជរដ្ឋាភិបាល​កម្ពុជា​ដែលជា​គោលនយោបាយ​មានចែង​នៅក្នុង​យុទ្ធសាស្ត្រ​ចតុកោណ​ដំណាក់កាល​ទី​៤​និង​ជា​ផែនទី​ចង្អុល​ផ្លូវ​សម្រាប់​ការអនុវត្ត​គោលនយោបាយ ដែល​មានចែង​ក្នុង​ផែនការ​យុទ្ធសាស្ត្រ​អភិវឌ្ឍន៍​ជាតិ​(​ផ​.​យ​.​អ​.​ជ​.) ២០១៩-២០២៣ ។

​ក្នុង​កម្មវិធី​វិនិយោគសាធារណៈ រយៈពេល​បី​ឆ្នាំនេះ ជា​មធ្យម រាជរដ្ឋាភិបាល​គ្រោង ចំណាយ​ប្រមាណ ៤.៨២៩​លាន​ដុល្លារ ដើម្បី​ឲ្យ​បាន​ស្របតាម​ស្ថានភាព​ជាក់ស្តែង​នៃ ការប្រែប្រួល​ថ្លៃទំនិញ និង​អតិផរណា​ហើយក៏​ផ្អែកលើ​បរិមាណ​ហិរញ្ញប្បទាន​សហ ប្រតិបត្តិ​ការដែល​ដៃគូ​អភិវឌ្ឍន៍​ធ្លាប់បាន​សន្យា​។​

​កម្មវិធី​វិនិយោគសាធារណៈ ៣​ឆ្នាំ​រំកិល ២០២០-២០២២ មាន​គម្រោង​សរុប​ជាង ៦០០​គម្រោង ដែល​ក្នុងនោះ មាន​ចំនួន ១៧១ គម្រោង ជា​គម្រោង​កំពុងដំណើរការ ដែល​ត្រូវការ​ទុន​ចំនួន ៧.៥៣៧ លាន​ដុល្លារ និង​ចំនួន ៤៣៨ គម្រោង ជា​គម្រោង សម្រាប់​អនុវត្ត ផ​.​យ​.​អ​.​ជ​. ដែល​ត្រូវការ​ទុន​ចំនួន ៦.៩៥០ លាន​ដុល្លារ ។ ជា​សរុប បរិមាណ​ទុន​តាម​ឆ្នាំ​របស់​កម្មវិធី​វិនិយោគសាធារណៈ ៣​ឆ្នាំ​រំកិល ២០២០-២០២២ រួមមាន ឆ្នាំ​២០២០ ចំនួន ៤ ៥៥៦ លាន​ដុល្លារ​,​ឆ្នាំ​២០២១ ចំនួន ៥ ១០៤ ដុល្លារ និង​ឆ្នាំ​២០២២ ចំនួន ៤.៨២៧ លាន​ដុល្លារ ។

​ក្នុង​បរិមាណ​ទុន​សរុប ១៤.៤៨៧ លាន​ដុល្លារ​នៃ​កម្មវិធី​វិនិយោគសាធារណៈ​បី​ឆ្នាំ​រំកិល ២០២០-២០២២ បានមកពី​ការសន្យា​ផ្តល់​ដោយ​រាជរដ្ឋាភិបាល​កម្ពុជា និង​ដៃគូ អភិវឌ្ឍន៍ រួចហើយ មាន​ចំនួន ៨.៥៩៧ លាន​ដុល្លារ (​ក្នុងនោះ​ពី​រាជរដ្ឋាភិបាល កម្ពុជា​ចំនួន ៥២៩,៨ លាន​ដុល្លារ និង​ពី​ដៃគូ​អភិវឌ្ឍ​ចំនួន ៨.០៦៧,៥​លាន​ដុល្លារ​)​។

