ចិន​មិន​ទទួលស្គាល់​ការសំរេច​របស់​តុលាការ​អន្តរជាតិ​ស្តីពី​សមុទ្រចិន​ខាងត្បូង​តែ​យល់ព្រម​អភិវឌ្ឍរួ​ម​គ្នា​

909
ចែករម្លែក

​រដ្ឋាភិបាល​ក្រុង​ប៉េកាំ​ង​បាន​ប្រាប់​ប្រធានាធិបតី​ហ្វីលីពីន​ដែល​កំពុង​ធ្វើ​ទស្សនកិច្ច​ថា ជំហរ​របស់​ខ្លួន​ស្តី​ពី​សមុទ្រ​ចិន​ខាងត្បូង​មិនអាច​លើកយក​មក​ចរចា​បានឡើយ​។​

​អ្នកនាំពាក្យ​ប្រធានាធិបតី​ហ្វីលីពីន​លោក​រ៉ូ​ឌ្រី​ហ្គោ ឌុយ​ទែត បាន​និយាយថា​ក្នុងជំនួប​របស់លោក​ឌុយ​ទែតជា​មួយ​ប្រធានាធិបតី​ចិន ស៊ី ជីន​ពីង​កាលពី​ថ្ងៃ​២៩​សីហា សម​ភាគី​​ចិន​បាន​បញ្ជាក់​អះអាង​ជា​ថ្មី​អំពី​គោលជំហរ​របស់​រដ្ឋាភិបាល​លោក​អំពី​ការមិនទទួលស្គាល់​ការសំរេច​របស់​តុលាការ​អន្តរជាតិ​មួយ​ពាក់ព័ន្ធ​សមុទ្រ​ចិន​ខាងត្បូង ហើយក៏​មិន​ងាក​​ចេញ​ពី​ជំហរ​របស់​ខ្លួន​។​

​ទោះជា​យ៉ាងណា មេដឹកនាំ​ទាំង​ពីរ​បាន​ព្រមព្រៀង​ធ្វើការ​រួមគ្នា​ដើម្បី​គ្រប់គ្រង​បញ្ហា និង​បាន​ទទួលស្គាល់​អំពី​សារសំខាន់​នៃ​ការអត់ធ្មត់​និង​គោរព​សេរីភាព​នាវាចរណ៍​នៅក្នុង​​សមុទ្រ​និង​ការហោះ​លើ​សមុទ្រ​ចិន​ខាងត្បូង​។​

​យោង​តាម​ក្រសួង​ការបរទេស​ចិន​ចេញផ្សាយ​កលា​ពី​ថ្ងៃ​៣០​សីហា លោក​ស៊ី​បាន​និយាយថា​ប្រទេស​ទាំង​ពីរ​គួរ​”​ទុក​ជម្លោះ​ទៅ​ម្ខាង បំបាត់​អន្តរាគមន៍​មកពី​ក្រៅ​”​អំពី​បញ្ហា​សមុទ្រ​​ចិន​ខាងត្បូង និង​ខិតខំ​អភិវឌ្ឍ​រួមគ្នា​លើ​ការធ្វើ​អាជីវកម្ម​ប្រេង​និង​ហ្គាស​នៅ​ឯនាយ​សមុទ្រ​ក្នុង​តំបន់​។​

​ទោះជា​មាន​បញ្ហា​ទឹកដី​ជាមួយគ្នា រដ្ឋាភិបាល​ក្រុង​ម៉ានីល​និង​ប៉េកាំ​ង​បាន​ចុះហត្ថលេខា​លើ​កិច្ច​ព្រមព្រៀង​ជា​បន្តបន្ទាប់​ស្តីពី​កិច្ច​សហការ​រួមគ្នា​ក្នុង​វិស័យ​ជាច្រើន ហើយ​លោក​​ឌុយ​ទែត បាន​អបអរ​មិត្តភាព​នេះ​និង​តំលៃ​នៃ​ចំណងទាក់ទង​រវាង​ប្រទេស​ទាំង​ពីរ​។​

