ជនសង្ស័យ​ជួញដូរ​គ្រឿងញៀន​ម្នាក់​ត្រូវបាន​សមត្ថកិច្ច​ឃាត់ខ្លួន​បញ្ជូនទៅ​តុលាការ​

100

ជនសង្ស័យ​ជួញដូរ​គ្រឿងញៀន​ម្នាក់​ត្រូវបាន​សមត្ថកិច្ច​ឃាត់ខ្លួន​បញ្ជូនទៅ​តុលាការ (​រូប​៖ គូលែន​)

(​សៀមរាប​)៖ ជនសង្ស័យ​ជា​អ្នកជួញដូរ​គ្រឿងញៀន​ម្នាក់ ត្រូវបាន​នគរបាល​ការិយាល័យ​ប្រឆាំង​ការជួញដូរ​គ្រឿងញៀន​ខេត្តសៀមរាប សហការ​ជាមួយ​កម្លាំង​ការិយាល័យ​(​ក​៨) នៃ​មន្ទី​ប្រឆាំង​គ្រឿងញៀន ចុះបង្ក្រាប​ករណី​រក្សាទុក និង​ជួញដូរ​ដោយ​ខុសច្បាប់​នូវ​សារធាតុ​ញៀន ធ្វើការ​ឃាត់ខ្លួន​និង​ដកហូត​បាន​វត្ថុតាង​មួយចំនួន រួច​បញ្ជូនមក​ការិយាល័យ​ជំនាញ ដើម្បី​រៀបចំ​សំណុំរឿង​ទៅ​តុលាការ​ចាត់ការ​តាមផ្លូវ​ច្បាប់​។​

​ក្នុង​ប្រតិបត្តិការ​ចុះបង្ក្រាប​ករ​ណី​ជួញដូរ​គ្រឿងញៀន​នេះ បានធ្វើ​ឡើង​កាលពី​វេលា​ម៉ោង​២២​និង​៣០​នាទី ថ្ងៃទី​១៧ ខែធ្នូ ឆ្នាំ ២០១៧ ស្ថិតនៅ​ចំនុច​ភូមិ​សាលាកន្សែង សង្កាត់​ស្វាយដង្គំ ក្រុង​សៀមរាប ខេត្តសៀមរាប​។​

​មន្ត្រីនគរបាល​គ្រឿងញៀន​ខេត្តសៀមរាប បាន​និយាយថា ជនសង្ស័យ​ដែល​ត្រូវបាន​កម្លាំង​ជំនាញ​ឃាត់ខ្លួន​ក្នុង​ប្រតិបត្តិ​ការបង្ក្រាប​ករណី​គ្រឿងញៀន​នេះ​គឺមាន ឈ្មោះ នឿ​ម ប៊ុន​ណាត ភេទ​ប្រុស អាយុ ៥០​ឆ្នាំ មាន​ទីលំនៅ​ភូមិ​គី​រី​មង្គល សង្កាត់​អូរ​ស្មាច់ ក្រុង​សំរោង ខេត្ត​ឧ​ត្ត​រ​មានជ័យ​។​

​មន្ត្រីនគរបាល​បាន​បន្តថា ជនសង្ស័យ​ខាងលើ​គឺជា​អ្នកជួញដូរ បន្ទាប់ពី​សមត្ថកិច្ច​ឃាត់ខ្លួន​បាន​ក្នុងនោះ​ដកហូត​បាន​វត្ថុតាង​រួមមាន គ្រឿងញៀន​មេ​តំ​ហ្វេ​តា​មីន ប្រភេទ​ទឹកកក (ICE) ទម្ងន់​១,៣​ក្រាម​និង​ថ្នាំ​គ្រាប់​Yama ចំនួន​០២​គ្រាប់ ទម្ងន់​០,២​ក្រាម​។​

​បច្ចុប្បន្ន​ជនសង្ស័យ រួមទាំង​វត្ថុតាង ត្រូវបាន​សមត្ថកិច្ច​នគ​របាល​នៃ​ការិយាល័យ​ប្រឆាំង​គ្រឿងញៀន​ខេត្តសៀមរាប កសាង​សុំ​ណុំ​រឿង​បញ្ជូនទៅ​សាលាដំបូង​ខេត្ត នៅ​ព្រឹក​ថ្ងៃទី​១៩ ខែធ្នូ ឆ្នាំ​២០១៧ នេះ ដើម្បី​ចាត់ការ​ទៅតាម​ផ្លូវច្បាប់​៕L ដោយ​៖ គូលែន​