ដាំ​ផ្កា​សាគូ​រ៉ា២០០​ដើម លើកដំបូង​លើទឹក​ដី ខេត្តកំពង់ឆ្នាំង នៅ​ថ្ងៃ​បើកឆាក​បុណ្យ​ទន្លេ​

488
ចែករម្លែក
  • 41
    Shares

ដោយ:​សន សក្តា/​កំពង់ឆ្នាំង ៖ ដើម​ផ្កា​សាគូ​រ៉ាចំនួន២០០​ដើម ត្រូវបាន​យកមក​ដាំ​នៅ​សួន​ទេសចរណ៍​សហគមន៍​ព្រៃឈើ​ខ្សាច់​ស អណ្តូងច្រុះ ស្ថិត​ក្នុងស្រុក​រលាប្អៀរ ខេត្តកំពង់ឆ្នាំង នៅ​ថ្ងៃទី​១៥ ខែមីនា ឆ្នាំ​២០១៩ ដែលជា​ថ្ងៃ​បើកឆាក​ដំបូង​នៃ​ព្រឹត្តិការណ៍​បុណ្យ​ទន្លេ​លើក​ទី​៥។

ការដាំ​ដើម​ផ្កា​សាគូ​រ៉ា ចំនួន ២០០​ដើម​នេះ គឺជា​លើកដំបូង​ដែល​ប្រភេទ​ផ្កា​នេះ ត្រូវបាន​នាំមក​ដាំ​នៅលើ​ទឹក ខេត្តកំពង់ឆ្នាំង​។​

ក្នុង​ពិធី​ដាំ​ដើមឈើ​នេះ លោក ស៊ុន សុ​ណ្ណា​រិ​ទ្ធ អភិបាលរង​ខេត្តកំពង់ឆ្នាំង បាន​បញ្ជាក់ថា ដើម្បី​ចូលរួម​អបអរសាទរ ក្នុង​ព្រឹត្តិការណ៍​បុណ្យ​ទន្លេ​លើក​ទី​៥ ឆ្នាំ​២០១៩​នេះ រដ្ឋបាលខេត្ត​កំពង់ឆ្នាំង សហការ​ជាមួយ ក្រសួងទេសចរណ៍ បានរៀបចំ​នូវ​កម្មវិធី​ដាំ​ដើមឈើ​នេះ ក្នុង​គោលបំណង បំផុសស្មារតី អោយ​ប្រជាពលរដ្ឋ ចេះ​ស្រឡាញ់​ដើមឈើ ដើម្បី​បង្កើត​ទេសភាព សោ​ភ័​ណ្ឌ​ភាព ដ៏​ស្រស់បំព្រង​នៃ​ទីក្រុង និង​ភូមិដ្ឋាន​របស់​យើង​។

លោក​អភិបាលរង បានបញ្ជាក់​បន្ថែមថា ការចូលរួម​ដាំ​ដើមឈើ​ពិតជា​ផ្ដល់​សារសំខាន់​ខ្លាំងណាស់ មិន​ត្រឹមតែ ការពារ​បរិស្ថាន និង អភិរក្ស​ធនធានធម្មជាតិ​ប៉ុណ្ណោះ​ទេ ប៉ុន្តែ​ថែមទាំង​រួមចំណែក ទាក់ទាញ​ទេសចរ។ ម្យ៉ាងទៀត ការដាំ​ដើមឈើ​អនុស្សាវរីយ៍ ក៏​ជាការ​ឆ្លើយតប ទៅនឹង​អនុសាសន៍​របស់​សម្តេច​តេ​ជោ ហ៊ុន សែន ដែល​បាន​ជម្រុញ​ការដាំ កូនឈើ ក្នុង​មូលដ្ឋាន និង​លើកទឹកចិត្ត​យុទ្ធនាការ​ការដាំ​ដើមឈើ​ក្រោម​ពាក្យស្លោក ទេសចរណ៍​ម្នាក់​ដាំ​ដើមឈើ​មួយ​ដើម​។​

លោក​បន្តទៀតថា ដើម្បី​រួមចំណែក​ដល់​ការអភិវឌ្ឍ​ទេសចរណ៍ បៃតង​នៅ​កម្ពុជា រាជរដ្ឋាភិបាល​បានដាក់​ចេញ​នូវ​ចលនា​ប្រឡងប្រណាំង «​ទីក្រុង​ស្អាត រមណីយដ្ឋាន​ស្អាត សេវា​ល្អ បដិសណ្ឋារកិច្ច​ល្អ​» សំដៅ​ធ្វើឱ្យ​កម្ពុជា ក្លាយជា​គោលដៅ​ទេសចរណ៍ ដ៏​ស្រស់ស្អាត ប្រកបដោយ​ភាព​ស្អាត និង បៃតង ក្នុងនោះ​យុទ្ធនាការ​ទេសចរ​ម្នាក់ ដាំ​ដើមឈើ​មួយ​ដើម ត្រូវបាន​ដាក់ចេញ ក្នុង គោលបំណង ជំរុញ​សកម្មភាព​ដាំ​ដើមឈើ ឱ្យ​ក្លាយជា​ផលិតផល​ទេសចរណ៍​ថ្មី​មួយ ប្រកបដោយ​ការទាក់ទាញ សម្រាប់​ភ្ញៀវទេសចរ​ជាតិ និង អន្តរជាតិ ៕​B/