ទូរទស្សន៍​បច្ចេកវិទ្យា​ទំនើប​ចុងក្រោយ​បំផុត​របស់​សូ​នី មាន​វត្ត​មាននៅ​កម្ពុជា​

1625
ចែករម្លែក

​ដោយ : ​សុផល​/​ភ្នំពេញ ៖ ទូរទស្សន៍​ទំនើប​បំផុត​បច្ចេកវិទ្យា​ចុងក្រោយ​ប្រភេទ​4K HDR​របស់​សូ​នី បាន​មាន​វត្តមាន​នៅក្នុង​ប្រទេស​កម្ពុជា​។​ទូរទស្សន៍ A9F OLED​និង​Z9F LCD ដែលមាន​លក្ខណសម្បត្តិ ល្អឥតខ្ចោះ​លើ​គុណភាព រូបភាព សម្លេង​និង​ការ​រចនា​នេះ បាន​ត្រូវ​សម្ពោធ​ជា​ផ្លូវការ​កាលពី​ល្ងាច​ថ្ងៃទី​១ ខែ តុលា ឆ្នាំ២០១៨​។​

​លោក Jeremy Choon Guan​ជំនួយការ​អគ្គនាយក​ក្រុមហ៊ុន​សូ​នី​បាន​មានប្រសាសន៍ថា ​ឆ្នាំ​២០១៧​គឺជា​ឆ្នាំ​ប្រវត្តិសាស្ត្រ​របស់រប​ស់ទូរ​ទស្សន៍​សូ​នី ​សម្រាប់​កំណើន​ពាណិជ្ជកម្ម​និង​កំណើន​ការលក់​។​ សូ​នី បានឈ្នះ​ពានរង្វាន់​ល្បីៗ​លំដាប់​អន្តរជាតិ​ជាច្រើន ​ខាង​រូបភាព​និង​សម្លេង​។ ​ឆ្នាំនេះ​និង​ឆ្នាំ​២០១៩​សូ​នី នឹង​បន្ត​ផ្តោតទៅលើ​ផលិតផល​ទូរទស្សន៍​បច្ចេកវិទ្យា​ទំនើប​ចុងក្រោយ ​គឺ​ទូរទស្សន៍​ម៉ាក Bravia Oled ស៊េរី A9F​និង Z9F ។​

​លោក Felix Foo ប្រធាន​ផ្នែក​ទីផ្សារ បាន​និយាយថា​ ​ទូរទស្សន៍​ស៊េរី​ថ្មី​នេះ​ជា​ទូរទស្សន៍​ទំនើប​បំផុត​របស់​សូ​នី ដែលមាន​រូបភាព​និង​សម្លេង​គុណភាព​ខ្ពស់បំផុត​។​ សូ​នី ជា​ម៉ាក​ល្បី​លំដាប់​ពិភពលោក​មានគុណ​ភាព​ល្អ​ទាំង​សម្លេង​និង​រូបភាព ​ហើយ​លោក​រំពឹងថា​នឹង​ទទួលជោគជ័យ​នៅ​កម្ពុជា​។​ ពីមួយ​ឆ្នាំទៅ​មួយឆ្នាំ​ការលក់​របស់​សូ​នី​កើន​ឡើងជា​លំដាប់​។​
​ ​

ទាក់ទង​នឹង​ចំណែក​ទីផ្សារ​ប្រទេស​កម្ពុជា​លោក​បានឱ្យដឹងថា សូ​នី ជាប់​ឈ្មោះ​ជា​ក្រុមហ៊ុន​កំពូលៗ​បី​។​ យើង​បាន​ខិតខំ​យ៉ាងខ្លាំង​ក្នុងការ​អភិវឌ្ឍ​អ្វីៗ ​ដែល​ថ្មី​បន្ថែម​ដើម្បី​ក្លាយខ្លួនជា​ក្រុមហ៊ុន​លំដាប់​ទី​១​នៅ​កម្ពុជា​ នៅពេល​អនាគត​។​
​ ​

