ជាវ​តា​យ​៖​មិនត្រូវ​ទុក​បញ្ហា​វិវាទ​ដីធ្លី​ឱ្យ​ក្លាយជា​បំណុល​ដោះ​មិន​ចេញ​នោះទេ​

541
ចែករម្លែក

ដោយ​៖​បូកគោ​/​កំពត​៖​ចំណោទបញ្ហា​ដីធ្លី​ស្ថិតនៅត្រង់​ចំណុច​មួយ​ដែល​ត្រូវ​សួរ​ថាបើ​ដោះស្រាយ​បញ្ហា​វិវាទ​តើ​នឹងមាន​អ្វី​កើតឡើង​?​ព្រោះ​បើ​មិន​ដោះស្រាយ​នោះ​នឹង​ជួប​ករណី​ទំនាស់​កាន់តែ​ធ្ងន់ធ្ងរ​។​ដូច្នេះ​មន្ត្រី​ជំនាញ​និង​ផ្នែក​ពាក់​មិនត្រូវ​ទុក​បញ្ហា​វិវាទ​ដីធ្លី​ឱ្យ​ក្លាយជា​បំណុល​ដោះស្រាយ​មិន​ចេញ​នាពេល​ក្រោយ​នោះទេ​។​
​ក្នុង​កិច្ចប្រជុំ​គណៈកម្មាធិការ​គ្រប់គ្រង​ដី​រដ្ឋ​ថា្នក់​ខេត្ត​កាលពី​ព្រឹក​ថ្ងៃទី​២៣​ខែមករា​ឆ្នាំ​២០១៩​នៅ​សាលប្រជុំ​សាលាខេត្ត​លោក​ជាវ​តា​យ​ប្រធាន​គណៈកម្មាធិការ​គ្រប់គ្រង​ដី​រដ្ឋ​ខេត្តកំពត​បាន​មានប្រសាសន៍ថា​បញ្ហា​វិវាទ​ដីធ្លី​មួយចំនួន​ដែល​បានកើត​ឡើង​និង​អូសបន្លាយ​អស់​រយៈពេល​ដ៏​យូរ​មក​នោះ​ហេតុអ្វី​បានជា​មិន​ដោះស្រាយ​ឱ្យ​ហើយ​រួចរាល់​?

បើ​ព្យាយាម​ដោះស្រាយ​តើ​នឹងមាន​អ្វី​កើតឡើង​សម្រាប់​អ្នកពាក់ព័ន្ធ​ជាមួយ​បញ្ហា​ទាំងនេះ​។​បើ​មិន​នាំគ្នា​ដោះស្រាយ​ឱ្យ​រួចរាល់​នោះ​ករណី​ទំនាស់​នឹង​កាន់តែ​រីកធំឡើង​។​ដូច្នេះ​មន្ត្រី​ជំនាញ​និង​ផ្នែក​ពាក់ព័ន្ធ​ទាំងអស់​មិនត្រូវ​ទុក​បញ្ហា​វិវាទ​ដីធ្លី​ឱ្យនៅ​រ៉ាំ​រៃ​ក្លាយជា​បំណុល​ដោះស្រាយ​មិន​ចេញ​នាពេល​ក្រោយ​នោះឡើយ​។
​លោក​អភិបាលខេត្ត​បាន​បន្តថា​លោក​មិន​និយាយថា​គ្មាន​សមត្ថភាព​ឬ​យ៉ាងណា​នោះទេ​។​តែ​ចង់ដឹងថា​មូលហេតុ​អ្វី​បានជា​ទុកឱ្យ​នៅ​តៗ​គ្នា​រហូតមក​ដោយ​ដោះស្រាយ​មិនបាន តើ​ដោយសារ​អ្វីៗ​? ម្ល៉ោះហើយ អ្នក​មក​ក្រោយៗ​នៅតែ​តាម​ដោះ​បន្ត​។

​លោក​ជាវ តា​យ​បាន​បញ្ជាក់ថា កន្លងមក​មាន​អ្នកវិនិយោគ​ខ្លះ​បាន​និយាយថា​គេ​រត់​ម្តង​ហើយ​ម្តងទៀត ពី​អភិបាលខេត្ត​មួ​ទៅ​អភិបាលខេត្ត​មួយ​នៅតែ​ដោះស្រាយ​មិនបាន​។​ក្នុង​អង្គ​សន្តិ​បាត​បានលើកឡើង​ហើយ​ថា​ឆ្នាំ​២០១៩​នេះ​រាជរដ្ឋាភិបាល​បាន​យក​ករណី​ដីធ្លី​នេះ​ជា​បញ្ហា​ដោះស្រាយ​ចម្បង​ដោយ​គ្រប់​រដ្ឋបាល​រាជធានី​ខេត្ត​ទាំងអស់​ត្រូវ​ពិនិត្យមើល​ហើយ​ដោះស្រាយ​បញ្ចប់​បញ្ហា​ជូន​ប្រជាពលរដ្ឋ​។

ដូច្នេះ​ក្នុងនាម​រដ្ឋបាលខេត្ត​លោក​សូម​អំពាវនាវ​ដល់​ជំនាញ​និង​អភិបាលស្រុក​ក្រុង​ទាំងអស់​ពិនិត្យមើល​បញ្ហា​ទាំងនេះ​ដើម្បី​ចូលរួម​ព្រោះ​រដ្ឋបាល​ស្រុក​ក្រុងមាន​អាជ្ញាធរ​ឃុំ​សង្កាត់​ជា​សេនាធិកា​ហើយ​នៅ​កៀក​ផ្ទាល់​ជាមួយ​បញ្ហា​ទាំងឡាយ​។​ការចុះពិនិត្យ​ផ្ទាល់​និង​ធ្វើ​របាយការណ៍​ពិតជា​គន្លឹះ​នៃ​ដំណោះស្រាយ​ដែលមាន​ប្រសិទ្ធភាព​៕S/​