ច្បាប់​មាន​ហើយ តម្លៃ​ក៏​ចុះថ្លៃ​ពាក់កណ្តាល​ទៀត ដូច្នេះ​នៅតែ​ការអនុវត្ត​ប៉ុណ្ណោះ​!

366
ចែករម្លែក

ក្រសួង​សាធារណការ​និង​ដឹកជញ្ជូន​បានសម្រេច​បញ្ចុះតម្លៃ​រហូត​ដល់​ទៅ ៥០​ភាគរយ​សម្រាប់​អ្នក ដែល​ទៅ​ចុះឈ្មោះ​រៀន​បើកបរ​រថយន្ត​ធុន​ធ្ងន់ ជាមួយ​មជ្ឈមណ្ឌល​បណ្តុះ​បណ្តាល​បើកបរ រថយន្ត​ធុន​ធ្ងន់ ក្រោម​ការគ្រប់គ្រង​រប​ស់​ក្រសួង​សា​ធាណ​ការ និង​ដឹកជញ្ជូន​។​តម្លៃ​សម្រាប់​ការរៀន បើកបរ​រថយន្ត​ធុន​ធ្ងន់ ឬ​ប្រភេទ​ឡាន​ដឹក​ដី និង​ឡាន​កុងតឺន័រ​នេះ នៅសល់​ត្រឹមតែ ១៧៥ ដុល្លារ​ប៉ុណ្ណោះ​។​

​ការសម្រេច​បញ្ចុះតម្លៃ​នៃ​ការរៀន​បើកបរ​រថយន្ត​ធុន​ធ្ងន់​នេះ ត្រូវបាន​ក្រសួង​សាធារណការ ប្រកាសថា ដើម្បី​លើកទឹកចិត្ត​អ្នកមាន​បំណង​ចាប់​អាជីព​ជា​អ្នកបើកបរ​រថយន្ត​ធុន​ធ្ងន់​មក​ទៅ​រៀន បើកបរ​ឲ្យ​បាន​ត្រឹមត្រូវ មុននឹង​ពួកគេ ទៅ​ចាប់​កាន់ចង្កូត​ឡានធំៗ​នេះ​។ មួយវិញទៀត​ការរៀន បើកបរ​រថយន្ត​ធុន​ធ្ងន់ ក៏​នឹង​ផ្តល់​ការងារ​ស្របច្បាប់​ត្រឹមត្រូវ​ទទួលបាន​ចំណេះដឹង​ច្បាស់លាស់ ដែលជា​ចំណែក​ចូលរួម​កាត់បន្ថយ​គ្រោះ​ថា្នក់​ចរាចរណ៍ និង​បញ្ហា​ការកកស្ទះ​ចរាចរ​ផងដែរ​។​

​សព្វថ្ងៃនេះ ក្រសួង​សាធារណការ និង​ដឹកជញ្ជូន មិនមាន​អនុញ្ញាត​ឲ្យ​សាលា​ឯកជន​ដែល​បង្រៀន ផ្នែក​បើកបរ​រថយន្ត បើក​បង្រៀន​ការបើកបរ​រថយន្ត​ធុន​ធ្ងន់​នេះឡើយ​។

​មជ្ឈមណ្ឌល​បណ្ដុះបណ្ដាល​បើកបរ​រថយន្ត​ធុន​ធ្ងន់​ក្រោម​ការគ្រប់គ្រង​របស់​ក្រសួង​សាធារណការ និង​ដឹកជញ្ជូន បាន​សម្ពោធ​ដាក់​ដំណើរការ​ជា​ផ្លូវការ កាលពី​ថ្ងៃ​ពុធ ទី​៣១ ខែតុលា ឆ្នាំ​២០១៨​។ មជ្ឈមណ្ឌល​នេះ មាន​ទីតាំង​ក្នុង​អគ្គនាយកដ្ឋាន​ដឹកជញ្ជូន​ផ្លូវគោក ស្ថិតនៅ​លើផ្លូវ​លេខ​៥៩៨ សង្កាត់​ច្រាំង​ចំរេះ​២ ខណ្ឌឫស្សីកែវ រាជធានី​ភ្នំពេញ​។​

