ជប៉ុន​ទិញ​កោះ​តម្លៃ​១៤៦​លាន​ដុល្លារ​សម្រាប់​សមយុទ្ធ​យោធា​អាម៉េរិក​

210
ចែករម្លែក

​ជប៉ុន​បាន​និយាយ​កាលពី​ថ្ងៃ​ចន្ទ​ទី​២​ខែ​ធ្នូ​ថា​ខ្លួន​បាន​យល់ព្រម​ទិញ​កោះ​មួយ​ដែល​គ្មាន​មនុស្ស​រស់​នៅ នៅ​ឆ្នេរសមុទ្រ​ភាគ​និរតី​របស់ខ្លួន​ក្នុងតម្លៃ ១៤៦​លាន​ដុល្លារ សម្រាប់​ការធ្វើ​សមយុទ្ធ​យោធា​របស់​សហរដ្ឋ​អាម៉េរិក​។​

​រដ្ឋាភិបាល​ក្រុង​តូ​ក្យូ​និង​រដ្ឋាភិបាល​ក្រុង​វ៉ាស៊ីនតោន បាន​ព្រមព្រៀង​កាលពី​ឆ្នាំ​២០១១​ក្នុង​ការផ្លាស់ប្តូរ​ទីតាំង​ហ្វឹកហាត់​មួយ​សម្រាប់​យន្តហោះ​ចម្បាំង​របស់​អាម៉េរិក​​ទៅ​កាន់​កោះ​ម៉ា​ហ្គេ​ស៊ីម៉ា​ដែល​មាន​ចម្ងាយ​ប្រហែល ៣០ គីឡូម៉ែត្រ​ពី​ឆ្នេរសមុទ្រ​ភាគ​និរតី​នៃ​ប្រទេស​ជប៉ុន​។​

​លោក​យ៉ូ​ស៊ី​ហ៊ី​ដេ ស៊ូ​ហ្កា នាយខុទ្ទកាល័យ​នាយករដ្ឋមន្ត្រី​ជប៉ុន​បាន​និយាយ​ថា​កិច្ចព្រមព្រៀង​ដើម្បី​ទិញ​កោះ​ម៉ា​ហ្គេ​ស៊ីម៉ា ត្រូវ​បាន​សម្រេច​កាលពី​ថ្ងៃ​សុក្រ​សប្តាហ៍​មុន បន្ទាប់​ពី​កិច្ច​​ពិភាក្សា​រវាង​ក្រសួង​ការពារជាតិ​និង​ក្រុមហ៊ុន​អភិវឌ្ឍន៍​ដែល​ជា​ម្ចាស់​ភាគច្រើន​នៃ​កោះ​នេះ​”​។​

​ប្រតិ​ប​ត្ដិ​ការហ្វឹកហាត់​ហោះហើ​រ​របស់​អាម៉េរិក​បច្ចុប្បន្ន​ត្រូវបាន​ធ្វើឡើង​នៅ​កោះ​អ៊ូ​វ៉ូ ជី​ម៉ា​ចម្ងាយ​ប្រហែល ១.២០០ គីឡូម៉ែត្រ​ពី​ភាគខាងត្បូង​នៃ​ទីក្រុង​តូ​ក្យូ​។​

​រដ្ឋាភិបាល​ក្រុង​វ៉ាស៊ីនតោន​បាន​ស្នើសុំ​ការផ្លាស់ប្តូរ​ដោយ​និយាយថា​កោះ​អ៊ូ​វ៉ូ ជី​ម៉ា​ដែល​ជា​សមរភូមិ​ដ៏​សំខាន់​នៅ​សម័យ​សង្គ្រាមលោក​លើក​ទី​២ នោះ គឺ​នៅ​ឆ្ងាយ​ពេក​ពី​មូលដ្ឋាន​​យោធា​អាម៉េរិក​នៅ​ទីក្រុង​អ៊ី​វ៉ា​គូ​មី​ភាគ​ខាងលិច​នៃ​ប្រទេស​ជប៉ុន ជាទី​តាំង​យន្តហោះ​ប្រយុទ្ធ​របស់​ពួកគេ​៕​ដោយ​៖​សុខា​/sn

កង​យន្តហោះ​ចម្បាំង​ស្ថិតនៅ​មូលដ្ឋាន​យោធា​អាម៉េរិក​នៅ​ទីក្រុង​អ៊ី​វ៉ា​គូ​មី​ប្រទេស​ជប៉ុន​