នាយករដ្ឋមន្ត្រី​ឡាវ​ស្នើ​ឲ្យ​កម្ពុជា​ជំរុញ​ការធ្វើ​ពាណិជ្ជកម្ម​និង​វិនិយោគ​ទៅកាន់​ប្រទេស​ឡាវ​

1105
ចែករម្លែក

ដោយៈតារារិទ្ធ/​សៀមរាបៈលោក ថង​លូន ស៊ី​សូលី​ដ (Thongloun Sisoulith) នាយករដ្ឋមន្ត្រី​ឡាវ​បានស្នើ​មកសមភាគីរបស់លោកគឺសម្តេចតេជោហ៊ុនសែនដោយសុំ​ធ្វើ​ឲ្យ​កម្ពុជា​ជួយ​ធ្វើយ៉ាងណា ជំរុញ​ពាណិជ្ជកម្ម ការវិនិយោគ និង ទេសចរណ៍ រវាង​ប្រទេស​ទាំងពីរ​ឲ្យ​មាន​វិសាលភាព​កាន់តែ​ធំ​ឡើង ។ លោក​បាន​បន្តថា​ពេលនេះ​ទំហំ​ពាណិជ្ជកម្ម​រវាង​ប្រទេស​ទាំងពី​រមាន​ត្រឹម ២០ លាន​ដុល្លារ​អាមេរិក​ប៉ុណ្ណោះ ហើយក៏​កំពុង​បន្ត​ធ្លាក់ចុះ​ផងដែរ ។​

សម្តេចតេជោជាមួយសមភាគីឡាវ

លោក ថង​លូន ស៊ី​សូលី​ដ បានស្នើ​បែបនេះ​ទៅកាន់​សម្តេច​អគ្គមហាសេនាបតី​តេ​ជោ ហ៊ុន សែន នាយក​រដ្ឋមន្ត្រី​កម្ពុ​ជាកាល​ល្ងាច​ថ្ងៃទី ៤ ខែមេសា នៅ​សណ្ឋាគារ​សុខា​សៀមរាបក្នុងជំនួបរវាងលោកទាំងពីរ ។​

លោក អ៊ាង សុផល្លែត ជំនួយការ​ផ្ទាល់​សម្តេច​តេ​ជោ បាន​ប្រាប់​អ្នកសារព័ត៌មាន​បន្ទាប់​ពី​ជំនួប​នោះ​ថា​ ថង​លូន ស៊ីលូ​លី​ត បានជម្រាបជូន​វាយតម្លៃ​ខ្ពស់​ចំពោះ​ទំនាក់ទំនង​រវាង​កម្ពុ​ជា និង ឡាវ ។ ក៏ប៉ុន្តែ​លោកនាយ​រដ្ឋមន្ត្រី​បានធ្វើការ​កត់សម្គាលថា​ទំហំ​ពាណិជ្ជកម្ម រវាង​កម្ពុជា​និង​ឡាវ​មាន​ត្រឹម ២០ លាន​ដុល្លារ​ប៉ុណ្ណោះ ហើយក៏​កំពុងមាន​ការថយចុះ​ផងដែរ ។ ក្នុងន័យនេះ​លោក​បាន​គោរព​ស្នើសុំ​ធ្វើយ៉ាងណា​ជំរុញ​ពាណិជ្ជកម្ម​រវាង​ប្រទេស​ទាំងពីរ ឲ្យ​មាន​វិសាលភាព​កាន់តែ​ធំ​ឡើង​ជាមួយនេះ​វិស័យ​ទេសចរណ៍ ក៏​ដូច​ការវិនិយោគ​ផ្សេងៗ​ទៀត រវាង​ប្រទេស​ទាំងពីរ ដែលជា​កត្តា​ជំរុញ​ឲ្យ មាន​ភាព​ស្និទ​ស្នាល​ជាង​មុន​ថែមទៀត​។​

ជាការ​ឆ្លើយតប​សម្តេច​តេ​ជោ​នាយករដ្ឋមន្ត្រី​បាន​យល់ស្រប​ជាមួយនឹង​អ្វីដែល​ជាការ​លើក​ឡើ ង​របស់លោក ថង​លូន ស៊ី​សូលី​ត​។​សម្តេច​​មានប្រសាសន៍ថា​ជាការ​ពិតណាស់​ទំហំ​ពាណិជ្ជកម្ម ការ វិនិយោគ គប្បី​ណា​ជំរុញ​ឲ្យ​ប្រជាជន​និង​ប្រជាជន មានការ​វិនិយោគ​និង​ធ្វើ​ពាណិជ្ជកម្ម​រវាង​គ្នា​ទៅវិញទៅមក ។សម្តេច​​​បន្តថា​យើង​នៅ​មាន​​សក្តានុពល​ជាច្រើន ក្នុងការ​ជំរុញ​កំណើន​ពាណិជ្ជកម្ម ការវិនិយោគ និង ទេសចរណ៍ ។សម្តេច​តេ​ជោ​បាន​សន្យាថា​កម្ពុជា​នឹង​ពិនិត្យមើល​លទ្ធភាព​ក្រុមហ៊ុន​អាកាសចរណ៍​កម្ពុជា ដើម្បី​ធ្វើការ​ហោះហើរ​ត្រង់ ទៅកាន់​ទីក្រុង​វៀងចន្ទន៍ និង ទីក្រុង​ហ្លួងព្រះបាង របស់​ឡាវ​។ ​សម្តេច​ក៏បាន​លើក​ជា​គំនិត​ផ្តួចផ្តើម​ឲ្យ​មានការ​សិក្សា​អំពី​ការមិន​យកពន្ធ​ត្រួតគ្នា ដូច​ដែរ​កម្ពុជា​បាន​ចុះហត្ថលេខា​ជាមួយ​វៀតណាម​កន្លងមក ។ សម្តេច​ក៏បាន​ស្នើសុំ​ឲ្យ​ភាគី​ឡាវ ពិនិត្យមើល​ការតភ្ជាប់​បណ្តាញអគ្គីសនី​ពី​ប្រទេស​ឡាវ​ចូល​កម្ពុជា និង លក់​ឲ្យ​កម្ពុជា ដែល​នេះ​គឺជា​ចំណុច​ដែល​សម្តេច​យល់ឃើញថា​អាច​ជំរុញ​ពាណិជ្ជកម្ម ការវិនិយោគ និង ទំនាក់ទំនង​រវាង​ប្រទេស​ទាំងពីរ​ឲ្យ​មានការ​កើនឡើង និង​ជិតស្និទ្ធ​ថែមទៀត​៕​មន

#