​កន្លងមក មហាជន​តែងតែ​លើកឡើង​ពី​អ្នកបើកបរ​រថយន្ត​ធុន​ធ្ងន់ ពិសេស​ឡាន​ដឹក​ដី និង​ឡាន កុងតឺន័រ​មួយចំនួន បើក​លឿន ហើយ​ពេលខ្លះ ក៏បង្ក​គ្រោះថ្នាក់​ចរាចរ​ដ៏​រន្ធត់​ពិសេស​នៅ​ផ្លូវជាតិ លេខ​៤​។ អ្នកបើកបរ​រថយន្ត​ធុន​ធ្ងន់​មួយចំនួន​នោះ​ទៀតសោត ក៏ត្រូវ​បាន​ប៉ូលិស​ចរាចរណ៍ ត្រួតពិនិត្យ ហើយ​រកឃើញថា មាន​ផ្ទុក​សារធាតុ​ញៀន និង​ចេះ​បើកបរ​ត​តាម​គ្នា​ដោយមាន បញ្ហា​អ្វី​បុក​ប៉ះ​គេ គឺ​អ្នកបើកបរ​ប្រភេទ​រថយន្ត​ធុន​ធ្ងន់ ដែល​បង្កបញ្ហា​នោះ ធ្វើយ៉ាងណា​រត់​ឲ្យ តែ​រួចខ្លួន​ដោយ​មិន​ទទួលខុសត្រូវ និង​មិន​គិតពី​អាយុជីវិត ទ្រព្យសម្បត្តិ​របស់​អ្នកដទៃ​ឡើយ​។​

​ដូច្នេះ​នៅពេលនេះ ច្បាប់​ចរាចរណ៍​យើង​មាន​ហើយ​ដែល​ច្បាប់​បានកំណត់​ឲ្យ​គ្រប់​អ្នកបើកបរ រថយន្ត​ទាំងអស់ ត្រូវមាន​ប័ណ្ណបើកបរ​ត្រឹមត្រូវ ហើយ​ឆ្លងកាត់​ការរៀន​ត្រឹមត្រូវ និង​ប្រឡង​យក ប័ណ្ណបើកបរ​ត្រឹមត្រូវ​តាមច្បាប់​។ ជាងនេះទៀត តម្លៃ​រៀន​បើកបរ​រថយន្ត​ធុន​ធ្ងន់ ដែល​ពីមុន មានតម្លៃ ៣៥០​ដុល្លារ ក្នុង​ម្នាក់ ពេលនេះ​ទៀត គឺ​បាន​ចុះថ្លៃ មក​ត្រឹមតែ ១៧៥ ដុល្លារ​ប៉ុណ្ណោះ​។​

​ដើម្បី​ឲ្យ​អ្នកបើកបរ​រថយន្ត​ធុន​ធ្ងន់ ឆ្លងកាត់​សាលារៀន​បើកបរ និង​មាន​ប័ណ្ណបើកបរ​ត្រឹមត្រូវ តាមច្បាប់ គឺ​ត្រូវ​ចូលរួម​ទាំងអស់គ្នា​។ ពោលគឺ​ចូលរួម​ទាំង​អ្នកអនុវត្ត​ច្បាប់​ដែលជា​ប៉ូលិស ចរាចរណ៍ ត្រួតពិនិត្យ​អ្នកបើកបរ ចូល​ទាំង​អ្នក​បង្រៀន ត្រូវ​ឲ្យ​ប្រាកដថា អ្នកបើកបរ​នោះ មក​រៀន ចេះ​ចាំ ហើយ​ប្រឡង​ជាប់ តាម​ក្បួនខ្នាត​ត្រឹមត្រូវ មិនមែន​ស៊ីលុយ​អ្នកបើកបរ ហើយ​ចង់​មក​រៀន ឬក៏​មិន​មក​រៀន ឲ្យ​តែ​បង់លុយ គឺ​ចេញ​ប័ណ្ណបើកបរ​ឲ្យ ដូច​ករណី ដែល​ធ្លាប់តែ​កើតមាន​ក្នុងពេល​កន្លងមក​។

