ជប៉ុន​ជំរុញ​ឱ្យ​អ៊ីរ៉ង់​ដើរ “​តួនាទី​ស្ថាបនា​”

520
ចែករម្លែក

នាយករដ្ឋមន្ត្រី​ជប៉ុន​លោក​ស៊ីន​ហ្សូ អា​បេ​បាន​ជំ​រុញឱ្យ​រដ្ឋាភិបាល​ក្រុង​តេ​ហេ​រ៉ង់​ដើរ “​តួនាទី​ស្ថាបនា​” សម្រាប់​សន្តិភាព​នៅ​មជ្ឈិមបូព៌ា​កាលពី​ថ្ងៃ​ពុធ​ទី​១២​មិថុនា​ក្នុង​បេសកកម្ម​ការទូត​ដ៏​កម្រ​ទៅកាន់​សាធារណរដ្ឋ​អ៊ីស្លាម​ក្នុង​គោលបំណង​បន្ធូរបន្ថយ​ភាព​តានតឹង​រវាង​អាម៉េរិក​និង​អ៊ីរ៉ង់​។​

​ប្រទេស​អ៊ីរ៉ង់​បាន​ផុង​ជាប់​ក្នុងការ​ប្រឈមមុខគ្នា​ដ៏​ជូរចត់​ជាមួយនឹង​សហរដ្ឋ​អាម៉េរិក​ចាប់តាំងពី​ប្រធានាធិបតី​អាម៉េរិក​លោក​ដូ​ណា​ល់ ត្រាំ​បាន​ដកខ្លួន​ចេញពី​កិច្ចព្រមព្រៀង​នុយក្លេអ៊ែរ​ឆ្នាំ​២០១៥ កាលពី​ខែឧសភា​ឆ្នាំមុន​។​

​ចាប់តាំងពី​ពេលនោះ​មក វ៉ាស៊ីនតោន​បានដាក់​ចេញ​នូវ​ទណ្ឌកម្ម​ជា​ឯកតោភាគី ដែល​បាន​បង្ខំ​ឱ្យ​ជប៉ុន​ផ្អាក​ការទិញ​ប្រេង​ជាប់លាប់​របស់ខ្លួន​ពី​អ៊ីរ៉ង់ និង​បាន​បង្កើន​វត្តមាន​យោធា​នៅ​ឈូង​សមុទ្រ​ពែ​ក្ស​។​

​លោក​អា​បេ​បាន​ប្រាប់​សន្និសីទ​សារព័ត៌មាន​រួមគ្នា​មួយ​នៅ​ទីក្រុង​តេ​ហេ​រ៉ង់​ជាមួយ​ប្រធានាធិបតី​អ៊ីរ៉ង់​លោកហាស​សាន់ រូ​ហា​នី ថា “​វា​ចាំបាច់​ណាស់​ដែល​អ៊ីរ៉ង់​ដើរតួនាទី​ស្ថាបនា​ក្នុង​ការកសាង​សន្តិភាព​និង​ស្ថិរភាព​នៅ​មជ្ឈិមបូព៌ា​។ សព្វថ្ងៃនេះ​ភាព​តានតឹង​កំពុង​កើនឡើង​នៅ​មជ្ឈិមបូព៌ា​។ អ្នកជំនាញ​មួយចំនួន​បានចង្អុលបង្ហាញ​ថា ជម្លោះ​នេះ​អាច​នឹង​បង្កឡើង​ដោយ​ចៃដន្យ​”​។​

​លោកនាយក​រដ្ឋមន្ត្រី​ជប៉ុន​បាន​សង្កត់ធ្ងន់ថា ការប៉ះទង្គិច​ប្រដាប់អាវុធ “​ត្រូវតែ​បញ្ចៀស​ឱ្យបាន​តាម​គ្រប់​មធ្យោបាយ​ទាំងអស់​”​។​

​លោក​បាន​បន្ថែមថា ជប៉ុន​មានបំណង​ដើរតួ​យ៉ាងសំខាន់​នៅក្នុង​សមត្ថភាព​របស់ខ្លួន​ដើម្បី​បន្ធូរបន្ថយ​ភាព​តានតឹង ដែល​នេះ​គឺជា​គំនិត​តែមួយគត់​ដែល​នាំ​ខ្ញុំ​មកដល់​អ៊ីរ៉ង់​។​

​ថ្លែង​ទៅកាន់​សន្និសីទ​សារព័ត៌មាន​ដដែល​នោះ លោក​រូ​ហា​នី​បាន​និយាយថា លោក​រំពឹង​នឹងមាន “​ការផ្លាស់ប្តូរ​ជា​វិជ្ជមាន​” នៅ​មជ្ឈិមបូព៌ា​និង​ពិភពលោក ប្រសិនបើ​សហរដ្ឋ​អាម៉េរិក​បញ្ឈប់​ការដាក់​សម្ពាធ​សេដ្ឋកិច្ច​របស់ខ្លួន​មកលើ​អ៊ីរ៉ង់​តាមរយៈ​ទណ្ឌកម្ម​។​

​លោក​រូ​ហា​នី​និយាយថា “​ប្រសិនបើ​មាន​ភាព​តានតឹង នោះ​ឫសគល់​របស់​វា​គឺ​កើតចេញពី​សង្គ្រាម​សេដ្ឋកិច្ច​របស់​អាម៉េរិក​ប្រឆាំងនឹង​អ៊ីរ៉ង់​។ មិន​ថា​ភាព​តានតឹង​ត្រូវ​បញ្ឈប់​ឬ​អត់​នោះទេ យើង​នឹង​ឃើញ​ការផ្លាស់ប្តូរ​ជា​វិជ្ជមាន​នៅក្នុង​តំបន់​និង​ពិភពលោក​”​។​

​ប្រធានាធិបតី​អ៊ីរ៉ង់​បាន​និយាយ​បន្ថែមថា “​យើង​នឹងមិន​ចាប់ផ្តើម​ជម្លោះ​នៅក្នុង​តំបន់​ទេ សូម្បី​ប្រឆាំងនឹង​សហរដ្ឋ​អាម៉េរិក ក៏ប៉ុន្តែ​ប្រសិនបើ​សង្គ្រាម​ចាប់ផ្តើម​ប្រឆាំងនឹង​យើង នោះ​យើង​នឹង​ផ្តល់នូវ​ការឆ្លើយតប​ដ៏​ខ្លាំងក្លា​”៕ ដោយ៖ កញ្ញាដាលីស

លោក​អា​បេ​ធ្វើ​សន្និសីទ​រួមជាមួយ​ប្រធានាធិបតី​អ៊ីរ៉ង់​លោកហាស​សាន់ រូ​ហា​នី កាលពី​ថ្ងៃ​ពុធ​នៅ​ទីក្រុង​តេ​ហេ​រ៉ង់
#