ឆ្លង​ចរន្តអគ្គិសនី​ឆេះ​ខ្សែ និង​បង្គោល​ភ្លើង សមត្ថកិច្ច​យក​បំពុង​បាញ់​ពន្លត់​

162
ចែករម្លែក

ដោយ​: ចាន់តូ / ភ្នំពេញ​: ឆ្លង​ចរន្តអគ្គិសនី​បណ្តាល​ឲ្យ​ឆេះ​ខ្សែកាប ខ្សែភ្លើង និង​បង្គោល​ភ្លើង បង្ក​ការភ្ញាកផ្អើល​យ៉ាងខ្លាំង​ដល់​ប្រជាពលរដ្ឋ ប្រជា​ការពារ​ខណ្ឌ និង​សមត្ថកិច្ច​យក​បំពុង​ពន្លត់​អគ្គិភ័យ​ជាច្រើន​បំពុង​បាញ់​ពន្លត់​។ ហេតុការណ៍​នេះ​បាន​កើតឡើង​នៅវេលា​ម៉ោង​១០៖៣៥​នាទី​ព្រឹក​ថ្ងៃទី​២៤ ខែតុលា ឆ្នាំ​២០១៩ ស្ថិតនៅ​ផ្លូវ​៥១៦ ក្នុង​សង្កាត់​បឹងកក់​១ ខណ្ឌទួលគោក​។​

​តាម​ប្រភពព័ត៌មាន​ពី​លោកពូ​សន្តិសុខ​ដែល​នៅ​កន្លែងកើតហេតុ បាន​ឲ្យ​ដឹងថា មុនពេល​កើតហេតុ​រូបគាត់​បាន​ឈរ នៅ​ខាងក្រោម​ខ្សែ​ដែល​ឆ្លង​ចរន្ត ពេលនោះ​គាត់​បានលឺ​សំលេង​(​បែក​ផ្កាភ្លើង​) គាត់​បាន​ងើយ​មើល​ទៅលើ ហើយ​ក៏បាន​ស្រែក​ឆោឡោ ផ្អើល​ដល់​ប្រជាពលរដ្ឋ​នៅ​ជិត​នោះ​នាំគ្នា​យក​បំពុង​ពន្លត់​អគ្គិភ័យ​ជាច្រើន​បំពុង​មក​បាញ់​ជា​បន្តបន្ទាប់ ទើប​រលត់ទៅវិញ​នៅវេលា​ម៉ោង​១១៖៥​នាទី​ថ្ងៃ​ដដែល​។​

​ក្នុង​ហេតុការណ៍​ខាងលើនេះ​ក៏​ឃើញ​មាន​វត្តមាន​លោក ឯក ឃុន​ឌឿ​ន អភិបាល​នៃ​គណៈ​អភិបាល​ខណ្ឌទួលគោក​ចុះមក​ត្រួតពិនិត្យ និង​បញ្ជា​កម្លាំង​មាន​សមត្ថកិច្ច​ផងដែរ​។

​សំរាប់​ករណី​ខាងលើនេះ សមត្ថកិច្ច​បានចេញរ​ថ​យន្ត​ពន្លត់​អគ្គិភ័យ​១​គ្រឿង មកដល់​កន្លែងកើតហេតុ តែ​មិនបាន​បាញ់​នោះទេ​៕ ល​