​រីឯ​អ្នកបើកបរ​ផ្ទាល់ ត្រូវមាន​ស្មារតី​ភ្ញាក់រលឹក​ជាពិសេស​តែម្តង ព្រោះថា បើសិនជា​ពេលនេះ អ្នកចេះ​បើកបរ​រថយន្ត​មែន តែដោយសារ​តែ​ចេះ​តាម​គ្នា​រួមទាំង​ការអនុវត្ត​បើកបរ​រាល់ថ្ងៃ ក៏ពិតមែន តែ​អ្នកបើកបរ​នោះ ត្រូវតែ​ចូល​សាលារៀន​បណ្តុះបណ្តាល ឲ្យ​បាន​ត្រឹមត្រូវ ដើម្បី​យល់ដឹង​ឲ្យ​កាន់តែច្បាស់​ពី​ទ្រឹស្តី ក៏ដូចជា​ការទទួលស្គាល់​ពី​ស្ថាប័ន​សមត្ថកិច្ច​យល់ដឹង បន្ថែម​ពី​ស្លាក​សញ្ញា​ចរាចរណ៍ និង​ច្បាប់​ចរាចរណ៍​ព្រមទាំង​ទទួលបាន​ប័ណ្ណ​បើក បរ​ត្រឹមត្រូវ​។ បើសិនជា​កើតហេតុ គ្រោះថ្នាក់​ចរាចរ ជាយថាហេតុ​អ្វីមួយ​នោះ​មិន​ត្រឹមតែ​គ្រោះថ្នាក់​តែ​អ្នកបើក បរ​ខ្លួនឯង​នោះទេ គឺអាច​នឹង​បង្កបញ្ហា​គ្រោះថ្នាក់​ដល់​អ្នកដទៃ​ដែល​រួម​ដំណើរ ជាមួយ​អ្នក ឬក៏​អ្នកធ្វើដំណើរ​តាមផ្លូវ​ជាច្រើន​នាក់​ផ្សេងទៀត​។ ម្យ៉ាងទៀត អ្នកបើកបរ​មួយចំនួន ដែល​បង្កបញ្ហា​គ្រោះថ្នាក់​ចរាចរ​ហើយ អាង​រត់ គេច​ពី​ការទទួលខុសត្រូវ ចុះបើ​ប៉ះ​ថ្ងៃ​ស៊យ អ្នករត់​មិន​រួច ត្រូវគេ​ចាប់បាន នៅពេល​បង្កបញ្ហា​គ្រោះថ្នាក់​ចរាចរណ៍ ហើយ​ត្រូវគេ​កាត់ទោស ដោយ​វាយ​មួយ​ដៃ មួយ​ជើង គឺ​អ្នកបើកបរ​បង្កបញ្ហា​នោះ នឹង​គ្រោះថ្នាក់ ហើយ​អាច​របួស​ពិការ និង​អាច​ដល់​ស្លាប់ ក៏មាន ក្នុងពេល​កន្លងមក​។​

