គ្រោះថ្នាក់​ចរាចរ​នៅតែ​សម្លាប់​មនុស្ស​មិន​លោះ​ថ្ងៃ​ឡើយ​!

1929
ចែករម្លែក

របាយការណ៍​របស់​ប៉ូលិស​ចរាចរណ៍ បង្ហាញថា នៅ​ខែមករា ឆ្នាំ​២០១៩​នេះ គ្រោះថ្នាក់ ចរាចរ​ផ្លូវគោក នៅ​ទូទាំងប្រទេស​បានកើត​ឡើង ៣៣១ លើក​បណ្តាល​ឲ្យ​ស្លាប់ ១៤៨​នាក់ និង​របួស​សរុប ៥១៧​នាក់​។ ក្នុងចំណោម​អ្នកស្លាប់​ដោយ​គ្រោះថ្នាក់​នេះ​ចំនួន ១៤៨​នាក់ គឺមាន ១១៣ នាក់ ជា​អ្នកធ្វើដំណើរ​តាម​ម៉ូតូ និង​មិន​ពាក់មួក​សុវត្ថិភាព ៨៧​នាក់​។ បើ​ធៀប​នឹង​ខែធ្នូ ឆ្នាំ​២០១៨ គឺ​គ្រោះថ្នាក់​ចរាចរ នៅ​ខែមករា ឆ្នាំ​២០១៩​នេះ កើនឡើង​ទាំង​ចំនួន​គ្រោះថ្នាក់ កើនឡើង​ទាំង​ចំនួន​អ្នកស្លាប់ និង​កើនឡើង​ទាំង​ចំនួន​អ្នករបួស​។​

​របាយការណ៍​របស់​នា​យក​ដ្ឋា​នន​គរ​បាលច​រា​ចរណ៍​និង​សណ្តាប់ធ្នាប់​សាធារណៈ​នៃ​អគ្គស្នងការដ្ឋាន​នគរ​បាល​ជាតិ​បង្ហាញថា ក្នុងចំណោម​អ្នកស្លាប់​ដោយ​គ្រោះថ្នាក់​ចរាចរ នៅ​ខែមករា ឆ្នាំ​២០១៩ ដែលមាន​ចំនួន ១៤៨​នាក់ គឺមាន ១១៣ នាក់ ជា​អ្នកធ្វើដំណើរ​តាម​ម៉ូតូ និង​មិន​ពាក់មួក​សុវត្ថិភាព ៨៧​នាក់​។ អ្នកធ្វើដំណើរ​តាម​រថយន្ត​តូច​ស្លាប់ ១៥​នាក់ រថយន្ត​ធំ ៣​នាក់ ថ្មើរជើង ១១​នាក់ និង​យាន​ផ្សេងៗ ស្លាប់ ៦​នាក់​។​

​រីឯ​មូលហេតុ​គ្រោះថ្នាក់​ចរាចរ នៅ​ខែមករា ឆ្នាំនេះ ត្រូវបាន​ប៉ូលិស​ចរាចរណ៍​កត់ត្រា​ថា បង្កឡើង​ច្រើនជាងគេ ដោយសារ​ការបើកបរ​លឿន​ល្មើស​ល្បឿន​កំណត់ មាន​ចំនួន ១៣១​លើក មិន​គោរព​សិទ្ធិ ៧៤​លើក មិន​ប្រកាន់​ស្តាំ ៥២​លើក ប្រជែង ២៨​លើក បត់​គ្រោះថ្នាក់ ២២​លើក ស្រវឹង ៩​លើក ងងុយ ៥​លើក និង​កត្តា​យាន ១០​លើក​។ ចំណែក​រាជធានី​ខេត្ត ដែល​គ្រោះថ្នាក់ និង​រងគ្រោះ​ច្រើនជាងគេ គឺ​នៅ​ភ្នំពេញ ៨២​លើក ព្រះសីហនុ ២២​លើក ព្រៃវែង ៧​លើក កំពង់ចាម ១៩​លើក ខេត្តស្វាយរៀង ១៣​លើក កំពង់ស្ពឺ ១៥​លើក និង​ខេត្តកណ្តាល ១៩​លើក​។​

