នាយករដ្ឋមន្ដ្រី​សម្ដែង​អារម្មណ៍​ត្រេកអរ ដែល​រោងចក្រ​ស៊ីម៉ងត៍​កើត​ចំពេល​តម្រូវ​ការកើនឡើង​

153

(​ភ្នំពេញ​) ៖ សម្ដេច​តេ​ជោ ហ៊ុន សែន នាយករដ្ឋមន្ដ្រី​នៃ​កម្ពុជា បាន​សម្ដែង​នូវ​អារម្មណ៍​ត្រេកអរ​និង​សាទរ​យ៉ាងខ្លាំង​គ្រា​ដែល​រោងចក្រ​​ស៊ីម៉ងត៍​ថ្មី​មួយទៀត បាន​លេច​រូបរាង​ឡើង​នៅ​កម្ពុជា ចំ​ពេលដែល​តម្រូវការ​ស៊ីម៉ងត៍​នៅ​កម្ពុជា​កំពុងតែ​កើនឡើង​យ៉ាងច្រើន​សន្ធឹក​​សន្ធាប់​។​

​ក្នុងឱកាស​អញ្ជើញ​ជា​អធិបតី​ក្នុង​ពិធី​សម្ពោធ​ដាក់​ឲ្យ ប្រើប្រាស់​រោងចក្រ​ផលិត ស៊ីម៉ង់ត៍​របស់​ក្រុមហ៊ុន ជីបម៉ុង អ៊ី​ន​ស៊ី ស៊ី​មេន ខ​ប​ភើ​រេ​សិន (CMIC)​នៅ​ស្រុក​បន្ទាយមាស ខេត្តកំពត នៅ​ព្រឹក​ថ្ងៃទី​៨ ខែកុម្ភៈ ឆ្នាំ​២០១៨​នេះ សម្ដេច​តេ​ជោ បាន​លើកឡើងថា បច្ចុប្បន្ន​តម្រូវការ​ស៊ីម៉ងត៍​កាន់តែ​កើនឡើង​នៅ​កម្ពុជា ព្រោះ​ទាំង​សាលារៀន វត្ត កុដិ និង​ផ្ទះ​ជាដើម​សុទ្ធតែ​ធ្វើឡើង​ពី​ស៊ីម៉ង់ ។ ក្នុងនោះ​ផ្លូវថ្នល់​បើ​ចង់​រឹង គឺ​ត្រូវ​ការចាក់​បេតុង ដែល​ត្រូវការ​ស៊ីម៉ង់ ជាច្រើន​ផងដែរ ហើយ​កម្ពុជា​នឹង​អាច​នាំចេញ​ស៊ីម៉ងត៍​ទៅ​ក្រៅ​​ប្រទេស​ដែរ​។ ក្នុងន័យនេះ សម្ដេច​បាន​បញ្ជាក់ថា តម្រូវការ​ស៊ីម៉ង់ត៍​នាពេល​បច្ចុប្បន្ន​គឺ​កាន់តែ​ខ្ពស់​ព្រោះតែ​ការសាងសង់​កំពុងតែ​កើន​​ឡើង​ខ្លាំង​។​

​សម្ដេច​បាន​បន្ដថា សមិទ្ធផល​នៅលើ​ទឹកដី​ខេត្តកំពត រួមមាន​រោងចក្រ​ផលិត​ស៊ីម៉ង់​តិ៍​ចំនួន​៣ និង​វា​រី​អគ្គិសនី​មួយ​ផង​នោះ​គឺជា​សមិទ្ធ​​ផល ដែល​បានកើត​ចេញពី​សុខសន្តិភាព​នៃ​ជាតិ ដែល​បាន​រកម​កបាន​ដោយ​លំបាក​។

