គ្រាប់ត្នោត​ខ្មែរ​ដួងព្រលឹង​ នៃ​ជាតិ​ត្រូវបាន​យកទៅ​ដាំ​នៅ​ព្រំដែន​កម្ពុជា​-​ឡាវ

263
ចែករម្លែក

ដោយ:​សុខុម/ស្ទឹងត្រែង ៖ អភិបាលខេត្ត​ស្ទឹងត្រែង បាន​ដឹកនាំ​មន្ត្រីក្រោមឱវាទ​យក​ផ្លែ​ត្នោត​ចំនួន​៣០.០០០​គ្រាប់ ទៅ​ដាំ​នៅតាម​សងខាង​ផ្លូវ ខ្សែក្រវ៉ាត់​ព្រំដែន​កម្ពុជា​-​ឡាវ ស្ថិតនៅ​ស្រុក​បុរី​អូរ​ស្វាយ​សែន​ជ័យ​និង​ស្រុក​សៀម​ប៉ាង​កាលពី​ថ្ងៃទី​១១​ខែសីហា​ឆ្នាំ​២០១៩​។

លោក ម៉ុម សារឿន​ អភិបាលខេត្ត​ស្ទឹងត្រែង​បាន​មានប្រសាសន៍ថា​ដើមត្នោត​គឺជា​រុក្ខជាតិ​ដែល​ផ្តល់​គុណសម្បត្តិ​ច្រើនយ៉ាង ជួយ​ដល់​ពលរដ្ឋ​ខ្មែរ តាំងពី​សម័យបុរាណ​។​ម្យ៉ាងទៀត​ក៏​ចាត់ទុកថា​ជា​ដួងព្រលឹង​ជាតិ​ដែល​ប្រជាជន​ខ្មែរ​ទុកជា​សម្គាល់ នូវ​ទេសភាព​ស្រស់ស្អាត​ទឹក​របស់​កម្ពុជា​យើង​។

លោក​អភិបាលខេត្ត​បាន​ចាត់ទុកថា ​ការដាំ​ដើមត្នោត​ខ្មែរ​គឺជា​សកម្មភាព​ប្រវត្តិសាស្ត្រ​របស់​ខេត្ត​ក្នុងការ​បង្ហាញ​ពី​វប្បធម៌​របស់​ជាតិ​។ ការថែរក្សា​អត្តសញ្ញាណ​ជាតិ ដួង​ព្រលឹង​​ជាតិ ការពារ​អធិបតេយ្យភាព​ជាតិ និង​បំផុស​ផ្នត់គំនិត ដល់​អ្នកជំនាន់ក្រោយ ឱ្យ​ចេះ​ស្រឡាញ់​នូវ​អត្តសញ្ញាណ​ជាតិ​។

លោក ព្រំ ចាន់ថា​ប្រធាន​មន្ទីរ​អភិវឌ្ឍន៍ជនបទ​ខេត្តស្ទឹងត្រែង​បាន​បញ្ជាក់ថា​គ្រាប់ត្នោត​ត្រូវបាន​យកទៅ​ដាំ​ចំនួន​៣០.០០០​គ្រាប់​។ នេះ​គឺជា​លើក​ទី​២​ហើយ ដែល​បាន​ដាំ​ដូចគ្នា​កាលពី​ឆ្នាំមុន​។

ក្រៅពីនេះ​ពលរដ្ឋ​ខ្មែរ បាន​ទុកជា​ប្រយោជន៍​ច្រើនយ៉ាង​ដូចជា ពេល​គ្រាប់ត្នោត​ដុះ​លូតលាស់​ធំ​ពេញ​រូបរាង គេ​អាច​ផលិត​ជា​ទឹកត្នោត ស្ករត្នោត យក​ស្លឹក​មក​ប្រក់ផ្ទះ បាំងជញ្ជាំង​ស្លឹកត្នោត ធ្វើជា​កន្ទេល សម្ល​គមត្នោត នំត្នោត ចាហួយត្នោត កំពីងត្នោត ម្សៅ​ត្នោត សាច់​ត្នោត​ខ្ចី ត្នោត​ទុំ​ទុ​ត ខ្សែ​ធាងត្នោត ខ្សែ​ជក់​ត្នោត រនូត​ដើមត្នោត​មក​ក្រាល​ផ្ទះ និង​ធ្វើជា​អំបោសជក់ត្នោត​៕B/