ទីក្រុង​ចិន​ជាច្រើន​កំពុង​ផ្តោត​សំខាន់​តែ​លើ​ការផលិត​រថយន្ត​អគ្គិសនី​

874
ចែករម្លែក

​ឡាន​អគ្គិសនី​មួយ​បាន​ព្យួរ​ពី​ពិ​ដាន​នៃ​បន្ទប់​តាំង​បង្ហាញ​របស់​ក្រុមហ៊ុន​អភិវឌ្ឍន៍​អចលនទ្រព្យ​មួយ​របស់​ចិន ដោយ​ធ្វើ​ឱ្យគេ​នឹកឃើញ​ឡើងវិញ​នូវ​ការតាំង​វត្ថុ​សម័យ​នៅ​សារមន្ទីរ​ទំនើប​។ ជាការ​ពិត ពួកវា​ជា​និមិត្តរូប​នៃ​មហិច្ឆតា​ឧស្សាហកម្ម​របស់​ប្រទេស​ចិន​។​

​គ្រាន់តែ​នៅតាម​ដងផ្លូវ​ដ៏​ស្អាត​មាន​របៀបរៀបរយ​មួយ អគារ​កប់​ពពក​ជាច្រើន​បាន​ឈរ​សំញែង ខណៈដែល​តំបន់ Shunde New Energy Vehicle Town ចាប់ផ្តើម​លេច​រូបរាង​នៅក្នុង​ទីក្រុង​ហ្វ័​រ​សាន ភាគខាងត្បូង ដែលជា​ផ្នែក​មួយ​នៃ​បេះដូង​ផលិតកម្ម​របស់​ចិន​។ ក្រុមមន្ត្រី​ក្នុងស្រុក​បាន​អួតថា មជ្ឈមណ្ឌល​សម្រាប់​ការផលិត​រថយន្ត​អគ្គិសនី (EV) និង​ការស្រាវជ្រាវ​របស់​ពួកគេ​អាច​រកប្រាក់​ចំណូល​បាន ១០០ ពាន់​លាន​យ័ន​សម្រាប់​សេដ្ឋកិច្ច​ក្នុង​មូលដ្ឋាន​។​

​សង្កាត់ Shunde គឺជា​គំរូ​ទីក្រុង​កំពុង​សាងសង់​មួយ​ក្នុងចំណោម​ទីក្រុង​២០​ដែល​ប្រើ​រថយន្ត​អគ្គិសនី​សុទ្ធ​យក​គំរូ​តាម​ទីក្រុង​ដេ​ត្រ​យ ខណៈដែល​ចិន​បានដាក់​ចេញ​ផែនការ​បច្ចេកវិជ្ជា​ដើម្បី​លក់​រថយន្ត​អគ្គិសនី​ច្រើន​បំផុត​មិន​ធ្លាប់មាន​នៅក្នុង​ឆ្នាំនេះ​។ ប្រធានាធិបតី​ចិន លោក ស៊ី ជីន​ពីង ចង់ឱ្យ​ក្រុមហ៊ុន​ផលិត​រថយន្ត EV ចំនួន ៥០០ របស់​ចិន​ក្លាយទៅជា​មេដែក​សម្រាប់​ឆក់​ឧស្សាហកម្ម​ដទៃទៀត ខណៈ​គាត់​ជំរុញ​ឱ្យ​កសាង​ចិន​ក្លាយជា​មហាអំណាច​ផលិតកម្ម​នៅត្រឹម​ឆ្នាំ ២០២៥​។​

​ផែនការមេ ដែល​ចង់​ធ្វើឱ្យ​ប្រទេស​ចិន​កាន់តែ​ពឹងផ្អែក​ខ្លាំង​លើ​ខ្លួនឯង​និង​ធ្វើ​ពិពិធ​កម្ម​ទិដ្ឋភាព​វិនិយោគ ដែល​គ្របដណ្តប់​ដោយ​វិស័យ​អចលនទ្រព្យ​និង​ទីផ្សារ​មូលធន​ដែល​ងាយ​ប្រែប្រួល បាន​ក្លាយជា​ចំណុច​ស្នូល​នៃ​សង្គ្រាម​ពាណិជ្ជកម្ម​រវាង​សហរដ្ឋ​អាម៉េរិក​និង​ចិន​។​