​សម្តេច​តេ​ជោ ហ៊ុន សែន បាន​ថ្លែង​ដែ​ឬថា បច្ចុប្បន្ន​កម្ពុជា​មានលទ្ធភាព​ផលិត​ស៊ីម៉ង់ត៍​បាន​ប្រមាណ ៧​លាន​តោន​ក្នុង​មួយឆ្នាំ​ជាមួយ​​រោងចក្រ​ចំនួន​៤​។ ស៊ីម៉ង់ត៍​នេះ បាន​ដើរតួនាទី​សំខាន់​សម្រាប់​បំពេញតម្រូវការ​លើ​វិស័យ​សំណង់ និង​ផ្លូវ​មួយចំនួន​ផងដែរ​។​រោងចក្រ​​ផលិត​ស៊ីម៉ង់ត៍​នេះ មិន​ត្រឹមតែ​ផ្តល់​ការងារ​ដោយផ្ទាល់​ដល់​ពលរដ្ឋ ដែល​ធ្វើ​ការងារ​នៅក្នុង​រោងចក្រ​ដោយផ្ទាល់​នោះទេ​តែ​ក៏បានផ្តល់​​ការងារ​ដោយ​ប្រយោល​ដល់​ប្រជាពលរដ្ឋ​ជាច្រើន​ទៀត​។​

​ក្នុងឱកាស​នេះ សម្តេចនាយក​រដ្ឋមន្ត្រី ក៏បាន​បន្ត​លើកឡើង​ដែរ​ថា ក្រោយ​ឆ្នាំ​១៩៧៩ ពលរដ្ឋ​កម្ពុជា​ភាគច្រើន​គឺ​បាតដៃ​ទទេ​តែ​ពេល​បច្ចុប្បន្ន​កម្ពុជា​មានព​ល​រដ្ឋ​ជា​អ្នកវិនិយោគ ដែលមាន​ទុន​រាប់រយ និង​ពាន់​លាន​ដុល្លារ​ផងដែរ​។​

​ក្នុងនាម​ជា​ប្រមុខ​ដឹកនាំ​គណបក្ស​ប្រជាជន​កម្ពុជា សម្ដេច​ក៏បាន​ថ្លែងអំណរគុណ​ដល់​ប្រជាពលរដ្ឋ​ខ្មែរ​ដែល​បាន​គាំទ្រ​គណបក្ស​ប្រជាជន​​កម្ពុជា និង​រូប​សម្តេច​ផ្ទាល់​ឲ្យ​ដឹកនាំ​ប្រទេសជាតិ​។ សម្តេច​បាន​បន្ថែមថា រាល់​ព្រឹត្តិការណ៍​នៅក្នុង​ប្រទេស​ចុងក្រោយ​នេះ​សុទ្ធតែ​បាន​ផ្សារ​​ភ្ជាប់​ជាមួយ​សម្តេច​។​

​សម្តេច​តេ​ជោ​បន្តថា អ្វីដែល​កម្ពុជា​កំពុងមាន​នាពេល​បច្ចុប្បន្ន​សុទ្ធតែ​បានកើត​ចេញ ពី​ការដែល​សម្តេច​បាន​យក​ជីវិត​ទៅធ្វើ​ដើមទុន ដើម្បី​នាំមក​នូវ​ការរំដោះ​ប្រទេស​ចេញ ពី​របប​ប្រល័យពូជសាសន៍​ប៉ុលពត និង​ការយក​ជីវិត​ទៅ​បិទ​បញ្ចប់​ភ្លើងសង្គ្រាម​នៅ​ទូទាំងប្រទេស​។​

​សម្តេច​តេ​ជោ ហ៊ុន សែន បាន​ថ្លែងថា កិច្ចចរចា​សន្តិភាព​ទីក្រុង​ប៉ារីស ២៣ តុលា ១៩៩១​មិនមែនជា​អ្នក​នាំ​សេដ្ឋកិច្ច​ទីផ្សារ​មក​កម្ពុជា​​នោះទេ ពោល​សេដ្ឋកិច្ច​ទីផ្សារ​ត្រូវបាន​សម្តេច​ដាក់ចេញ ដើម្បី​ជំរុញ​សេដ្ឋកិច្ចជាតិ​តាំងពី​មុន​កិច្ចចរចា​ទីក្រុង​ប៉ារីស​មកម្ល៉េះ​។​

