តួ​ក​គី បញ្ជា​អោយ​ចាប់ខ្លួន​ទាហាន​១៣៣​នាក់ ដោយសារ​សង្ស័យ​ពាក់ព័ន្ធ​ជាមួយ​មេក្លោង​រដ្ឋប្រហារ​

217
ចែករម្លែក

​ទីភ្នាក់ងារ​សារព័ត៌មាន​រដ្ឋ​បាន​និយាយ​កាលពី​ថ្ងៃ​អង្គារ​ទី​១៩​វិច្ឆិកា​ថា តួ​ក​គី​បាន​បញ្ជា​អោយ​ចាប់ខ្លួន​បុគ្គលិក​យោធា​១៣៣​នាក់ ចំពោះ​ការសង្ស័យថា​ជាប់​ពាក់ព័ន្ធ​នឹង​បណ្តាញ​​មួយ​ដែល​រដ្ឋាភិបាល​ក្រុង​អង់កា​រ៉ា ចោទប្រកាន់ថា​បាន​រៀបចំ​ធ្វើ​រដ្ឋប្រហារ​មួយ​នៅ​ឆ្នាំ​២០១៦​។​

​ទីភ្នាក់ងារ​សារព័ត៌មាន​និយាយថា ជនសង្ស័យ​ត្រូវ​បាន​តាម​រក​ចាប់ខ្លួន​នៅក្នុង​ប្រតិបត្តិការ​មួយ ដែល​ផ្តោត​នៅក្នុង​ខេត្ត​អ៊ី​សមៀ និង​ថា​ពួកគេ​៨២​នាក់​ធ្លាប់បាន​បំរើ​ក្នុង​​ជួរ​យោធា​។​

​អាជ្ញាធរ​តួ​ក​គី​ន្ទោ​ស​មេដឹកនាំ​សាសនា​ដែល​រស់នៅ​អាម៉េរិក​លោក ហ្វេ​ត​ធូ​ឡា ហ្គូ​ឡេន ថា​ជា​មេក្លោង​នៃ​រដ្ឋប្រហារ​មិនបាន​សំរេច​កាលពី​ថ្ងៃ​១៥ កក្កដា ឆ្នាំ​២០១៦​។​តែ​លោក​បាន​​បដិសេធ​ថា​មិន​ពាក់ព័ន្ធ​ទេ រីឯ​អាម៉េរិក​ក៏​មិន​បាន​ចាប់​បញ្ជូន​ខ្លួន​លោក​មក​តួ​ក​គី​តាម​ការស្នើសុំ​របស់​រដ្ឋាភិបាល​ក្រុង​អង់កា​រ៉ា​ដែរ​។​

​នៅក្នុង​ការបោសម្អា​ត​អស់ពេល​៣​ឆ្នាំ​ចាប់តាំងពី​ការប៉ុនប៉ង​ធ្វើ​រដ្ឋប្រហារ មនុស្ស​ជាង​៧៧.០០០​នាក់​ត្រូវបាន​ចាប់ខ្លួន​ញាត់​គុក​ដើម្បី​រង់ចាំ​សវនាការ និង​បុគ្គលិក​រដ្ឋការ​ស៊ីវិល​​ទាហាន និង​អ្នក​ផ្សេងៗ​ទៀត ត្រូវ​បាន​បណ្តេញចេញ​ពី​ការងារ ឬ​ព្យួរ​ការងារ រីឯ​ការចាប់ខ្លួន​ជា​ទូទៅ​នៅតែ​បន្ត​មាន​។​

​ក្នុងពេល​ជាមួយគ្នា បណ្តា​សម្ពន្ធមិត្ត​លោកខាងលិច​របស់​តួ​ក​គី រួម​ទាំង​ក្រុម​សិទ្ធិ​មនុស្ស​បាន​រិះគន់​ការបង្ក្រាប​ទ្រង់ទ្រាយ​ធំ​នេះ ដោយ​ចោទ​ថា​ប្រធានាធិបតី តា​យ​យី​ប អឺ​ដូ​ហ្កាន​​ប្រើប្រាស់​រដ្ឋប្រហារ​មិនបាន​សំរេច​នេះ​ជា លេស​ដើម្បី​កំចាត់​ជន​ប្រឆាំង​។​ទោះជា​យ៉ាងណា រដ្ឋាភិបាល​ក្រុង​អង់កា​រ៉ា បាន​ការពារ​ចំណាត់ការ​របស់​ខ្លួន​ដោយ ដោយ​ចាត់ទុក​វា​ជា​ចម្លើ​​យ​តប​ចាំបាច់​និង​សមស្រប​នឹង​ការ​គំរាម​ដែល​តួ​ក​គី​ប្រឈម ហើយ​ក៏​ប្តេជ្ញា​បោសសម្អាត​បណ្តាញ​របស់​លោក ហ្គូ​ឡេន​៕​ដោយ​៖​វាសនា​

បព្វជិត​តួ​ក​គី​តាំងនៅ​អាម៉េរិក លោក ហ្វេ​ត​ធូ​ឡា ហ្គូ​ឡេន នៅ​គេហដ្ឋាន​របស់​លោក​នៅក្នុង​រដ្ឋ​ផេន​ស៊ីល​វ៉ានៀ សហរដ្ឋ​អាម៉េរិក​