ឃាត់ខ្លួន​ជនជាតិ​វៀតណាម​ប្រុស​ស្រី​ចំនួន​២២​នាក់ និង​បញ្ជូន​ទៅកាន់​អគ្គនាយកដ្ឋាន​អន្តោប្រវេសន៍​

532

​ដោយ​: សាវ​រក្ស / ភ្នំពេញ​: កម្លាំង​នគរបាល​នាយកដ្ឋាន​ស៊ើបអង្កេត និង​អនុវត្តន៍​វិធី នៃ​អគ្គនាយកដ្ឋាន​អន្តោប្រវេសន៍ ចុះ​ប្រតិបត្តិការ ត្រួតពិនិត្យ ឃាត់ខ្លួន ​ជនជាតិ​វៀតណាម​ប្រុស​ស្រី​ចំនួន​២២​នាក់ ក្នុងនោះ​ស្រី​១២​នាក់​ស្ថិតនៅក្នុង​ហាង​កាហ្វេ​ចំនួន​២​ទីតាំង​ទី​១-​យីហោ​(​ធី​ថា​ន់​ការ​ហ្វេ​) នឹង​ទី​តាំងទី​២-​យីហោ​(​ង៉ុ​ក​ងឺ​យ​) កាលពី​ម៉ោង​៩​និង​១០​នាទី​ព្រឹក ថ្ងៃទី​១៨ ខែមេសា​ឆ្នាំ​២០១៨ ស្ថិតនៅតាម​ផ្លូវជាតិ​លេខ​៥ ភូមិ សាមគ្គី​សង្កាត់​ឫស្សីកែវ ខណ្ឌឫស្សីកែវ​។​

​ថ្លែងប្រាប់​រស្មី​កម្ពុជា លោក អ៊ុក​ហៃ សិលា ប្រធាន​នាយកដ្ឋាន​ស៊ើបអង្កេត និង​អនុវត្តន៍​នីតិវិធី នៃ​អគ្គនាយកដ្ឋាន​អន្តោប្រវេសន៍ បាន​ឲ្យ​ដឹងថា ក្រោម​ការសម្របសម្រួល​ផ្លូវច្បាប់​ដោយ​លោក សៀង សុខ ព្រះរាជអាជ្ញារង​អម​សាលាដំបូង​រាជធានី​ភ្នំពេញ បើក​កិច្ច​ប្រតិ​ប​ត្តុ​ការចុះ​ត្រួតពិនិត្យ​នៅ​ទីតាំង​ខាងលើ ហើយ​ឃាត់ខ្លួន​ជនជាតិ​វៀតណាម​ប្រុស​ស្រី​ចំនួន​២២​នាក់​ស្រី​១២​នាក់ រកឃើញថា ពុំមាន​ឯកសារ​ត្រឹមត្រូវ ក្នុងការ​ស្នាក់នៅ និង​ធ្វើ​ការងារ​។​

​លោក​បាន​ឲ្យ​ដឹង​ទៀតថា ជនជាតិ​វៀតណាម​ទាំងនេះ លួច​ឆ្លងដែន​ចូលមក​ជ្រកកោន និង​ធ្វើ​ការងារ​ដោយ​លួចលាក់ ពុំមាន​លិខិតឆ្លងដែន ហើយ​ត្រូវបាន​ឃាត់ខ្លួន​នាំទៅ​បន្ត​នីតិវិធី នៅ​អគ្គនាយកដ្ឋាន​អន្តោប្រវេសន៍​។​

​លោក​បាន​បន្តទៀតថា សកម្មភាព​ស្រាវជ្រាវ​ស៊ើបអង្កេត​នគរបាល​ជំនាញ​នៅតែ​បន្ត ការ​បើ​រកឃើញ​ជនបរទេស​រូប​ណា ដែល​ឆ្លងដែន​ចូលមក​ពុំ​ស្របច្បាប់ នឹង​ចាត់វិធានការ​អនុវត្ត​ន៍​ទៅតាម​នីតិវិធី​៕ ល​