គ្រូពេទ្យ តង់ និង រថយន្ត​សង្គ្រោះ​ជាច្រើន​បាន​ត្រៀម​ប្រតិបត្តិការ​ក្នុង​ពិធីបុណ្យ​អុំទូក​

833
ចែករម្លែក

​ដោយៈ មេសា​/​ភ្នំពេញៈ នៅក្នុង​ព្រះរាជ​ពិធីបុណ្យ​អុំទូក ប​ណ្តែ​ប្រទីប សំពះ​ព្រះ​ខែ និង អកអំបុក នា​ថ្ងៃទី ២១ ដល់ ២៣ ខែ វិច្ឆិកា នេះ ក្រសួងសុខាភិបាល​បានប្រកាសថា ក្រសួង​បាន​ត្រៀម​ក្រុមគ្រូពេទ្យ និង រថយន្ត​សង្គ្រោះ​ចល័ត​តាម​គោលដៅ​ចំនួន ៣៨ គ្រឿង និង មាន​បោះតង់ ១២ កន្លែង ដើម្បី​រង់ចាំ​ជួយសង្គ្រោះ​ប្រជាពលរដ្ឋ ២៤ ម៉ោង លើ ២៤ ម៉ោង និង ត្រៀម​រថយន្ត​សង្គ្រោះបន្ទាន់ ២៤ គ្រឿង​បន្ថែមទៀត​ប្រចាំការ​នៅ​ក្រសួងសុខាភិបាល ដើម្បី ប្រើប្រាស់​ក្នុងករណី​ចាំបាច់ ។ ដូច្នេះ​សរុប​រថយន្ត​សង្គ្រោះ​ដែល​ត្រូវបាន​ត្រៀម​គឺ ៦២ គ្រឿង ។

ក្រុមគ្រូពេទ្យ និង រថយន្ត​សង្គ្រោះ​ជាច្រើន ត្រៀម​រួចជាស្រេច​សម្រាប់​ប្រតិបត្តិការ​ក្នុងពេល​បុណ្យអុំទូក ( រូបៈ ឯកសារ )

​ទីតាំង​បោះតង់​ទាំង ១២ នោះ គឺ​៖ ១. កោះ​ពេជ្រ ២. ស្តូប​មិត្តភាព​កម្ពុជា​-​វៀតណាម ៣. សួនច្បារ​មុខ​នាយកដ្ឋានអង្គរក្ស ៤. នៅ​បរិវេណ​សណ្ឋាគារ​រណ​សិ​រ្យ ៥. នៅមុខ​គណៈកម្មការ​ជាតិ រៀបចំ​បុណ្យជាតិ​-​អន្តរជាតិ ៦. នៅក្បែរ​វេទិកា​កិត្តិយស​ខាងត្បូង ៧. នៅក្បែរ​វេទិកា​កិត្តិយស​ខាងជើង ៨. នៅមុខ​វត្ត​ឧណ្ណាលោម ព្រះ​គន្លង ៩. នៅ​ផែ​ថ្ម​រាជធានី​ភ្នំពេញ ១០. នៅ​គល់ស្ពាន​បា​ឡេ​ត្រើយ​ខាងលិច ១១. នៅ​ខាងត្បូង​គល់ស្ពាន​បា​ឡេ​ត្រើយ​ខាងកើត និង ១២. នៅ​ខាងជើង​ស្ពាន​ជ្រោយចង្វា ។​

​សេចក្តីប្រកាស​របស់​ក្រសួងសុខាភិបាល​បាន​បន្ថែមថា លើសពី​អ្វីដែល​បានលើកឡើង​ខាងលើនេះ​ទៅ ក្រសួង​ក៏បាន​ត្រៀម​ឱ្យមាន​ក្រុមគ្រូពេទ្យ​ចល័ត​ក្នុង​ហ្វូង​ប្រជាពលរដ្ឋ ដោយ​ស្លៀកពាក់​ឯកសណ្ឋាន​ពេទ្យ ដើម្បី ជួយ​ប្រជាពលរដ្ឋ ដែល​គាត់​អាចមាន​បញ្ហា​សុខភាព ហើយ​មិនអាច​ទៅរក​តង់ ឬ រថយន្ត​សង្គ្រោះបាន ។​

