នគរបាល​ខេត្តក្រចេះ កំពុង​ស៊ើបអង្កេត​យ៉ាង​ក្តៅគគុក ករណី​ឆេះ​ផ្ទះ​ស្លាប់​មួយ​គ្រួសារ​មាន​៤​នាក់ សង្ស័យ​អំពើ​ឃាតកម្ម​

522

ដោយ​: ឆាយា​នាថ / ក្រចេះ​: នគរបាល​ខេត្តក្រចេះ ពេលនេះ​កំពុងបើក​ការស៊ើបអង្កេត​យ៉ាង​ក្តៅគគុក ចំពោះ​ករណី​ឆេះ​ផ្ទះ​ស្លាប់​មួយ​គ្រួសារ​មាន​គ្នា​៤​នាក់ ដែល​ជំហាន​ដំបូង​សមត្ថកិច្ច​សង្ស័យថា ជា​អំពើ​ឃាតកម្ម ។ ហេតុការណ៍​នេះ កើតឡើងនៅអំឡុង​ថ្ងៃទី៩-១០ ខែសីហា ឆ្នាំ២០១៨ ប៉ុន្តែសមត្ថកិច្ច​ទទួល​បាន​ព័ត៌មាន នៅល្ងាច​ថ្ងៃទី១១ ខែសីហា ឆ្នាំ​២០១៨​។​

​សមត្ថកិច្ច​សន្និដ្ឋាន​ទំនង​អាច​កើតឡើង​រយៈពេល​ពីរ​បី​ថ្ងៃ​មកហើយ​ក្នុងនោះ​មាន​ជនរងគ្រោះ​ទី​១ ៖ ឈ្មោះ​ឆុំ ឈាន ភេទ​ប្រុស អាយុ​៣០​ឆ្នាំ ត្រូវជា​ឪពុក​។ ទី​២ ៖ ឈ្មោះ​ជួន សុខ​នាង ភេទ​ស្រី អាយុ​៣៦​ឆ្នាំ​ត្រូវជា​ប្រពន្ធ​។ ទី​៣ ៖ ឈ្មោះ​ឈាន ភឹម​សី ភេទ​ប្រុស អាយុ​១១​ឆ្នាំ​ត្រូវជា​កូន​។ ទី​៤ ៖ ឈ្មោះ​ឈាន វ​ណ្ណី ភេទ​ស្រី​អាយុ​៩​ឆ្នាំ​ត្រូវជា​កូន​។​

​ចំណែក​ជនសង្ស័យ​មិនទាន់បាន​ស្គាល់​អត្តសញ្ញាណ​នៅឡើយ​ទេ បើ​គិត​ត្រឹម​ល្ងាច​ថ្ងៃទី​១២ ខែសីហា នេះ​។

​សមត្ថកិច្ច​សន្និដ្ឋានថា ក្រោយពី​ជនសង្ស័យ​ធ្វើ​សកម្មភាព​សម្លាប់​ជនរងគ្រោះ​រួចហើយ ក៏បាន​ដុត​ផ្ទះ និង​សាកសព​ដើម្បី​បង្វែងដាន​ជា​គ្រោះ​អគ្គិភ័យ​។ នៅ​កន្លែងកើតហេតុ​គេ​បាន​ប្រទះឃើញ​មាន​សំបក​កាំភ្លើង ដែលជា​តម្រុយ​ក្នុងការ​ស៊ើបអង្កេត​រប​ស់​សមត្ថកិច្ច​ផងដែរ​។​

​ករណីនេះ សមត្ថកិច្ច​ទទួល​ព័ត៌មាន​ពី​ប្រជាពលរដ្ឋ​ប្រទះឃើញ ហើយ​រាយការណ៍​ដល់​កម្លាំង​សមត្ថកិច្ច​។ ហើយ​សាកសព​សមត្ថកិច្ច​ក៏បាន​រៀបចំ​ប្រមូល​បញ្ចុះ​ទុក​បណ្តោះអាសន្ន​រង់ចាំ​ស្រាវជ្រាវ​រក​សាច់ញាតិ​យកទៅ​ធ្វើបុណ្យ​តាម​ប្រពៃណី​នៅពេល​ក្រោយ​ទៀតផង​ដែរ​៕ ល​