​ក្រុង​នានា ដែល​ត្រូវការ​វិធី​ដើម្បី​ធ្វើឱ្យ​សេដ្ឋកិច្ច​របស់ខ្លួន​មាន​ភាពរស់រវើក​ឡើង​វិញ ចង់បាន​ផែនការ​បែបនេះ​។ ទីក្រុង​ទាំងនេះ​នឹង​ផ្តល់ជូន​នូវ​ដីធ្លី​តម្លៃថោក ការលើកលែង​ពន្ធ និង​ការឧបត្ថម្ភ​ធន​ទីតាំង​សម្រាប់​ក្រុមហ៊ុន​ផលិត​រថយន្ត ក្រុមហ៊ុន​ផ្គត់ផ្គង់​គ្រឿងបន្លាស់​និង​មន្ទីរពិសោធន៍​វិស្វកម្ម ដោយ​សង្ឃឹមថានឹង​ទាក់ទាញ​ការងារ​បច្ចេកវិជ្ជា​ខ្ពស់​រាប់ពាន់​នៅក្នុង​វិស័យ​រថយន្ត EV ដែល​កំពុងតែ​រីកចម្រើន​។​

​លោក ហឺ ស៊ា​ផេង ប្រធាន​ក្រុមហ៊ុន Xpeng Motors Technology ជា​ក្រុមហ៊ុន​ទើប​ចាប់ផ្តើម​ថ្មី​គាំទ្រ​ដោយ​ក្រុមហ៊ុន Alibaba Group Holding និង​ក្រុមហ៊ុន Foxconn Technology Group បាន​និយាយថា “​ឧស្សាហកម្ម​រថយន្ត​ថាមពល​ថ្មី​នេះ​គឺជា​ការ​ភ្នាល់​របស់​អាជ្ញាធរ​ក្នុង​មូលដ្ឋាន ដែល​បាន​ធ្វើឡើង​។ ក្រុមហ៊ុន​ផលិត EV ដែល​ទទួលបាន​ជោគជ័យ អាច​នាំ​ក្រុមហ៊ុន​យ៉ាងហោចណាស់ ២០០ នៅក្នុង​ខ្សែសង្វាក់​ឧស្សាហ​កម្មនេះ​ចូលទៅ​កាន់​ខេត្ត​មួយ​”​។​

​ទឹកប្រាក់​វិនិយោគ​ដែល​បាន​ប្តេជ្ញាចិត្ត​ក្នុងការ​អភិវឌ្ឍ​ទីក្រុង EV ទាំងនេះ​គឺមាន​ចំនួន​ដល់​ទៅ ២០៩ ពាន់​លាន​យ័ន​រហូត​មកទល់ពេលនេះ​។ នេះ​បើ​យោងតាម​ការព្យាករណ៍រ​បស់​សារព័ត៌មាន Bloomberg ដែល​ផ្អែកលើ​ការផ្សព្វផ្សាយ​ជា​សាធារណៈ​នានា​។ ការប្តេជ្ញាចិត្ត​ទាំងនោះ​គឺមាន​ចាប់ពី​ការវិនិយោគ​អចលនទ្រព្យ​រហូតដល់​ការចំណាយ​លើ​ការអភិវឌ្ឍ​ដោយ​ក្រុមហ៊ុន​ផលិត​រថយន្ត ដើមទុន​ឯកជន និង អង្គភាព​ដែល​គាំទ្រ​ដោយ​អាជ្ញាធរ​ក្នុង​តំបន់​៕ ដោយ៖ កញ្ញាដាលីស

រថយន្ត​អគ្គិសនី​របស់​ក្រុមហ៊ុន Xpeng Motors Technology បាន​តាំង​បង្ហាញ​នៅ​ទីក្រុង​សៀង​ហៃ​កាលពី​ថ្ងៃទី​១៧​មេសា ២០១៩