ចំណាយលុយ​១០​ម៉ឺន​ដុល្លារ​ផលិត​រឿង​”​ចង់ដឹង​សាកមើល​”​ដើម្បីឱ្យ​ផ្ទុះ​ក្នុង​ឆ្នាំ​២០១៧

227

ផលិតករ​លោក ងី ស៊ី​ប៉ាវ ដែល​ម្ចាស់​ផលិតកម្ម​ជី​អិ​ម​ហ៊ាន​ចំណាយលុយ​រាប់ម៉ឺន​ដុល្លារ​ក្នុង​ការធ្វើ​រឿង “​កំប្លែង​”​មួយ​ដែល​ប្រមូលផ្តុំ​​ដោយ​តារា​ល្បីៗ​ទាំង​អ្នកកំប្លែង​និង​អ្នក​សម្តែង ឱ្យ​ផ្ទុះ​សើច​ម្តង​សម្រាប់​ទស្សនិកជន​ក្នុង​ឆ្នាំ​២០១៧​នេះ​។​

លោក ងី ស៊ីប៉ាវ ម្ចាស់ផលិតជីអឹម

​ចាងហ្វាង​ផលិតកម្ម​ជី​អិ​ម បាន​ប្រាប់​ក្រុម​អ្នកសារព័ត៌មាន​កាលពី​ព្រឹក​ថ្ងៃទី​១១ ខែសីហា ឆ្នាំ​២០១៧ ក្នុង​ពិធី​ក្រុង​ពាលី​ថា រឿង​ខ្នាត​ធំ “​ចង់ដឹង​សាកមើល​” របស់លោក​នេះ​ជា​ខ្សែភាពយន្ត​លើកដំបូង​ដោយ​លោក​ហ៊ាន​ចំណាយ​ដើមទុន​រាប់សិប​ម៉ឺន​ដុល្លារ​អាមេរិក​ក្នុង​​ផលិត​ខ្សែភាពយន្ត​មានគុណ​ភាព​និង​សម្រិតសម្រាំង​ទាំង​តួ​ល្បី​យកមក​លេង​ឱ្យ​ផ្ទុះ​ម្តង​សម្រាប់​ទស្សនិកជន​មើល​ហើយ​មិន​ស្តាយ​លុយ​។ ​លោក​ក៏​រំពឹងទុក​រឿងនេះ​នឹង​ជោគជ័យ​ខ្ពស់​ដោយ​លោក​មាន​សុទ្ធ​តួ​ខ្លាំង​និង​ល្បី​ដែល​លេង​មិនឱ្យ​ខកបំណង​ឡើយ​។​

​លោក ងី ស៊ី​ប៉ាវ បាន​បញ្ជាក់ថា “​ស្នាដៃ​ទី​១​របស់​ផលិតកម្ម​ខ្ញុំ​នេះ​ចំណាយ​ដើមទុន​ជិត​១០​ម៉ឺន​ដុល្លារ​យើង​គ្រោង​នឹង​ចេញ​ថត​ក្នុងពេល​​ឆាប់ៗ​នេះ បន្ទាប់ពី​ទទួល​អាជ្ញាប័ណ្ណ​ពី​ក្រសួង ត្រៀម​នឹងដាក់​បញ្ចាំង​នៅតាម​រោងកុន នៅ​ចុង​ឆ្នាំនេះ ប្រហែលជា​ខែ ១១ ឬ​ខែ​១២​។ ក្រោយពី​ថត​រឿងនេះ​ចប់​យើង​គ្រោង​នឹង​ផលិត​ខ្សែភាពយន្ត​ភាគ​ដាក់​បញ្ចាំង​នៅ​ទូរទស្សន៍​និង​រឿង​ខ្នាត​ធំ​ចាក់​បញ្ចាំង​នៅ​រោងកុន​​បន្ថែមទៀត​”​។

​ផលិតករ​រូប​បាន​ប្រាប់ថា ភាពយន្ត​ខ្នាត​ធំ “​ចង់ដឹង​សាកមើល​” នេះ​ចូលរួម​សម្ដែង​ដោយ លោក ឃឹម វី​ម៉ា កញ្ញា ដួង ម៉ា​និ​ច លោក ម៉ា​ដូ​ណា កញ្ញា និមល លោក លឹម រដ្ឋា នាយ ក្រូច នាយ ចាប​ចៀន ព្រមទាំង​តារា​សម្ដែង​ប្រុស​ស្រី​ជាច្រើនរូប​ទៀត​។ រឿងនេះ​ជា​ប្រ​​ភេទ​រឿង​បង្ហាញ​ពី​ក្បាច់គុន​បុរាណ​ខ្មែរ​បែប​កំប្លែង​សើច​លាយឡំ​ជាមួយ​ឈុត​ឆាក​ស្នេហា​ផ្អែមល្ហែម​របស់​តួឯក​ប្រុស​ស្រី​ក្នុង​រឿងនេះ​​ដែល​តួ​នីមួយៗ​សុទ្ធ​លេង​ខ្លាំង​និង​ល្អ​នឹងធ្វើ​ផ្ទៃ​សាច់រឿង​ទាំងមូល​ល្អមើល​ជាមួយ​សំណើច​តាំងពី​ដើមទី​៕​ដោយៈ​បូ​រិ​ន​/sn