​ចំណែក​លោក ងី មាន​ហេង ប្រធាន​មន្ទីរ​សុខាភិបាល​រាជធានី​ភ្នំពេញ បាន​ឲ្យ​ដឹងថា ក្នុង​រយៈពេល ៣​ថ្ងៃ​នៃ​ព្រះរាជ​ពិធីបុណ្យ​អុំទូក មន្ទីរ​សុខាភិបាល មាន​រថយន្ត​សង្គ្រោះ​ប្រចាំការ​ចំនួន ១៥ ក្រុម និង ក្រុមគ្រូពេទ្យ​ចល័ត​ចំនួន ១៦​ក្រុម ។ ក្រុម​គិលានសង្គ្រោះ​បំពេញភារកិច្ច​នៅក្នុង​ព្រះរាជ​ពិធីបុណ្យ​អុំទូក ដែលមាន​ក្រុមគ្រូពេទ្យ​ជិត ៨០០​នាក់ និង រថយន្ត​សង្គ្រោះបន្ទាន់ ១៥​គ្រឿង និង រៀបចំ​បោះតង់​ពិនិត្យ​សុខភាព ៨ ទីតាំង​ដែរ គឺ ៖ ១. កោះ​ពេជ្រ ២. ស្តូប​មិត្តភាព​កម្ពុជា​-​វៀតណាម ៣. បរិវេណ​សណ្ឋាគារ​រណ​សិ​រ្យ​ផ្នែក​ខាងកើត ៤. មុខ​ព្រះ​គម្លង់ ៥. ផែ​ថ្ម​ខាងជើង​ភោជនីយដ្ឋាន​ទី​តា​និក ៦. ទីលាន​ប្រជាធិបតេយ្យ​ទល់មុខ​ឃ្លាំង​សាំង​សូ​គី​មិច ៧. ត្រើយ​ខាងកើត​ទន្លេសាប​នៅ​ខាងជើង​គល់ស្ពាន​ជ្រោយចង្វារ និង ៨. នៅ​រង្វង់​មូល​នាង​មច្ឆា​គល់ស្ពាន​បា​ឡេ​។


​ដូច្នេះ ប្រជាពលរដ្ឋ​គ្រប់រូប​ដែល​មក​កម្សាន្ត​ក្នុង​ពិធីបុណ្យ​អុំទូក នៅពេល​មាន​អកា​រៈ ធេងធោង វិលមុខ ក្អួតចង្អោរ ឬ​បញ្ហា​សុខភាព​កើតឡើង​ដោយ​ប្រការ​ណាមួយ អាច​ស្វែងរក​ស្តង់​សុខាភិបាល ដើម្បី បាន​សម្រាក និង ព្យាបាល​ជំងឺ ដោយ​ឥត​គិត​ថ្ងៃ ដែលមាន​គ្រូពេទ្យ​ប្រចាំការ ២៤​ម៉ោង​លើ ២៤​ម៉ោង ដោយ​ឥតគិតថ្លៃ ។

​ព្រះរាជ​ពិធីបុណ្យ​អុំទូក ឆ្នាំ​២០១៨ នេះ ក្រសួងទេសចរណ៍ រំពឹងថា​ភ្ញៀវ​ទេសចរណ៍​ច្រើនជាង ២​លាន​នាក់​នឹងចូលរួម​ទស្សនា​កម្សាន្ត ក្នុង​ពិធី​បុណ្យជាតិ​ដ៏​ធំ​មួយ​នេះ ។​

​ទោះយ៉ាងណា រដ្ឋមន្ត្រី​ក្រសួងសុខាភិបាល លោក ម៉ម ប៊ុនហេង ក៏បាន​អំពាវនាវ​ដល់​ជ​នា​នុ​ជ ឱ្យ​ចេះ​ថែរក្សា​សុខភាព​របស់ខ្លួន ដើម្បី បង្ការ​ការឆ្លង​មេរោគ​នានា ការពារ​ជំងឺ​រាគរូស ឬ ពុល​ចំណីអាហារ បរិភោគ​អាហារ​ដែល​ចម្អិន​ឆ្អិន​ល្អ បរិភោគ​ទឹកស្អាត ឬ ទឹក​ដាំ​ពុះ ហើយ​ជាពិសេស​កុំ​ច្រាន ឬ កុំ​ប្រជ្រៀត​គ្នា​ដើម្បី​ចៀសវាង​ការដួលសន្លប់​ជាយថាហេតុ ៕ Kh

បុណ្យអុំទូក​ឆ្នាំនេះ នឹងមាន​វត្តមាន​ទូក ង វែង​ជាងគេ​បំផុត​ក្នុង​លោក (​រូបៈ ឯកសារ​)