​លោក រ៉ូ​ឌ្រី​ហ្គោ ឌុយ​ទែត កាលពី​ថ្ងៃ​ព្រហស្បតិ៍​ទី​២៩​សីហា​បាន​ជួបពិភាក្សា​ជាមួយ​សម​ភាគី​ចិន​របស់លោក គឺ លោក ស៊ី ជីន​ពីង ដែល​នៅក្នុង​ជំនួប​នោះ បញ្ហា​ពី​សមុទ្រ​ចិន​ខាងត្បូង​​ត្រូវបាន​លើក​មក​និយាយ​

​សេចក្តីសម្រេច​របស់​តុលាការ​អាជ្ញាកណ្តាល​ក្រុងឡាអេ​ឆ្នាំ ២០១៦ បាន​សម្រេច​ថា ការអះអាង​សិទ្ធិ​កាន់កាប់​របស់​ចិន​លើ​សមុទ្រ​ចិន​ខាងត្បូង​ទាំងស្រុង​នោះ ត្រូវបាន​ចាត់ទុក​​ជាមោឃៈនិង​បាន​រកឃើញ​ថា​វា​បាន​រំលោភ​លើ​អនុសញ្ញា​នៃ​អង្គការសហប្រជាជាតិ​ស្តីពី​ច្បាប់​សមុទ្រ​។​

​ជម្លោះ​ដែនទឹក​ដែល​ជា​ផ្លូវ​ដឹកជញ្ជូន​សកល​ដ៏​សំខាន់​និង​សម្បូរ​ប្រេង​និង​ឧស្ម័ន​នេះ​បាន​ធ្វើឱ្យ​ទំនាក់ទំនង​ចិន​ជាមួយ​ហ្វីលីពីន​និង​បណ្តា​ប្រទេសជិតខាង​ផ្សេងទៀត​មាន​ភាព​​ល្អក់កករ​ដោយ​មាន​ការទាមទារ​សិទ្ធិ​កាន់កាប់​ទឹកដី​សមុទ្រ​នោះ​ជាន់គ្នា​។​

​រដ្ឋាភិបាល​ក្រុង​ប៉េកាំង​ត្រូវបាន​គេ​ចោទប្រកាន់​ថា​កែប្រែ​ប្រជុំ​កោះ​ថ្ម​ប៉ប្រះ​ទឹក​ដែល​មាន​ជម្លោះ​ទៅជា​មូលដ្ឋាន​យោធា​ទោះ​យ៉ាងនេះក្តី លោក រ៉ូ​ឌ្រី​ហ្គោ ឌុយ​ទែត បាន​ធ្វើ​បំភ្លេច​​ចោល​ប្រធានបទ​នេះ​ដើម្បី​ស្វែងរក​ទំនាក់ទំនង​កក់ក្តៅ​ជាមួយ​រដ្ឋាភិបាល​ក្រុង​ប៉េកាំង​។

​ក្រុម​អ្នក​ជាតិនិយម​ហ្វីលីពីន​និង​ក្រុម​ឆ្វេងនិយម​បាន​រិះគន់​ប្រធានាធិបតី​នេះ​ចំពោះ​ការ​មិន​ទាមទារ​ឱ្យ​ចិន​គោរព​តាម​សេចក្តីសម្រេច​របស់​តុលាការ​អាជ្ញាកណ្តាល​ដែល​ការ​​សម្រេច​របស់​តុលាការ​នេះ​បាន​ធ្វើឡើង​នៅ​ឆ្នាំ​តែមួយ ដែល លោក រ៉ូ​ឌ្រី​ហ្គោ ឌុយ​ទែត ចូលកាន់​តំណែង​៕​ដោយ​៖​វាសនា​

លោក រ៉ូ​ឌ្រី​ហ្គោ ឌុយ​ទែត (​រូប​ឆ្វេង​) និង លោក ស៊ី ជីន​ពីង (​រូប​ស្តាំ​)​ជួប​គ្នា​នៅ​ក្រុង​ប៉េកាំង កាលពី​ថ្ងៃ​ព្រហស្បតិ៍​