​ចំណែក​ក្រុមហ៊ុន​ដឹកជញ្ជូន​វិញ គឺ​សំខាន់​ជាងគេ​។ បើសិនជា​អ្នកបើកបរ​រថយន្ត​មិនមាន​ប័ណ្ណ បើកបរ​ត្រឹមត្រូវ​តាមច្បាប់​ទេ នោះ​ក្រុមហ៊ុន​ដឹកជញ្ជូន មិនគួរ​ទទួល​អ្នកបើក​បរ​នោះ​ឲ្យ​បើកឡាន របស់​ក្រុមហ៊ុន ដឹក​ដី ដឹកទំនិញ​នោះឡើយ​។ ព្រោះថា បើសិនជា​កើតមាន​បញ្ហា​គ្រោះថ្នាក់ ចរាចរណ៍ កើតឡើង ដោយសារតែ​អ្នកបើកបរ​នោះ គ្រាន់តែ​ចេះ​ជាន់​ហ្គែ​រ ជាន់​ហ្វ្រាំង និង​កាច់ចង្កូត ពោលគឺ​ចេះ​បើកបរ​តាមតែ​គ្នា ដោយ​មិនបាន​ឆ្លងកាត់​សាលា​បណ្តុះបណ្តាល​ត្រឹមត្រូវ ហើយក៏​គ្មាន​ប័ណ្ណបើកបរ​ថែមទៀត គឺ​នៅពេល​មាន​គ្រោះថ្នាក់​កើតឡើង ឬក៏​បើកបរ​ល្មើសច្បាប់ នោះ​នឹង​បណ្តាល​ឲ្យ​ខូច​ឈ្មោះ​របស់​ក្រុមហ៊ុន ខូចខាត​ឡាន ខាតបង់​ប្រាក់​របស់​ក្រុមហ៊ុន ដែល​ក្រុមហ៊ុន​ត្រូវ​ចេញសង​សំណង ដោយសារតែ​អ្នកបើកបរ​បង្ក​គ្រោះថ្នាក់​ហើយ​ជាពិសេស គឺ​ខាត​ពេលវេលា​នៃ​ការដឹកជញ្ជូន​ទំនិញ ទៅកាន់​គោលដៅ​ដែល​អាច​ប៉ះពាល់​ដល់​មុខ​ជំនួញ របស់ខ្លួន​ថែមទៀត​ផង​។​

​ជារួម មានតែ​ការចូលរួម​ទាំងអស់គ្នា ទាំង​ប៉ូលិស​អាជ្ញាធរ​អ្នកអនុវត្ត​ច្បាប់​ទាំង​សាលាបង្រៀន បើកបរ ទាំង​អ្នកចេញ​ប័ណ្ណបើកបរ ទាំង​អ្នកបើកបរ​ខ្លួនឯង​ផ្ទាល់ រួមទាំង​ក្រុមហ៊ុន​ដឹកជញ្ជូន ដែល​ប្រើប្រាស់​រថយន្ត ពិសេស​រថយន្ត​ធុន​ធ្ងន់​នេះឯង ដើម្បី​ធ្វើយ៉ាងណា ឲ្យ​អ្នកបើកបរ ឆ្លងកាត់​ការបណ្តុះបណ្តាល និង​មាន​ប័ណ្ណបើកបរ​ត្រឹមត្រូវ ដោយ​ត្រូវ​ចេះ​ស្ទាត់​ទាំង​ទ្រឹស្តី និង​ទាំង​ដៃចង្កូត ហើយ​គោរព​ច្បាប់​។ យើង​ត្រូវ​រួមគ្នា ដើម្បី​កាត់បន្ថយ​គ្រោះថ្នាក់​ចរាចរណ៍ ព្រោះថា គ្រោះថ្នាក់​ចរាចរណ៍​ផ្លូវគោក​នៅ​ប្រទេស​កម្ពុជា​យើង​បានសម្លាប់​មនុស្ស​មិន​លោះ ថ្ងៃ​ឡើយ ពោល​គឺជា​មធ្យម​យ៉ាងហោច​ណាស់ មាន​អ្នកស្លាប់ ៥​នាក់ និង​របួស ១៥​នាក់ ក្នុង ១​ថ្ងៃៗ ហើយ​នៅពេល​បុណ្យ​ឈប់សម្រាក​ធំៗ គឺ​អត្រា​គ្រោះថ្នាក់​ចរាចរ កាន់តែ​កើនឡើង ហើយ​អ្នករងគ្រោះ ស្លាប់ និង​របួស ក៏មាន​អត្រា​ខ្ពស់​ផងដែរ​៕ ដោយ​: ម៉េង​ឆៃ​