​គម្រោង​នានា​របស់​កម្មវិធី​វិនិយោគសាធារណៈ ៣​ឆ្នាំ​រំកិល ២០២០-២០២២ ត្រូវបាន បែងចែក​តាម​វិស័យ​ដូច​បានកំណត់​នៅក្នុង​ផែនការ​យុទ្ធសាស្ត្រ​អភិវឌ្ឍន៍​ជាតិ ២០១៩-២០២៣ រួមមាន ៦,៥​ភាគរយ នៃ​តម្រូវ​ការចំណាយ​វិនិយោគសាធារណៈ​សរុប សម្រាប់​អនុវត្ត​គម្រោង​ក្នុង​វិស័យ​សង្គមកិច្ច ។ ៣២,៧​ភាគរយ​នៃ​តម្រូវ​ការចំណាយ វិនិយោគសាធារណៈ​សរុប សម្រាប់​អនុវត្ត​គម្រោង​ក្នុង​វិស័យសេដ្ឋកិច្ច​។ ៥៣,៨​ភាគ រយ នៃ​តម្រូវ​ការចំណាយ​វិនិយោគសាធារណៈ សរុប​សម្រាប់​អនុវត្ត​គម្រោង​ក្នុង វិស័យ​ហេដ្ឋារចនាសម្ព័ន្ធ​។ ៧,០​ភាគរយ​នៃ​តម្រូវ​ការចំណាយ​វិនិយោគសាធារណៈ សរុប សម្រាប់​អនុវត្ត​គម្រោង​ក្នុង​វិស័យ​សេវា និង​កម្មវិធី​អន្តរ​វិស័យ ។​

​រាជរដ្ឋាភិបាល បាន​បញ្ជាក់ថា ការធានា​ឲ្យ​មាននូវ​កម្មវិធី​វិនិយោគសាធារណៈ​មួយ នឹងត្រូវ​រួមចំណែក​ក្នុងការ​ធ្វើ​ឲ្យ​មាន​កំណើន​សេដ្ឋកិច្ចជាតិ​ទាំងមូល​ក៏ដូចជា​ធ្វើជា ឧបករណ៍​ផ្នែក​គោលនយោបាយ សម្រាប់​ប្រែក្លាយ​គោលនយោបាយ​អាទិភាព​ជាតិ ឲ្យ​ទៅជា​ការពិត​ជាក់​សែ្ត​ង គឺជា​ប្រការ​ចាំបាច់​នៅក្នុង​ដំណើរការ​នៃ​ការរៀបចំ​គោល នយោបាយ​អភិវឌ្ឍន៍​សង្គម​សេដ្ឋកិច្ច​។​

​តាម​ការបែងចែក​ចំណាយ​វិនិយោគសាធារណៈ រយៈពេល​បី​ឆ្នាំនេះ គឺ ៥៣,៨​ភាគរយ នៃ​តម្រូវ​ការចំណាយ​សរុប ១៤.៤៨៧ លាន​ដុល្លារ ដែល​ស្មើ​ប្រមាណ​ជាង​៧​ពាន់ លាន​ដុល្លារ ត្រូវបាន​បែងចែក សម្រាប់​អនុវត្ត​គម្រោង​ក្នុង​វិស័យ​ហេដ្ឋារចនាសម្ព័ន្ធ​។ វិស័យ​ហេដ្ឋារចនាសម្ព័ន្ធ ដែលមាន​ផ្លូវ ស្ពាន ប្រព័ន្ធ​លូ ទឹក ភ្លើង ជាដើម​គឺ​សុទ្ធសឹង តែ​ប្រជាពលរដ្ឋ ជា​អ្នកទទួលបាន​ផលប្រយោជន៍ និង​ប្រើប្រាស់​ដោយផ្ទាល់​ពី​គម្រោង ទាំងនោះ​។​

​ដើម្បី​សម្រេចបាន​ផែនការ​រយៈពេល ៣​ឆ្នាំ ចាប់ពី​ឆ្នាំ​២០២០ ដល់​ឆ្នាំ​២០២២​គឺ​រាជ​រដ្ឋា ភិ​បាល ត្រូវការ​ថវិកា ៥.៨៩០ លាន​ដុល្លារ​ទៀត ខណៈដែល​មកដល់ពេលនេះ រាជរដ្ឋាភិបាល ទទួលបាន​ថវិកា​ចំនួន ៨.៥៩៧ លាន​ដុល្លារ (​ក្នុងនោះ​ពី​រាជរដ្ឋាភិបាល កម្ពុជា​ចំនួន ៥២៩,៨ លាន​ដុល្លារ និង​ពី​ដៃគូ​អភិវឌ្ឍ ចំនួន ៨.០៦៧,៥​លាន​ដុល្លារ​)​។