​សម្តេច​តេ​ជោ ហ៊ុន សែន បាន​ថ្លែង​ប្រឆាំង​ចំពោះ​នយោបាយ​គាំពារ​និយម របស់​ប្រទេស​មួយចំនួន​លើ​វិស័យ​ពាណិជ្ជកម្ម​ហើយ​ការប្រកាន់​​នយោបាយ​គាំពារ​និយម នឹងធ្វើ​ឲ្យ​ប្រទេស​នោះ​ក្លាយទៅជា​ឯកោ​។

​សម្តេច​តេ​ជោ បាន​បញ្ជាក់ថា ភ្នំ​សម្រាប់​ទាញ​វត្ថុធាតុដើម​ផលិត​ស៊ីម៉ងត៍​នៅក្នុង​ទីតាំង​របស់​ក្រុមហ៊ុន​ផលិត​ស៊ីម៉ងត៍​ជីបម៉ុង​អាច​ប្រើ​បាន​​រយៈពេល​១០០​ឆ្នាំ ក្នុង​កម្រិត​ផលិត​ស៊ីម៉ង់ត៍​ប្រមាណ ២​លាន​តោន​ក្នុង​មួយឆ្នាំ​។​

​សម្តេច​តេ​ជោ ហ៊ុន សែន បាន​ថ្លែងថា ខេត្តកំពត​មាន​ធនធាន​ពី​ធម្មជាតិ​ច្រើន​សម្រាប់​ផលិត​ចេញ​នូវ​ផលិតផល​នានា​ដូចជា​ការ​ការ​​ផលិត​អំបិល និង​មាន​ថ្ម មាន​ដី​សម្រាប់​ផលិត ស៊ីម៉ង់ត៍​ជាដើម​។ សម្តេច​តេ​ជោ​ក៏បាន​មើលឃើញថា​សេដ្ឋកិច្ច​ក្នុង​ខេត្តកំពត​មានការ​រីក​​ចម្រើន​ច្រើន តែ​មិនទាន់​គ្រប់គ្រាន់​នៅឡើយ​ទេ ដែល​ទាមទារ​ឲ្យ​មានការ​ប្រឹងប្រែង​រួមគ្នា​បន្ថែមទៀត​។​

​យ៉ាងណា​ម៉េ​ញ ក្នុងឱកាស​នេះ សម្ដេច​ក៏បានផ្ដល់​សារ​ដល់​ក្រុមហ៊ុន​ស៊ីម៉ងត៍​ទាំងអស់ ត្រូវ​ដឹកជញ្ជូន​ដោយ​គោរព​ច្បាប់ ដោយ​មិនត្រូវ​ដឹក​លើស​ទម្ងន់ ដែល​ធ្វើ​ឲ្យ​ខូច​ផ្លូវថ្នល់​នោះឡើយ ៖ “…​ខ្ញុំ​សូម​ឲ្យ ម្ចាស់​រោងចក្រ​ស៊ីម៉ងត៍​ទូទាំងប្រទេស កុំ​ដឹក​ស៊ីម៉ង់ត៍​លើស​ទម្ងន់​ឲ្យ​សោះ …​នេះ​មិនមែន​សម្រាប់ តែ​ឡាន​ដឹក​ស៊ីម៉ងត៍​ទេ គឺ​សម្រាប់​ក្រុមហ៊ុន ដឹកជញ្ជូន​ទាំងអស់​…​កុំ​ដឹក​លើស​ទម្ងន់ ដើម្បី​ចូលរួម​ថែរក្សា​ផ្លូវជាតិ​យើង និង​ផ្លូវលំ​តូចធំ​ឲ្យ​នៅជាប់ ល្អ​ប្រើប្រាស់​បានយូរ​អង្វែង​…”៕​ដោយ​៖​វិបុល​/sn