ឃាត់ខ្លួន​ជនសង្ស័យ​ចំនួន​៥​នាក់​បញ្ជូនទៅ​តុលាការ​ពាក់ព័ន្ធ​គ្រឿងញៀន​

216

(​សៀមរាប​)៖ ជនសង្ស័យ​ចំនួន​៥​នាក់ ត្រូវបាន​នគរបាល​ការិយាល័យ ប្រឆាំង​ការជួញដូរ​គ្រឿងញៀន ខេត្តសៀមរាប ដោយមាន​ការចូលរួម​សហ​ការណ៍​ពី​កម្លាំង​ប៉ុស្តិ៍នគរបាល​រដ្ឋបាល​ស​ង្កា​ត់​ស្លក្រាម និង កម្លាំង​ប្រជា​ការពារ​ភូមិ បាន​ចុះបង្ក្រាប​ករណី រក្សាទុក​និង​ចាត់ចែង ឲ្យ​ប្រើប្រាស់​ដោយ​ខុស ច្បាប់​នូវ​សារធាតុ​ញៀន នៅ​ចំណុច​ភូមិ​បឹង​ដូន​ប៉ា រួមទាំង​ដកហូត​បាន​វត្ថុតាង​មួយចំនួនទៀត​។ ប្រតិបត្តិ​ការបង្ក្រាប​ក​រ​ណី រក្សាទុក​និង​ចាត់ចែង អោយប្រើ​ប្រាស់​ដោយ​ខុស ច្បាប់​នូវ​សារធាតុ​ញៀន​នេះ​បានធ្វើ​ឡើង​កាលពី​ថ្ងៃទី​១៥ ខែវិច្ឆិកា ឆ្នាំ​២០១៧ ស្ថិតនៅ​ចំណុច​ភូមិ​បឹង​ដូន​ប៉ា សង្កាត់​ស្លក្រាម ក្រុង​សៀមរាប ខេត្តសៀមរាប​។​

​សមត្ថកិច្ច​នគរបាល​គ្រឿងញៀន​ខេត្តសៀមរាប បាន​បញ្ជាក់ថា ជនសង្ស័យ​ទាំង​៥​នាក់​ដែល​ត្រូវបាន​សមត្ថកិច្ច​ឃាត់ខ្លួន​គឺមាន​ទី​១ ឈ្មោះ ឈុំ សិរី​មាន ភេទ​ប្រុស អាយុ ១៧​ឆ្នាំ មុខរបរ​គ្មាន មាន​ទីលំនៅ​ភូមិ​ទ្រាំង សង្កាត់​ស្លក្រាម ក្រុង​សៀមរាប ខេត្តសៀមរាប​, ទី​២ ឈ្មោះ ស្ងួន សំបូរ ភេទ​ប្រុស អាយុ​១៨ ឆ្នាំ មុខរបរ​គ្មាន មាន​ទីលំនៅ​ភូមិ​ស្លក្រាម សង្កាត់​ស្លក្រាម ក្រុង​សៀមរាប ខេត្តសៀមរាប ,​ទី​៣ ឈ្មោះ ពៅ ពិសិដ្ឋ​ហៅ​ញ៉ា ភេទ​ប្រុស អាយុ​១៧​ឆ្នាំ មុខរបរ​គ្មាន មាន​ទីលំនៅ​ភូមិ​មណ្ឌល​៣ សង្កាត់​ស្លក្រាម ក្រុង​សៀមរាប ខេត្តសៀមរាប​, ទី​៤ ឈ្មោះ គង់ វាសនា ភេទ​ប្រុស អាយុ​១៧​ឆ្នាំ មុខរបរ​គ្មាន មាន​ទីលំនៅ​ភូមិ​បឹង​ដូន​ប៉ា សង្កាត់​ស្លក្រាម ក្រុង​សៀមរាប ខេត្តសៀមរាប និង​ទី​៥ ឈ្មោះ កង សា​មន ភេទ​ប្រុស អាយុ ៣១​ឆ្នាំ មុខរបរ​គ្មាន មាន​ទីលំនៅ​ភូមិ​កំពង់ក្តី ឃុំ​កំពង់ក្តី ស្រុក​ជីក្រែង ខេត្តសៀមរាប​។​

​សមត្ថកិច្ច​បាន​បន្តថា វត្ថុតាង​ដែល​សមត្ថកិច្ច​ដកហូត​បានរួម​មាន ម្សៅ​មេ​តំ​ហ្វេ​តា​មីន ប្រភេទ​ម៉ា​ទឹកកក ចំនួន ៤​កញ្ចប់ ស្មើនឹង​ទំងន់​០,៨​ក្រាម ទាំង​សំបក ទូរស័ព្ទដៃ​ចំនួន​០៥​គ្រឿង ឧបករណ៍ប្រើប្រាស់​គ្រឿងញៀន​មួយចំនួន​និង​ខ្នោះដៃ​ចំនួន​១​គូ​។​

​បច្ចុប្បន្ន​ជនសង្ស័យ​ទាំង​៥​នាក់​រួមទាំង​វត្ថុតាង ត្រូវបាន​កសាង​សុំ​ណុំ​រឿង​បញ្ចូនទៅ​សាលាដំបូង​ខេត្តសៀមរាប​នា​ថ្ងៃទី​១៦ ខែវិច្ឆិកា ឆ្នាំ​២០១៧​នេះ ដើម្បី​ចាត់ការ​តាម​នីតិវិធី​ច្បាប់​៕L ដោយ៖ ​គូលែន​