សូមជម្រាបថា​ទូរទស្សន៍ Flagship A9F បំពាក់​មកជា​មួយ Pixel Contrast Boster ដែលជា​ឧបករណ៍​ត្រួតពិនិត្យ​លើ​ផ្ទាំង​OLED​។​ទូរទស្សន៍ A9F មាន​គុណភាព​សម្លេង​ល្អឥតខ្ចោះ​ដោយសារតែ​បច្ចេកវិទ្យា Acoustic Surface Audio​។​ ទូរទស្សន៍ Z9F មាន​គុណភាព​ខ្ពស់ រូប​ច្បាស់ សម្លេង​ល្អ ការ​រចនា​ល្អ​ប្រណីត ។​ទោះ​មើល​ពី​ជ្រុង​ណាក៏ដោយ​ក៏​នៅតែ​ច្បាស់​។​ ទាំង A9F OLED​និង​Z9F LCD ត្រូវ​បំពាក់​ដោយ​ប្រព័ន្ធ​ដំណើរការ​ទើបតែ​អភិវឌ្ឍ​ថ្មី​គឺ XI Ultimate Processor ។​ប្រព័ន្ធ​ដំណើរ​នេះ ដើរតួនាទី​យ៉ាងសំខាន់​ក្នុងការ​ផ្តល់​រូបភាព​។​

​លោក តាំង សុធា​រិ​ទ្ធ តំណាង​ក្រុមហ៊ុន​ស៊ុន​ស៊ី​មិច​កូ ដែលជា​អ្នក​ចែកចាយ​ផ្តាច់មុខ​ផលិតផល​សូ​នី​ប្រចាំ​កម្ពុជា​បានឱ្យដឹងថាៈ​ពិធី​សម្ពោធ​និង​រាត្រី​វី​អាយ​ភី​សូ​នី​នេះ បាន​ត្រូវធ្វើឡើង​ក្នុង​គោលបំណង​ផ្សព្វផ្សាយ​ផលិតផល​ថ្មី​បច្ចេកវិទ្យា​ចុងក្រោយ ​នឹង​ថ្លែងអំណរគុណ​ដល់​អ្នកប្រើប្រាស់​និង​តែងតែ​គាំទ្រ​ក្រុមហ៊ុន ​និង​មាន​ការលក់​បញ្ចុះតម្លៃ​សម្រាប់​ផលិតផល​ថ្មី​។​

​ក្រុមហ៊ុន​ស៊ុន​ស៊ី​ម៉ិ​កកូ ជា​ក្រុមហ៊ុន​ដំបូង​តែមួយគត់​ដែល​នាំចូល​គ្រឿង​បរិក្ខា​អេឡិចត្រូនិក​ចូលមក​កម្ពុជា​ និង​បានចាប់ផ្តើម​អាជីវកម្ម​តាំងពី​ទសវត្សរ៍​៩០​។  ​រហូតមកដល់​ពេលនេះ មាន​១៧​សាខា​នៅ​ទូទាំងប្រទេស ដែល​ក្នុងនោះ​១២​សាខា​នៅ​រាជធានី​ភ្នំពេញ​និង​៥​សាខា​ទៀត​នៅតាម​បណ្តា​ខេត្ត​ដូចជា ខេត្ត​ព្រះសីហនុ សៀមរាប កំពត បាត់ដំបង​។​

​សូមបញ្ជាក់ថា​ក្រៅពី​តាំង​បង្ហាញ​ទូរទស្សន៍​ស៊េរី​ម៉ា​ស្ទ័​រទាំង​ពីរ​នេះ A9F OLED​និង​Z9F LCD គ៏​មាន​បង្ហាញ​ផលិតផល​ថ្មីៗ​ជាច្រើន​ទៀតផង​ដែរ​ ៕B