ណា​ប៊ី កេ​តា មិនទាន់​ប្រាកដ​សម្រាប់​ជំនួប​ជាមួយ​ក្រុម​យូ​ណាយ​ធី​ត បន្ទាប់ពី​មាន​បញ្ហា​ខ្នង​

554

ណា​ប៊ី កេ​តា (Naby Keita) ត្រូវបាន​បញ្ជូន​ទី​កាន់​មន្ទីរពេទ្យ​កាលពី​យប់​ថ្ងៃ​ពុធ​បន្ទាប់ពី​ត្អូញត្អែរ ពី​បញ្ហា​របួស​ខ្នង ក្រោយពេល​ក្រុម លី​វឺ​ភូ​ល​(Liverpool) ប្រកួត​ចាញ់​ក្រុម ណា​ប៉ូ​លី​(Napoli) នៅ​ក្របខណ្ឌ​ឆេ​ម​ពាន​លី​ក​។​
​ ​
​កេ​តា ដែលជា​ខ្សែបម្រើ​សញ្ជាតិ​ហ្គី​ណេ​ត្រូវបាន​សែង​ចេញពី​ទីលាន​នៅ​នាទី​ទី​២០ បន្ទាប់ពី ទទួល​ការព្យាបាល​យ៉ាងយូរ​។ កេ​តា ប៉ះ​បង្គិច​ជាមួយ​កីឡាករ ឡូ​រិ​ន​ហ្សូ អ៊ី​ស៊ី​កណេ (Lorenzo Insigne) ដែល​រកបាន​គ្រាប់​បាល់​ឈ្នះ​ឲ្យ​ក្រុម Napoli ។​

​លោក យើ​ហ្គេ​ន ក្លប់ (Jurgen Klopp) អ្នកចាត់ការ​របស់ Liverpool មិន​ផ្តល់ព័ត៌មាន​ថ្មី ជុំវិញ​បញ្ហា​របួស​របស់ កេ​តា ទេ​នៅពេល​សួរនាំ​អំពី​កីឡាករ​រូបនេះ​ក្នុង​សន្និសីទ​មួយ ក្រោយពេល​ប្រកួត ប៉ុន្តែ​នៅពេលនេះ មាន​ព័ត៌មាន​ថា កេ​តា​ត្រូវបាន​បញ្ចូល​ទៅកាន់ មន្ទីរពេទ្យ​ហើយ​។​
​ ​
​មិនទាន់មាន​ការបញ្ជា​ក់ថា តើ កេ​តា នឹង​អាច​បង្ហាញមុខ​សម្រាប់​ការប្រកួត​ជាមួយ​ក្រុម ម៉េ​ន​ឆេ​ស្ទ័​រ យូ​ណាយ​ធី​ត​នៅ​ថ្ងៃអាទិត្យ​នេះ​ឬ​យ៉ាងណាទេ​។​
​ ​
​សេចក្តីថ្លែងការណ៍​រប​ស់​ក្លិប​បាន​ឲ្យ​ដឹងថា “​វេជ្ជបណ្ឌិត​របស់​ក្លឹប​បានរួម​ដំណើរ​ជាមួយ កេ​តា ទៅ​មន្ទីរពេទ្យ​មួយ​។ ដោយមាន​ការព្រមព្រៀង​ពី​កីឡាករ​ក្រុមគ្រូពេទ្យ​នឹង​ពិនិត្យមើល​បញ្ហា សុខភាព​ផ្សេងៗ​ទៀត ដើម្បី​វាយតម្លៃ​ពី​ស្ថានភាព​របួស​របស់​កីឡាករ​រូបនេះ​”​។

​មិនទាន់មាន​ការបញ្ជា​ក់ថា កីឡាករ​វ័យ​២៣​ឆ្នាំ​រូបនេះ​នឹង​ចេញពី​មន្ទីរពេទ្យ​នៅពេលណា​ទេ​៕ ប្រែ​សម្រួល​: ពិសិដ្ឋ​

ខ្សែបម្រើ ណា​ប៊ី កេ​តា (Naby Keita)