ទីប្រឹក្សា​ផ្ទាល់​សម្តេច​តេ​ជោ​ជួប​សំណេះសំណាល​ជាមួយ​និស្សិត​ខ្មែរ​នៅ​ប្រទេស​ចិន​

107
ចែករម្លែក

ដោយៈ​សុផល​/​ភ្នំពេញ​៖​លោក​បណ្ឌិត​សុខ​សុ​ក្រឹ​ត្យា​ទីប្រឹក្សា​ផ្ទាល់​សម្តេច​តេ​ជោ​ហ៊ុនសែន​នាយករដ្ឋមន្ត្រី​នៃ​កម្ពុជា​និង​ជា​រដ្ឋលេខាធិការ​ក្រសួងទេសចរណ៍​កាលពី​ថ្ងៃទី​២៦​ខែធ្នូ​ឆ្នាំ​២០១៩​បាន​អញ្ជើញ​ជួប​សំណេះសំណាល​និង​សួរសុខទុក្ខ​និស្សិត​កម្ពុជា​ដែល​បាននិងកំពុង​បន្ត​ការសិក្សា​នៅក្នុង​ទីក្រុង​គួ​យ​លីន ខេត្ត​គ័​រងស៊ី​នៃ​សាធារណរដ្ឋ​ប្រជាមានិត​ចិន​។​

​ក្នុងជំនួប​នោះ​លោក​បណ្ឌិត​បាន​ពាំនាំ​ការ​ផ្តាំផ្ញើ​សួរសុខទុក្ខ​ក្តី​ស្រឡាញ់​និង​នឹករឭក​ព្រមទាំង​បាន​ចែក​អំណោយ​ដ៏​ថ្លៃថ្លា​របស់​សម្តេចនាយក​រដ្ឋមន្ត្រី​និង​សម្តេច​កិត្តិ​ព្រឹទ្ធ​បណ្ឌិត​ជូន​ចំពោះ​និស្សិត​កម្ពុជា​ទាំងអស់​។​ក្នុងឱកាស​នោះ លោក​រដ្ឋលេខាធិការ​បា​ន​ជម្រាប​និស្សិត​ខ្មែរ​នៅ​ចិន​អំពី​គោលនយោបាយ «​ឈ្នះ​ឈ្នះ​»​របស់​រាជរដ្ឋាភិបាល​កម្ពុជា​ក្រោម​ការដឹកនាំ​របស់​សម្តេច​តេ​ជោ​ហ៊ុនសែន​ដែល​បាន​នាំមក​នូវ​សុខសន្តិភាព​ស្ថិរភាព​នយោបាយ​-​សេដ្ឋកិច្ច​និង​ការអភិវឌ្ឍ​លើ​គ្រប់​វិស័យ​និង​មាន​ទំនាក់ទំនង​ល្អ ជាមួយ​បណ្តា​ប្រទេស​ទាំងអស់​ក្នុង​ពិភពលោក​។

​ជាពិសេស​ទំនាក់ទំនង​នៃ​កិច្ចសហប្រតិបត្តិការ​គ្រប់​ជ្រុងជ្រោយ​រវាង​សាធារណរដ្ឋ​ប្រជាមានិត​ចិន និង​កម្ពុជា​ដែល​អាច​ឈានដល់​ការបញ្ជូន​ប្អូន​និង​ក្មួយៗ​ទាំងអស់​មក​បន្ត​ការសិក្សា​នៅទីនេះ​និង​នៅ​ទីក្រុង​ផ្សេងៗ​ទៀត​នៃ​សាធារណរដ្ឋ​ប្រជាមានិត​ចិន​។​លោក​សុខ​សុ​ក្រឹ​ត្យា​ក៏បាន​ជម្រាបជូន​និស្សិត​អំពី​ស្ថានការណ៍​ទូទៅ​នៅ​កម្ពុជា​នាពេល​កន្លងមក​និង​ក្នុងពេល​បច្ចុប្បន្ន​។​ជាពិសេស​អំពី​វិធានការ​ទប់ស្កាត់​ដ៏​មាន​ប្រសិទ្ធភាព​ដល់​ការបង្ក​ចលាចល​ក្នុងសង្គម​ដោយ​ក្រុម​ចលនា​ស​ង្គោះ​ជាតិ​ខុសច្បាប់​កន្លងមក​និង​សូមឱ្យ​និស្សិត​ទាំងអស់​គាំទ្រ​និង​ចូលរួម​ជាមួយ​រាជរដ្ឋាភិបាល​ក្នុងការ​ថែរក្សា​សន្តិភាព​ដែលមាន​ស្រាប់ និង​ទប់ស្កាត់​មិនឱ្យ​មាន​ចលនា​ខុសច្បាប់​ណាមួយ​អាច​កើតឡើង​បាន​។​

​ជាការ​ឆ្លើយតប​ទៅនឹង​សំណូមពរ​នេះ​និស្សិត​ទាំងអស់​បាន​ប្តេជ្ញា​ការពារ​សមិទ្ធិផល​ទាំងឡាយ​របស់​រាជរដ្ឋាភិបាល​។​ជាពិសេស​សន្តិភាព​ដែល​បានមកពី​កិច្ចខិតខំ​ប្រឹងប្រែង​ឥតឈប់ឈរ​របស់​សម្តេច​នាយករដ្ឋមន្ត្រី​និង​ថ្នាក់ដឹកនាំ​គណបក្ស​ប្រជាជន​កម្ពុជា​។​ក្រុមនិស្សិត​ក៏បាន​ថ្លែងអំណរគុណ​យ៉ាង​ជ្រាលជ្រៅ​ចំពោះ​អំណោយ​ដ៏​ថ្លៃថ្លា​និង​ការ​នឹករឭក​របស់​សម្តេចនាយក​រដ្ឋមន្ត្រី​និង​សម្តេច​កិត្តិ​ព្រឹទ្ធ​បណ្ឌិត​និង​សូម​គោរព​ជូនពរ​សម្តេច​ទាំងពីរ​ទទួលបាន​នូវ​សុខ​ភាពល្អ​ប្រាជ្ញា​វាងវៃ​និង​ជោគជ័យ​ថ្មីៗ​បន្ថែមទៀត​ដើម្បី​បន្ត​ដឹកនាំ​នាវា​កម្ពុជា​ឆ្ពោះទៅរក​សុខសន្តិភាព និង ការអភិវឌ្ឍ​ជា​រៀងរហូត​ទៅ​៕S/

​ចំណងជើង​រូបថត​៖​លោក​បណ្ឌិត សុខ សុ​ក្រឹ​ត្យា ទីប្រឹក្សា​ផ្ទាល់​សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា និង​ជា​រដ្ឋលេខាធិការ​ក្រសួងទេសចរណ៍ ជួប​សំណេះសំណាល និង​សួរសុខទុក្ខ​និស្សិត​កម្ពុជា ដែល​បាននិងកំពុង​បន្ត​ការសិក្សា​នៅក្នុង​ទីក្រុង​គួ​យ​លីន ខេត្ត​គ័​រងស៊ី​នៃ​សាធារណរដ្ឋ​ប្រជាមានិត​ចិន​(​រូបៈ សុផល​)