​របាយការណ៍​ដដែល​ប​ង្ហា​ញ​ថា នៅ​ខែធ្នូ ឆ្នាំ​២០១៨ គ្រោះថ្នាក់​ចរាចរ​ផ្លូវគោក នៅ​ទូទាំងប្រទេស បានកើត​ឡើង ២៩៣​លើក បណ្តាល​ឲ្យ​ស្លាប់ ១៤០​នាក់ និង​របួស ៤២៥​នាក់​។ ដោយឡែក នៅ​ឆ្នាំ​២០១៨ គ្រោះថ្នាក់​ចរាចរ​ផ្លូវគោក បានសម្លាប់​មនុស្ស ១.៧៦១ នាក់ និង​របួស ៤.៧៧១​នាក់​។ ចំនួន​អ្នកស្លាប់ និង​របួស​នៅក្នុង​ឆ្នាំ​២០១៨ បាន​ថយចុះ បើ​ធៀប​នឹង​ឆ្នាំ​២០១៧​។ ឆ្នាំ​២០១៧ គ្រោះថ្នាក់​ចរាចរ​ផ្លូវគោក នៅ​ទូទាំងប្រទេស បានសម្លាប់​មនុស្ស ១.៧៨០ នាក់ និង​របួស ៥.៥៣៩ នាក់​។​

​យ៉ាងណា​ក៏ដោយចុះ បើ​យើង​ពិនិត្យមើល​ពី​គ្រោះថ្នាក់​ចរាចរ​ផ្លូវគោក​នៅ​ខែមករា​ឆ្នាំ​២០១៩ គឺ​ចំនួន​អ្នកស្លាប់ នៅតែ​ស្ថិតនៅ​អត្រា​ខ្ពស់​នៅឡើយ ពោលគឺ​ក្នុង​រយៈពេល ៣១​ថ្ងៃ ក្នុង​ខែមករា មិនមាន​ថ្ងៃ​ណាមួយ​ថា មិនមាន​អ្នកស្លាប់ និង​មិនមាន​អ្នករបួស​ទេ​។ ជា​មធ្យម ក្នុង​១​ថ្ងៃៗ មាន​អ្នកស្លាប់​ដល់​ទៅ​ជាង ៤ នាក់ និង​របួស​ជាង ១៦​នាក់​។ ភាគច្រើន​នៃ​អ្នកស្លាប់ និង​អ្នករបួស គឺជា​អ្នកធ្វើដំណើរ​តាម​ម៉ូតូ និង​មិន​ពាក់មួក​សុវត្ថិភាព​។ រីឯ​មូលហេតុ​បង្ក​គ្រោះថ្នាក់​ច្រើនជាងគេ គឺ​ការបើកបរ​លឿន​ល្មើស​ល្បឿន​កំណត់​។​

​គ្រោះថ្នាក់​ចរាចរ ដែល​បង្កឡើង​ដោយសារ​កត្តា​មនុស្ស គឺ​អ្នកបើកបរ នៅតែ​ជា​កត្តា​នាំមុខគេ​។ ផ្លូវ​ស្អាត​ហើយ តែ​អ្នកបើកបរ ពិសេស​អ្នកធ្វើដំណើរ​តាម​ម៉ូតូ ខ្វះ​ការប្រុងប្រយ័ត្ន បើកបរ​លឿន មិន​គោរព​សិទ្ធិ និង​វ៉ា​ជែង​គ្រោះថ្នាក់ បាន​បង្ក​គ្រោះថ្នាក់​ច្រើនជាងគេ​។

