តុលាការ​ម៉ាឡេស៊ី​សំរេច​ថា សវនាការ​1MDB​របស់​អតីត​នាយក​រដ្ឋមន្ត្រី​ណា​ជីប ត្រូវតែ​បន្ត​

594
ចែករម្លែក

​សវនាការ​លើកដំបូង​របស់​អតីត​មេដឹកនាំ​ម៉ាឡេស៊ី លោក​ណា​ជីប រ៉ា​ហ្សាក់ ពាក់ព័ន្ធ​នឹង​រឿងអាស្រូវ​មូលនិធិ​1MDB នឹង​ដំណើរការ​ក្រោយ​ពី​ចៅក្រម​ម្នាក់​បាន​សំរេច​កាលពី​ថ្ងៃ​ចន្ទ​​ទី​១១​វិច្ឆិកា​ថា ក្រុម​រដ្ឋអាជ្ញា​បានផ្តល់​ភស្តុតាង​ពេញលេញ​មួយ ដោយ​ជំរុញ​កិច្ច​ខិតខំ​ដើម្បី​នាំ​គាត់​មក​កាត់ទោស​ចំពោះ​ការលួចបន្លំ​ប្រាក់​ដ៏​សន្ធឹកសន្ធាប់​។​

​លោក​ណា​ជីប នឹង​ត្រូវ​ឡើង​តុលាការ​នៅ​ខែក្រោយ នៅ​ពេល​លោក​ចាប់ផ្តើម​ការពារ​ខ្លួន ក្នុង​បណ្តឹង​ពាក់ព័ន្ធ​នឹង​ការ​លួច​ប្រាក់​រាប់​ពាន់​លាន​ដុល្លារ​ចេញពី​មូលនិធិ​រដ្ឋ​1MDB​។​

អតីត​នាយករដ្ឋមន្ត្រី ណា​ជីប រ៉ា​ហ្សាក់ (​កណ្តាល​)​ចាកចេញ​ពី​តុលាការក្រុង​គូ​ឡា​ឡាំ​ពួរ​កាលពី​ថ្ងៃ​៣​មេសា ឆ្នាំ​២០១៩​។​លោក​កំពុង​ជាប់ចោទ​ពី​បទ​ប្រព្រឹត្ត​អំពើ​ពុករលួយ​និង​លាង​​លុយ​

​សូម​រំលឹក​ថា ក្រុមចំរុះ​កាន់អំណាច​របស់​លោក​ត្រូវ​បាន​បណ្តេញចេញ​ពី​អំណាច​កាលពី​ឆ្នាំមុន ភាគច្រើន​មក​ពី​រឿងអាស្រូវ​នេះ និង​ចាប់​តាំងពី​ធ្លាក់​ពី​តំណែង​លោក​ត្រូវបាន​ចាប់​​ខ្លួន​និង​រង​ការចោទប្រកាន់​រាប់សិប​។​

​អតីត​មេដឹកនាំ​វ័យ​៦៦​ឆ្នាំ​រូប​នេះ​បាន​ឡើង​តុលាការ​លើក​ដំបូង​កាលពី​ខែ​មេសា​ចំពោះ​រឿង​អាស្រូវ​ផ្ទេរប្រាក់​១០,១​លាន​ដុល្លារ​ពី​អង្គភាព​មួយ​របស់​1MDB​ចូល​ក្នុង​គណនី​របស់​​លោក​។​តែ​លោក​ណា​ជីប បាន​បដិសេធ​ថា​លោក​មិន​បាន​ប្រព្រឹត្ត​ខុស​ទេ​។​

​ក្រុម​រដ្ឋអាជ្ញា​បានបញ្ចប់​ការបង្ហាញ​ភស្តុតាង​កាលពី​ខែ​សីហា និង​កាលពី​ថ្ងៃ​ចន្ទ ចៅក្រម​តុលាការ​ជាន់ខ្ពស់​ម្នាក់ បាន​សំរេច​ថា ករណី​នេះ​មាន​ភស្តុតាង​រឹងមាំ​ល្មម​បញ្ជូន​លោក​​ណា​ជីប​ទៅ​សវនាការ​។​

​ក្នុងពេល​ជាមួយគ្នា ក្រុម​មេធាវី​របស់​ណា​ជីប បាន​និយាយថា​លោក​អតីត​នាយករដ្ឋមន្ត្រី​នឹង​ចូល​តុលាការ​ដើម្បី​ការពារ​ខ្លួន​នៅ​ថ្ងៃ​០៣​ធ្នូ តែ​«​លោក​ណា​ជីប​រន្ធត់ចិត្ត​ពេលឮ​ការ​​សំរេច​ចិត្ត​នេះ​»​ដោយសារតែ​លោក​តែង​មាន​ជំនឿ​ថា​លោក​នឹង​ត្រូវ​សំរេច​អោយ​រួចផុត​ពី​ការចោទប្រកាន់​៕​ដោយ​៖​វាសនា​