​តើ​អាច​សម្រេច​បានទេ ក្នុង​រយៈពេល​បី​ឆ្នាំ គិតពី​ឆ្នាំ​២០២០ ដល់​ឆ្នាំ​២០២២? បើតាម កំណើនសេដ្ឋកិច្ច គឺ​កម្ពុជា​យើង​កំពុង​រីកចម្រើន​ដោយមាន​កំណើនសេដ្ឋកិច្ច​ប្រមាណ ជាង ៧​ភាគរយ ក្នុង​មួយឆ្នាំ​។ ដោយឡែក ដៃគូ​អភិវឌ្ឍ ក៏​មិន​បោះបង់​កម្ពុជា​ឡើយ ទោះបីជា​រយៈកាល​ចុងក្រោយ​មាន​បញ្ហានយោបាយ​អតីត​គណបក្សប្រឆាំង​នៅ កម្ពុជា ក៏ដោយ​។ ក្នុងនោះ ជប៉ុន សហភាព​អឺរ៉ុប រួមទាំង​អាមេរិក​ក៏​នៅតែ​បន្ត​មាន ទំនាក់ទំនង​ល្អ​ជាមួយ​កម្ពុជា និង​បន្ត​អនុវត្ត​គម្រោង ផ្តល់ជំនួយ​ជួយ​កម្ពុជា​លើ​វិស័យ ជាច្រើន​។ នេះ​គេ​មិនទាន់​គិតពី​ដៃគូ​អភិវឌ្ឍ ដែលមាន​អង្គការក្រៅរដ្ឋាភិបាល​ជាតិ និង​អន្តរជាតិ ព្រមទាំង​មហាមិត្ត​ចិន និង​ប្រទេស​ដទៃ ច្រើន​ទៀត​ដែល​តែងតែ​ជួយ ឧបត្ថម្ភ​គាំទ្រ ផ្តល់ជំនួយ​អភិវឌ្ឍ​ប្រទេស​កម្ពុជា ចាប់តាំងពី​ផ្តួលរំលំ​របប​ខ្មែរក្រហម និង​ក្រោយ​ការបោះឆ្នោត ឆ្នាំ​១៩៩៣ នោះទេ​។​

​យ៉ាងណា​ក៏ដោយចុះ រាល់​ការអនុវត្ត​គម្រោង​ចំណាយ​ទាំងអស់ ពិសេស​ពី​ដៃគូ​អភិវឌ្ឍ ឬ​ហៅ​ជា​សាមញ្ញ​ថា ពី​ប្រទេស​ផ្តល់ជំនួយ គឺ​រាជរដ្ឋាភិបាល​តាមរយៈ​ក្រសួង​ស្ថាប័ន ជំនាញ គួរតែ​អនុវត្ត​ចំណាយ​ដោយ​តម្លាភាព គណនេយ្យភាព មិន​លម្អៀង​ពោលគឺ មិន​មានការ​កិបកេង ពុករលួយ នោះ​ទើប​ជា​ទំនុកចិត្ត​មួយ​សម្រាប់​អ្នកផ្តល់ជំនួយ ជួយ​ដល់​កម្ពុជា​យើង​។​

​សរុបទៅ បើសិនជា​ប្រជាជន​កម្ពុជា ចូលរួម​ជាមួយ​រាជរដ្ឋាភិបាល​ក្នុងការ​ថែរក្សា ការពារ​សន្តិភាព ស្ថិរភាព​នយោបាយ នោះ​កម្ពុជា នឹង​បន្ត​ការអភិវឌ្ឍ​ហើយ​កម្មវិធី គោលនយោបាយ ៣​ឆ្នាំ​រំកិល ពី​ឆ្នាំ​២០២០-២០២២ ដែលមាន​ជាង ៦០០ គម្រោងនឹង​អាចអនុវត្ត​ប្រកបដោយ​ជោគជ័យ ដើម្បី​បម្រើ​ផលប្រយោជន៍​ប្រជាជន​កម្ពុជា និង​ប្រទេស​កម្ពុជា​៕ ដោយៈ ម៉េង​ឆៃ​