​ដូច្នេះ​មានតែ​ការគោរព​ច្បាប់​ចរាចរណ៍ បើកបរ​កុំ​លឿន​ហួសហេតុ​ពេក​។ អ្នកបើកបរ​ម៉ូតូ និង​អ្នកធ្វើដំណើរ​តាម​ម៉ូតូ ត្រូវ​ពាក់មួក​សុវត្ថិភាព​គ្រប់ពេល​ធ្វើដំណើរ​។ រីឯ​អ្នកបើកបរ និង​អ្នក​ជិះឡាន ក៏ត្រូវ​ពាក់​ខ្សែក្រវ៉ាត់​សុវត្ថិភាព បើកបរ​មិនត្រូវ​លឿន​ពេក​ទេ​។ នៅពេល​បើក បរ​ម៉ូតូ ឡាន យើង​ត្រូវ​នឹង​គិតដល់​ពាក្យ​ថា “​សន្សឹមៗ កុំ​បំបោរ ក្រែង​មិន​ដល់​ដូច​ប្រាថ្នា​”​។ ម្យ៉ាងទៀត អ្នកបើកបរ និង​អ្នកធ្វើដំណើរ​តាម​ម៉ូតូ​ទាំងឡាយ ក៏ត្រូវ​នឹកគិត​ថា យើង​ត្រូវគោរព ច្បាប់ ស្លាក​សញ្ញា និង​ភ្លើង​សញ្ញា​ចរាចរណ៍ ពិសេស​យើង​ត្រូវ​ពាក់មួក​សុវត្ថិភាព នៅពេល​ធ្វើ ដំណើរ ដើម្បី​សុវត្ថិភាព​ផ្ទាល់ខ្លួន ដោយ​មិនត្រូវ​គិតថា ពាក់មួក​សុវត្ថិភាព ឬក៏​គោរព​ច្បាប់ ចរាចរណ៍ គោរព​ស្លាក​សញ្ញា និង​គោរព​ភ្លើង​សញ្ញា​ចរាចរណ៍ តែ​ពេលណា​មាន​ប៉ូលិស​ឈរជើង នៅ​ចំណុច​ភ្លើងស្តុប​នោះឡើយ ព្រោះថា ជីវិត​របស់​យើង ហើយ​បើ​ជួប​គ្រោះថ្នាក់​អ្វី​គឺ​យើង​ខ្លួនឯង នេះហើយ ជា​អ្នករងគ្រោះ របួស ពិការ ហើយ​បើ​ធ្ងន់ធ្ងរ គឺ​រហូតដល់​ស្លាប់​ទៀត​ផង​។​

​គួរតែ​ចំណាយលុយ​ទិញ​មួកសុវត្ថិភាព ឬ​មួក​ការពារ តម្លៃ​ត្រឹមតែ ១០​ដុល្លារ​ជាជាង​គ្រោះថ្នាក់ កើតឡើង គឺ​យើង​ខាតបង់​ច្រើន​លើសពី ១០​ដុល្លារ ឬក៏​បើ​ប៉ូលិស​ចាប់​ផាកពិន័យ ក៏​នាំ​ឲ្យ​ខាត​ពេល ហើយ​ពិន័យ​ម្តង ១៥០០០ រៀល តែ​ពីរ​បី​ដង គឺ​ស្មើនឹង​តម្លៃ​មួកសុវត្ថិភាព​មួយ ដែល​យើង​អាច​ប្រើ ប្រាស់​បាន​ដល់​ទៅ​រាប់​ឆ្នាំ​។ សូម​ចូលរួម​ទាំងអស់គ្នា ដើម្បី​សុវត្ថិភាព​ផ្ទាល់ខ្លួន តាមរយៈ​ការ គោរព​ច្បាប់​ចរាចរណ៍ និង​ពាក់មួក​សុវត្ថិភាព ពេលធ្វើ​ដំណើរ​តាម​ម៉ូតូ ហើយ​បើតាម​ឡាន ត្រូវ​ពាក់​ខ្សែក្រវ៉ាត់​សុវត្ថិភាព និង​ត្រូវមាន​ការយោគយល់​អធ្យាស្រ័យ​គ្នា ក្នុងពេល​ធ្វើដំណើរ​។​

​ពិសេស​ក្នុងឱកាស​បុណ្យចូលឆ្នាំ​ចិន​ខាងមុខនេះ សូម​ប្រុងប្រយ័ត្ន ក្នុងការ​បើកបរ​។ ពោលគឺ ស្រវឹង​មិន​បើកបរ​។​បើកបរ​ដោយ​ការទទួលខុសត្រូវ​៕ ដោយ​: ម៉េង​ឆៃ​